"Qazaxıstandakı son iğtişaşlar ölkəyə 100 milyon dollardan artıq ziyan vurub. Zərərin miqyası genişlənməkdədir. Qazaxıstan Daxili İşlər Nazirliyinin xəbərinə görə, artıq 2 mindən çox şəxs həbs edilib. Təhlükəsizlik qüvvələri arasında ölənlərin sayı 18-ə çatıb. Kollektiv Təhlükəsizlik Müqaviləsi Təşkilatı (KTMK) Qazaxıstana hərbi qüvvə göndərilməsini davam etdirir".
"AzPolitika.info" xəbər verir ki, bu sözləri iqtisadçı, deputat Vüqar Bayramov Qazaxıstanda baş verən hadisələri şərh edərkən deyib.
O, xatırladır ki, Qazaxıstan əksər iqtisadi göstəricilərə görə MDB-də ikinci yerdədir: "Belə ki, adam başına düşən ÜDM-nin həcminə görə Qazaxıstan Rusiyadan sonra ikincidir: illik 9 min dollar. Orta aylıq əmək haqqı məbləği 373 dollar olmaqla, Ukrayna ilə birlikdə şimal qonşumuzdan sonrakı yerləri bölüşürlər. Qazaxıstanda illik ixrac 66 milyard dollardır. Bu göstəriciyə görə sözügedən ölkə MDB-də ikinci olmaqla, dünyada ilk əlli ölkə sırasındadır".
V.Bayramovun sözlərinə görə, Qazaxıstandakı hadisələr birjalara da təsirsiz ötüşməyib. Deputat qeyd edib ki, qlobal bazarda uranın qiyməti təxminən 8 faiz bahalaşaraq bir funt üçün 45,25 dollara çatıb: "Qazaxıstan dünyadakı uran ehtiyatının təxminən 40 faizini istehsal edir. Bu arada, bitkoin də 47300 dollardan 41 400 dollaradək ucuzlaşıb. Bütün bunlar fonunda, son iğtişaşlardan Qazaxıstan iqtisadiyyatı itkisiz çıxmayacaq. Reallıq budur ki, Türk Dövlətləri Təşkilatının üzvü olan Qazaxıstan yeni mərhələyə qədəm qoyur. Ümid edirik ki, qardaş Qazaxıstan xalqı bu proseslərdən az itki ilə çıxa biləcək".
"AzPolitika.info"
Şərhlər
100 milyon ?