“İRS” folklor ansamblının bədii rəhbəri, Əməkdar mədəniyyət işçisi Sidqi Mustafayev vəfat edib. Bu barədə onun yaxınları sosial şəbəkədə yazıb.
Bildirilib ki, S.Mustafayev COVID-19-dan dünyasını dəyişib.
Xatırladaq ki, o, uzun illər ürək-damar çatışmazlığından əziyyət çəkib.
Həmçinin bir neçə gün əvvəl S.Mustafayevin həyat yoldaşı Fəridə Mustafayeva, qızı isə ötən il COVID-19-dan vəfat edib.
S.Mustafayevin qızı Hökümə xanım Axşam.az-a açıqlamasında bildirib ki, atası 10 gündür ki, xəstəxanada müalicə alırdı: “Bacım Təravət virusdan vəfat etdi. Yeddi gün əvvəl anam Lətifə xanım da koronavirusdan dünyasını dəyişdi. O, 1 saylı Kliniki Tibbi Mərkəzdə müalicə alırdı. Atamı isə Elmi-Tədqiqat Ağciyər Xəstəlikləri İnstitutuna yerləşdirmişdik. Xilas edə bilmədilər”.
Allah rəhmət eləsin.
Qeyd edək ki, S.Mustafayev 24 fevral 1941-ci ildə Bakı şəhərinin Balaxanı qəsəbəsində anadan olub. 1976-cı ildə Rəşid Nəsiboğlu ilə Balaxanı qəsəbəsində qədim alətlərdən ibarət olan “İRS” folklor ansamblını yaradıb. Vaxtilə “İRS” ansamblı ilə Türkiyəyə, İsveçrəyə, İrana, dünyanın bir çox ölkələrinə səfərlər ediblər.
2011-ci ildə Sidqi Mustafayev "Ən vətənpərvər ansambl rəhbəri" nominasiyasında qızıl medala layiq görülüb. 14 sentyabr 2015-ci ildə “Əməkdar Mədəniyyət İşçisi ” adına layiq görülüb.
Şərhlər