AMEA Riyaziyyat və Mexanika İnstitutunun direktor müavini, professor Soltan Əliyevə qarşı dələduzluqda ittiham olunan, məhkəmə proseslərindən yayınan şəxslər həbs edilib.
APA xəbər verir ki, dələduzluqda ittiham olunan Səadət Xəlilov, Qulu Muxtarov və Sahil Abuşovun cinayət işi üzrə məhkəmə icraatı bir müddət əvvəl dayandırılıb.
Buna səbəb ev dustaqlığında olan Q. Muxtarov və S. Abuşovun sonuncu məhkəmə iclaslarına gəlmədikləri üçün onların barəsində həbs qərarı verilməsi və icraat dayandırılmaqla axtarışa verilməsi olub.
Hazırda hər iki şəxs tutularaq istintaqa təhvil verilib və onlar barəsində olan cinayət işi yenidən Bakı Ağır Cinayətlər Məhkəməsinə göndərilib. Cinayət işi hakim Zeynal Ağayevin icraatında araşdırılacaq.
Qeyd edək ki, məhkəmənin gedişində məlum olub ki, "Bakı Metropoliteni"nin keçmiş rəisi Tağı Əhmədov yaxın dostu, professor Soltan Əliyev vasitəsilə Səadət Xəlilov, Qulu Muxtarov və Sahil Abuşova ümumilikdə 2 milyon manata yaxın pulu sələmə verib. Onlar mərmər biznesində böyük qazanc olduğunu deyərək T. Əhmədovu bu işə pul yatırmağa inandırıblar. T. Əhmədov isə pulları həmin şəxslərə verib. Daha sonra sələmi qaytara bilmədikləri üçün Soltan Əliyev onlardan şikayət edib. Cinayət işi üzrə zərərçəkmiş kimi də S .Əliyev tanınıb.
Sahil Abuşov isə əvvəlki məhkəmə iclaslarda onlara sələm verən şəxsin Tağı Əhmədov olduğunu təsdiqləyib: “Biz mərmər biznesi ilə məşğul olurduq. İşləri görmək üçün pulu Səadət müəllim verirdi, o da pulları Tağı Əhmədovdan sələmə götürürdü. Tağı müəllim ona aylıq 1,5-2 faizlə pul verirdi. Üç dəfə ondan pul götürmüşük. Pulları Yasamalda YAP-ın binasının yanında aldıq. Səadət və Soltan içəri girib pulları götürürdü, sonra çıxıb bizə verirdilər”.
Məhkəmə istintaqından qaçan digər şəxs Qulu Muxtarov isə vaxtilə Bakı Şəhər Baş Polis İdarəsində əməliyyat müvəkkili işləyib. Hüquq-mühafizə orqanlarından təqaüdə çıxdıqdan sonra Beynəlxalq Bankın sabiq rəhbəri Cahangir Hacıyevin mühafizəçisi olub.
O, ifadəsində Tağı Əhmədova 1 milyon dəyərində yaqut daşını girov verdiklərini deyib: “Daş dostumun idi. Səadət təklif elədi ki, daşı girov qoyub sələmə pul götürək. Arada mənim də xeyrim olacaqdı. Daşın pulunu isə bir müddət sonra alverdən gələn qazancdan verəcəkdilər. Daşa görə cəmi 350 min manat pul ödəyiblər”.
Şərhlər
Bu 2 mln dövlət quluqçusuTagı Əhmədov və bahalı ev, salonlar, restoran və s. maaş hesabına qazandı yoxsa bunlar başqa qeyri-qanuni yollarla, büdcə pulların mənimsəməsi nəticəsində yığılan pullardı bəs bunu niyə araştıran yoxdur
Sələmçilik məncə qanunla qadagandır. Belə olan halda nədən T.Əhmədovu da məsuliyyətə cəlb etmirlər? Burdan belə şübhə yaranır ki, əcaba sələmə verdiyi pullar Tagının imiş ya YAP-ın? Çünki Tagı pulları adətən evində yox YAP- ən qərərgahının yanında verirmiş. Nəsə burda bir müəmma var
Sabiq polis həbs olunub, məncə bu "çox yüngül" cəzadır, ona "ömürlük, güllələnmə, dar ağacından asılma" və bu kimi hökmlər çıxarılmalıydı. Tağı müəllimin, el arasında deyildiyi kimi metro Tağının zülüm-zillətlə 40 illik yığılmış, yemədən-içmədən topladığı, əmək haqqını basıb yeyiblər, belə cinayətin hökmü ağır olmalıydı, yox əgər Tağı Sadiq (ədəbi təxəllüsü belədir) yalan deyirsə, pulun mənbəyi barədə, onda onu da keçmiş polisə tətbiq olunan cəza ilə cəzalandırılmalıdır..."Svobodu Yuriyu Detoçkinu,.. Avtomobildən qorun filmindən"...