Bakı İstintaq Təcridxanasında saxlanan hüquq müdafiəçisi İntiqam Əliyev ailəsi ilə görüşüb.
İntiqam Əliyevin oğlu Nəcmin Əliyev “Media forum” saytına bildirib ki, atası ilə oktyabrın 31-də görüşüblər: “Kamerada hərəkətsiz qalması atamın səhhətində ciddi problemlər yaradıb. Oktyabrın 24-də aparılan müayinədən sonra məlum olub ki, atamın boyun nahiyəsində osteoxondroz (duzlaşma), belində isə protuziya (yırtıq) var. Hazırda təcridxanada müalicə alır. Həftənin sonunda yenidən görüşəcəyik”.
İntiqam Əliyevin səhhəti oktyabrın 24-də keçirilən məhkəmə prosesində kəskinləşmiş və istintaq orqanı onu həmin gün müayinə üçün Onkoloji Mərkəzə aparmışdı.
İntiqam Əliyev avqustun 8-dən həbsdədir. O, Cinayət Məcəlləsinin 213.1-ci (vergidən yayınma), 308.2-ci (vəzifə səlahiyyətlərindən sui-istifadə etmə) və 192.2-ci (qanunsuz sahibkarlıq) maddələri ilə təqsirləndirilir.
İntiqam Əliyev Hüquq Maarifçiliyi Cəmiyyətinin rəhbəridir. 20 ildən çoxdur vəkillik fəaliyyəti ilə məşğul olur. Əsasən insan hüquqlarının müdafiəsi sahəsində ixtisaslaşıb.
Şərhlər