“Məktəb direktoru olmasına baxmayaraq...” - Göytəpə sakinlərindən yeni Təhsil nazirinə növbəti müraciət

Bir müddət əvvəl Cəlilabad rayon Göytəpə şəhərinin bir qrup sakini Təhsil nazirinə müraciət ünvanlayaraq, V.Mürsəlov adına Göytəpə şəhər 1 saylı orta məktəbin direktoruyla bağlı xahişlərini çatdırmışdılar. Həmin məktubun bir nüsxəsi də “AzPolitika.info”-ya daxil olmuş və saytımızda dərc edilmişdi.

Valideynlər Təhsil nazirindən sözügedən məktəbin direktoru Zaur Ələkbərovun başqa məktəbə direktor kimi göndərilməsinə imkan verilməməsini xahiş edirdilər: “Aldığımız məlumata görə, Zaur Ələkbərovla direktor kimi bağlanmış müddətli əmək müqaviləsinə xitam verilmiş və başqa məktəbə direktor göndərilməsi ehtimalı var. Bu xəbər həm məktəb kollektivinin böyük hissəsinin, həm də valideynlərin narahatçılığına səbəb olub. Əminik ki, Zaur Ələkbərovun məktəbimizə rəhbərlik etməsi müddəti uzadılmasa, burada yenidən neqativ hallar baş qaldıracaq və tədris prossesi unudularaq, yenidən korrupsiya ön plana keçəcək.”

600-yə yaxın valideynin imzaladığı müraciətdə qeyd olunurdu ki, Z.Ələkbərov 2017-ci ildə məktəbə direktor təyin olunandan sonra məktəb korrupsiyasız və şəffaf şəkildə idarə olunmağa başlayıb: “2014-cü ildə “ilin ən yaxşı müəllimi” müsabiqəsinin qalibi olmuş Zaur Ələkbərovun savadlı idarəçiliyi nəticəsində məktəbimizdə sağlam mühit yaradılmış, təhsilin keyfiyyəti yüksəlmiş, şagirdlərə şəxsiyyət kimi baxılmağa başlamış, əhali arasında məktəbin işgüzar nüfuzu xeyli artmışdır.”

 Ötən gün isə bu məsələ ilə bağlı Təhsil nazirinə ünvanlanan daha bir müraciət daxil olub. 600-dək Göytəpə sakininin müraciətinə daha 400-dən artıq sakin qoşularaq, hazırkı direktorun başqa məktəbə göndərilməməsini xahiş edirlər: “V. Mürsəlov adına Göytəpə şəhər 1№-li tam orta məktəbin direktoru Zaur Ələkbərovla bağlanmış müddətli müqaviləyə 16 iyun 2020-ci ildə xitam verilib. Zaur Ələkbərov məktəbə rəhbərlik etdiyi müddət ərzində bütün təzyiqlərə sinə gərərək, məktəbdə hər hansı adla vəsait toplanmasının qarşısını alıb. O, məktəbdə ciddi intizam yaradıb, hər şagirdə öz övladı kimi baxıb və valideynlərin fikirlərinə hörmətlə yanaşıb, tədrisin keyfiyyətini qaldırıb. Məktəb direktoru olmasına baxmayaraq, yeri gələndə qollarını çırmayıb məktəbin ərazisində təmir işləri ilə də məşğul olub. Sizdən xahiş edirik ki, onunla müqaviləni uzadasınız.”

Tahir

AzPolitika.info