Dövlətimizin adı Şimali Azərbaycan olsunmu? - “Bu adı biz verməmişik...”

Milli Məclisin son plenar iclasında çıxış edən deputat, BAXCP sədri Qüdrət Həsənquliyev ölkə olaraq Azərbaycanın adının dəyişdirilməsini təklif edib.

“Ölkəmizdə konstitusiya hazırlanmalı və referendum qəbul olunmalıdır. İlk olaraq ölkəmizin adını dəyişdirməliyik. Ölkəmizin adı Şimali Azərbaycan olmalıdır. Bütün dünya bilməlidir ki, 200 il əvvəl Azərbaycan torpaqları İran rejimi tərəfindən işğal olunub. Necə ki, dünyada Şimali Koreya və Cənubi Koreya var, bizdə də belə olsun. Azərbaycan 200 il əvvəl iki imperiya tərəfindən bölünüb. Bu addım həm də Cənubi Azərbaycanlılar üçün stimul olar”, - deputat bildirib.

Qeyd edək ki, Milli Məclisdə səsləndirilən bu təklif sosial şəbəkələrdə də maraqla qarşılanıb və müzakirələrə səbəb olub. Sosial şəbəkə istifadəçilərinin bir qismi deputatın bu çıxışını dəstəkləsələr də, təklifin əleyhinə çıxanlar da var.

Bu mövzuyla bağlı sabiq Təhsil naziri, professor Firudin Cəlilov “AzPolitika.info”-ya şərhində qeyd edib ki, 1990-cı ildə Məhəmməd Əmin Rəsulzadə və onun komandasının qurduğu dövlət yenidən bərpa edilib və 30 ildən çoxdur ki, həmin adla da müstəqil şəkildə varlığını sürdürür: “Bu adı biz verməmişik. Bunu 100 il öncə Məhəmməd Əmin Rəsulzadə verib. Dilimizdə milli mənşəli - quzey, güney, batı və doğu adları var. Mən burada Qüdrət bəyi nəzərdə tutmuram. Amma bir müddət əvvəl də belə bir təklif verilmişdi ki, “gəlin himnimizi dəyişək”. Axı, bu himni sən yaratmısan ki, sən də dəyişirsən? Bu dövləti vaxtilə Məhəmməd Əmin Rəsulzadə və onun ətrafındakılar yaradıb, himnimizin musiqisini Üzeyir Hacıbəyov yazıb, sözləri milli şairimiz Əhməd Cavada aiddir. Sənin nə ixtiyarın var bunları dəyişməyə?”,-deyə professor bildirib.

Tarix üzrə fəlsəfə doktoru, dosent, AMEA-nın Qafqazşünaslıq İnstitutunun Qafqaz siyasəti şöbəsinin rəhbəri Elnur Kəlbizadə isə “AzPolitika.info”-ya şərhində bildirib ki, Şimali və Cənubi Azərbaycan anlayışları XIX əsrdə meydana gəlib: “Bu adlar Azərbaycan coğrafiyasının XIX əsrdə iki imperiya - Romanovların idarə etdikləri Rusiya və Qacarlar imperiyası arasında bölüşdürülməsi nəticəsində ortaya çıxıb. İndiki məqamda belə bir ideyanın ortaya atılması xalqımızın tarixən qəlbində yaşatdığı milli ideallara dəstək kimi özünü göstərir. Lakin mən hesab etmirəm ki, Azərbaycan Respublikasının Şimali Azərbaycan adlandırılması nəyisə dəyişəcək. Bu, sadəcə ədəbi romantik səviyyədə cəlbedici görünə bilər. Azərbaycan adlanan bir coğrafi məkan var. Onun şimalında müstəqil və azad olan Azərbaycan Respublikası yerləşir. Hesab edirəm ki, bu məsələyə dəqiq qiymət vermək üçün, Xalq Cümhuriyyəti dövründə ölkəmizin beynəlxalq səviyyədə məhz Azərbaycan Cümhuriyyəti adlandırılması ilə bağlı mübarizəyə diqqət yetirmək kifayət edir”.

E. Bəyməmmədli

“AzPolitika.info”