Türkiyədəki zəlzələnin iqtisadi nəticələri ilə yanaşı qonşu ölkələrlə ticari dövriyyəsinə təsirləri də xüsusi müzakirə olunur.
Xatırladaq ki, Türkiyə Azərbaycanın strateji müttəfiqi olmaqla yanaşı xarici ticarətdə ikinci ən böyük tərəfdaşıdır. 2022-ci ildə iki ölkə arasındakı ticarət dövriyyəsi 6 milyard dollara yaxınlaşıb. 2021-ci ildə ölkələr arasındakı ticarət dövriyyəsi 4 milyard 661 milyon dollar olmuşdu. Ötən ilin 11 ayında Türkiyəyə 3 milyard 323 milyon dollarlıq ixrac etmişik, qardaş ölkədən isə 1 milyard 48 milyon dollarlıq idxalımız olub.
Belə olan halda zəlzələnin nəticələri Azərbaycan Türkiyə iqtisadi əlaqələrinə necə göstərəcək?
İqtisadçı deputat Vüqar Bayramov qardaş Türkiyənin ölkəmizin qeyri-neft ixracatında ikinci əsas tərəfdaşı olduğunu xatırladır. Onun sözlərinə görə, 3 milyard dollarlıq enerjidən kənar ixacatımızın təxminin 1/3-i Türkiyənin payına düşür. “Son illər qardaş ölkəyə ixrac etdiyimiz qeyri-neft məhsullarının dəyərində artım qeydə alınır. Bununla yanaşı, hələ də Türkiyə ilə ticarət dövriyyəmizdə enerji məhsulları əsas paya malik olmaqdadır. Xüsusən də qardaş ölkəyə mavi qaz ixracatında artımlar qeydə alınır”, - o əlvə edib.
İqtisadçı hesab edir ki, “Əsrin fəlakətinin” coğrafiyasını və Türkiyəyə ixracatımızın strukturuna diqqət yetirsək, deyə bilərik ki, zəlzələ iki ölkə arasındakı iqtisadi əlaqələrə xüsusi neqativ təsir göstərməyəcək: “2023-cü ildə də ölkələr arasındakı enerji əməkdaşlığının güclənəcəyi gözlənilir. Qeyri-neft sahəsindəki əməkdaşlıq da bu il davam etdiriləcək. Bu baxımdan, enerji məhsullarının qiymətlərində düşüşlər olmazsa, Azərbaycanla Türkiyə arasındakı ticarət dövriyyəsində hər hansı ciddi azalma gözlənilmir”.
Rasim Əliyev
“AzPolitika.info”
Şərhlər