“AST TELMAN”I AZƏRBAYCANLI KİLLER ƏLƏ VERİB - İş adamı iki aylıq həbs edilib (Yenilənib)

Monteneqroda saxlanılan Çerkizovski bazarının keçmiş direktoru Telman İsmayılov barəsində 2 ay müddətinə həbs qətimkan tədbiri seçilib. “Report” “İnterfax”a istinadən xəbər verir ki, bunu T. İsmayılovun vəkili Marina Rusakova deyib.

Onun sözlərinə görə, qərardan artıq apellyasiya şikayəti verilib: “Telman İsmayılov siyasi sığınacaq üçün müraciəti yoxlanılan zamanı saxlanılıb. Bu da şikayət üçün əsaslardan biridir. Həbs olunmasına baxmayaraq, Monteneqro İsmayılovun apellyasiya şikayəti ilə bağlı hələ bir qərar verməyib, ona siyasi sığınacaq verilməsi məsələsi ölkə hakimiyyəti tərəfindən baxılmaqdadır”

Vəkil bildirib ki, Monteneqro hökuməti T. İsmayılova siyasi sığınacaq verməkdən imtina edərsə, onun Rusiyaya təhvil verilməsi məsələsi iki aya qədər çəkə bilər.

Qeyd edək ki, Rusiyanın ən varlı iş adamları siyahısında olan Telman İsmayılov iki sahibkarın qətlini təşkil etməkdə ittiham olunur. İsmayılova 11 noyabr 2017-ci ildə ittiham irəli sürülüb, azərbaycanlı iş adamının axtarışı İnterpol vasitəsilə həyata keçirilib.

***

Müflis olmuş iş adamı yenə şəxsi təyyarəsi ilə uçurmuş; İsrail vətəndaşı olan Telman İsmayılovun Rusiyaya təhvil verilməsi nə qədər gözləniləndir? AST Şirkətlər Qrupunun rəhbəri, bir vaxtlar Rusiyanın ən nüfuzlu iş adamlarından biri olan Telman İsmayılovun (“AST Telman”) Monteneqroda (Çernoqoriya) həbsi gözlənilməz oldu. Çünki 2017-ci ildə barəsində axtarış verilən, iki sifarişli qətldə və kredit öhdəliklərini yerinə yetirməməkdə günahlandırılan T.İsmayılov əvvəl Fransaya sığınmışdı, son illər isə Monteneqroda yaşayırdı və bu, Rusiyanın hüquq-mühafizə orqanları üçün sirr deyildi.

T.İsmayılov qətldə və maliyyə fırıldaqlarında günahlandırılsa da, o, xaricdə özünə “siyasi səbəblər” tapa bilmişdi. T.İsmayılov iddia edir ki, onunla bağlı istintaq sifarişlidir və siyasidir. Bu məsələdə T.İsmayılovun tutarlı arqumentləri də olmamış deyil. Çünki T.İsmayılovun problemləri 2010-cu ilin payızında-Rusiya hakim elitası daxilində baş verən çəkişmələr Moskvanın 18 illik meri, ölkə siyasətinin aparıcı fiqurlarından və hakim “Vahid Rusiya” Partiyasını yaradanlardan biri Yuri Lujkovun(vəfat edib) işdən qovulmasından sonra başlamışdı. Lujkov işdən çıxarılan kimi Kreml “qırğıları” ona qarşı kompromat müharibəsinə başladılar və sabiq merin himayə etdiyi iş adamları da hədəfə gəldi.

Burada isə T.İsmayılov ön sırada oldu. Lujkovun istefasından sonra onun T.İsmayılovla münasibətləri haqda geniş materiallar TV-lərə ötürüldü. Lujkov T.İsmayılovla əlbir olmaqda və uzun müddət onun “Çerkizovski” bazarında hökm sürən qanunsuzluqlara şərait yaratmaqda ittiham edildi. Bildirilirdi ki, Lujkovla dostluğundan istifadə edən “AST Telman” şirkətlərini vergidən yayındırıb. Lujkov siyasi səhnədən çəkilən kimi “Çerkizovski” bazarı bağlandı, T.İsmayılovun nəhəng biznesinin çöküşü başladı...

Bəs, niyə iş adamını indi həbs etdilər, onun Rusiyaya verilməsi nə qədər gözləniləndir?

Telman İsmayılov

T.İsmayılovun yaxın ətrafından olan bir şəxs Rusiyanın “Moskovskiy komsomelts” qəzetinə bu barədə danışıb. Onun dediyinə görə, T.İsmayılov gizlənmirdi və onun yerini hamı bilirdi: “Düşünürəm ki, onun indi həbsi kimlərinsə marağında olub. Şübhə yoxdur ki, bu, siyasi və yuxarıdan verilmiş qərardır”.

Onun sözlərinə görə, T.İsmayılov Monteneqroda villasında rahat yaşayıb, istədiyi vaxt şəxsi təyyarəsi ilə ölkənin hüdudlarını tərk edib. Bir neçə dəfə Fransaya və İsrailə gedib.

“Onun Rusiyanı tərk etməzdən əvvəl külli-miqdarda kredit öhdəliyi vardı. Əmlaklarının satışı son vaxtlaradək davam edirdi. Bütün obyektləri haqda ətraflı məlumatları və fotoşəkilləri Vahid Federal İflas Reyestrinin saytından tapmaq mümkündür”- deyə, o bildirib.

T.İsmayılovun İsrail vətəndaşı olduğunu xatırladan həmin şəxs deyib ki, iş adamı həmin ölkədən müdafiə istəyəcək.

“Ya da ora etap olunmağa çalışacaq. Məsələn, İsraildə əhəmiyyətsiz bir işin başlanmasını təşkil etməyə çalışacaq və istintaq hərəkətlərində iştirak etmək üçün oraya köçürülməsini istəyəcək”- deyə, o bildirib.

T.İsmayılovun həbsi barədə qərar ilk dəfə 2017-ci il oktyabrın 30-da verilib. T.İsmayılov o zaman artıq ölkədə deyildi və Fransaya yerləşmişdi. T.İsmayılov 2 qətldə təqsirləndirilirdi. “AST Telman” hazırda axtarışda olan qardaşı Rafiq İsmayılovla birgə iş adamı Vladimir Savkinin qətlində suçlanır. Həmin qətl 2016-cı ilin mayında baş verib. Savkinlə T.İsmayılovun qardaşının şərikli ticarət kompleksi olub. Sonradan şərikli biznes satılıb və 10 milyon dollar gəlir əldə olunub. Amma R.İsmayılov şərikinə çatmalı olan 5 milyon dolları verməyib. İstintaqa görə, R.İsmayılov pulu Savkinə verməmək üçün onu aradan götürmək qərarına gəlib. Bunun üçün əvvəllər məhkum olunmuş Mehman Kərimova Savkinin qətli sifariş olunub. Hadisə zamanı Savkin təsadüfən biznesmen tanışı ilə birlikdə olduğundan killer onu da öldürüb.

Rafiq İsmayılov

Qətldən az sonra R.İsmayılov saxlanılsa da, o zaman “əli hər yerə çatan” qardaşı Telman hüquq-mühafizə orqanlarındakı əlaqələri sayəsində onu həbsdən buraxdırıb. Savkinin oğlunun davamlı şikayətlərindən sonra isə məsələyə Rusiya İstintaq Komitəsinin rəhbəri Aleksandr Bastrıkin qarışıb və yeni müstəntiq işin üstünü bir neçə günə açıb. T.İsmayılovun vəkili o zaman iddia edirdi ki, azərbaycanlı killer istintaqla danışığa gedib və müdafiə etdiyi iş adamına şər atır.

T.İsmayılova ikinci ittiham “Lyublino motors” şirkətinin təsisçisi Yuri Brilyovun öldürülməsi faktı ilə bağlıdır. Vəkili “AST Telman”ın şərləndiyini desə də, qardaşları “satan” təkcə həbsdə olan killer deyildi.

T.İsmayılovun əleyhinə ifadə verənlərdən biri də onun 15 il köməkçisi işləmiş Sergey Qavryuşin idi. Bildirilirdi ki, Qavryuşin İsmayılov qardaşlarına “kölgələri” qədər yaxın olduğundan ondan heç nə gizlətməyiblər və qurduqları planlardan onun da xəbəri olub. Qavryuşinin indi də dövlətin qoruması altında olduğu deyilir.

Qavryuşindən əvvəl isə İsmayılovların əleyhinə daha bir yaxın adamı-Harri Boleçerkovski ifadə vermişdi. Boleçerkovskinin iddiasına görə, sifarişli qətllər məhz 2000-2016-cı illərdə İsmayılov qardaşlarının iştirakı ilə törədilib.

Daha bir sensasion məqam isə T.İsmayılovun qanunsuz silah satışında əli olması ilə bağlıdır. Bu barədə o zaman da, indi də əlavə bilgi verilmir. Əgər bu ittiham da “AST Telman”ın yenilənmiş istintaqında ortaya atılarsa, onu “silah baronu” kimi heç bir ölkə müdafiə edə bilməyəcək. İstisna etmək olmaz ki, sözügedən ittiham məhz onu istənilən ölkədə həbs etmək üçün ortaya atıla bilərdi...

Yada salaq ki, Abbas Abbasov 2006-cı ildə Azərbaycanda baş nazirin birinci müavini postundan uzaqlaşdırılandan sonra ona T.İsmayılov sahib çıxdı. Moskvaya gedən Abbas Abbasov üçün şirkətdə vitse-prezident postu boşaldıldı. A.Abbasov köhnə dostu ilə şirkətdə fəaliyyətə başladı. AST Şirkətlər Qrupunda işləməsindən məmnun olan A.Abbasov Telman İsmayılovun ən qatı müdafiəçilərindən biri kimi tanınırdı.

Orxan ƏLİYEV, 

Musavat.com