Bakıda, Xəzər dənizinin sahilində, mənzərəli dəniz qəsəbəsi olan “Sea Breeze Resort”un ərazisindəki “Nine Senses” incəsənət mərkəzində yerləşən “Vida Cafe” restoranında Heydər Əliyev Fondunun vitse-prezidenti, rəssam və şair Leyla Əliyeva və baş aşpaz Metin Kadıkın “Şirin, amma şəkərsiz” adlı birgə kitabının təqdimatı olub.
Kitab kağız və elektron versiyada olmaqla dörd dildə - Azərbaycan, rus, ingilis və türk dillərində nəşr olunub.
Bütün insanların, o cümlədən özlərinin sağlamlığının qayğısına qalan müəlliflər sağlam inqrediyentlərə əsaslanan və təbii dadlandırıcıların istifadə olunduğu reseptlər təklif edirlər. Elə reseptlər ki, çox vaxt yalnız peşəkar kulinariya mütəxəssislərinə məlumdur.
Media.Az Türkiyə, Dubay və Banqkokdakı restoranların mətbəxlərinə rəhbərlik edən, tanınmış aşpaz Metin Kadıkdan müsahibə alıb. Hazırda o, Azərbaycanda yaşayır və işləyir, “Vida Cafe Baku” restoranında baş aşpaz kimi fəaliyyət göstərir.
- Metin bəy, nə qədər müddətdir Bakıda çalışırsınız?
- Son iki ildir. Bütün bu müddət ərzində mən sağlam yeməklərin hazırlanması üzrə ixtisaslaşıram. Çox zəngin milli mətbəxin olduğu Azərbaycanda buna nail olmaq asan deyil. Lakin mövsümi meyvə və tərəvəzlərin böyük çeşidi sayəsində biz bununla bağlı nəticə əldə edə bilirik. Ona görə də hazırladığım yeməklərdə məhz mövsümi məhsullardan istifadə etməyə, mümkün qədər emal olunmuş qidalardan uzaq durmağa çalışıram.
- Leyla Əliyeva ilə tanışlığınız necə olub?
- Leyla xanımla məni bir araya gətirən məhz düzgün qidalanma mövzusu oldu. Sağlam və balanslaşdırılmış qidalanma onunla daim müzakirə etdiyimiz mövzulardır. Sağlam qidalanmağa həsr olunmuş kitab ərsəyə gətirmək ideyası da belə yarandı.
Biz istədik ki, hər kəs üçün əlçatan olan reseptləri paylaşaq, həmçinin yeməklərin hazırlanması üçün istifadə olunan inqrediyentləri tapmaq asan olsun və hər kəs onları öz evində bişirə bilsin.
Mən bu restoranın baş aşpazı kimi hər bir yeməyə xüsusi qayğı və diqqətlə yanaşmağa, boşqabda sənət əsəri yaratmağa çalışıram.
- Leyla xanımın ən çox sevdiyi yeməklər barədə danışa bilərsinizmi?
- Leyla xanım sağlam və balanslaşdırılmış qidalanmaya böyük diqqət yetirir. Onun sevdiyi yeməklərdən danışsaq, bunlar mövsümi meyvə-tərəvəzlər əsasında hazırlanan yeməklərdir.
- Bəs şirniyyat necə?
- Leyla xanım da hamı kimi, şirniyyatı çox sevir, lakin şəkərsiz desertlərə üstünlük verir. Onun ən çox sevdiyi şirniyyata gəlincə, bu, yəqin ki, veqanlar üçün brauni və avokado tartaletləridir.
- Bəs öz sevimli yeməkləriniz barədə nə deyə bilərsiniz? Milli mətbəximizdən nələrə üstünlük verirsiniz?
- Mən düşbərəni, turşuları və müxtəlif plov növlərini sevirəm. Həmçinin Türkiyədə vərdiş etdiyim yeməklərin bir az fərqli də olsa, Azərbaycanda hazırlandığını görmək mənə çox xoşdur.
Şərhlər
Bir ara suşi moda düşdü,bilən bilməyən getdi yedi,əgər ona yemək demək mümkündüsə,camaat dedi ki əşi bu balığı adam kimi qızardıb yemək olmurmu yəni?Guya yeməyin gözəlliyi adının əndrəbadiliyindədirmi?Qadasın alım dolmanın,ləvənginin,pitinin,döşəməli aşın,adə təkə qovurmasının,quyruq kababının tilli stəkannan alça arağıynan şırhaşır axan çaylar böyründə,həyatdu ee mən ölüm.Nədəəbu?Biz nə qədər Avropaya bənzəməyə çalışsaq bənzəyən deyilik vallah,daha pisi də odur ki Avropalılar bənzəməyi sevmədikləri üçün bənzəmək istəyənləri sevmirlər,oralarda hər kəs öz həyatını yaşayar,kimsə kimsənin həyatına,geyiminə,yeməyinə-içməyinə qarışmaz.Elə bənzəmək istədik deyə Avroviziyada 15 komanda içindən seçiləmmədik də. Nədi o,mahnıdırmı?Biz özümüzə təsəlli vermək üçün tərifləməklədirmi yəni?Nigarın,Safuranın,Ayselin mahnıları,performansları hara,bu hara?Onlar da ingiliscə oxumuşdular,amma oxuduqları da özləri kimi gözəl idi,bu gün də sevə-sevə dinlənilir.Çünki hər şeydən başqa onlar özləri idilər və Azərbaycandan getdikləri bəlli idi.O gün isə deməsəydilər bu duet Azərbaycandandır,elə bilərdim San-Fransiskodan,Puerto -Rikodan,İohannesburqdan,nə bilim,Reykyavikdən-zaddan olan müğənnilərdi.İmicmeykerlər bunları mütləq Liverpullu dördlüyə ---Bittlz-a bənzətməliymişlər sanki.Mahnıdakı o kvartetin mahnılarına bənzər notlarla yanaşı əllərində gitara da olmalıymış ki oxşasınlar.Elə isə duet yox kvartet olmalıydı ki, Bittlzdan çox “Elektronikin macəraları”ndakı əkiz qardaşları xatırlatmasınlar.Yau kardeşim,süni tərifləməyək bir-birimizi,inkişaf yalnız tənqidin olduğu yerdə olur.Arzu edək ki,gələn ilki yarışmada Safura kimi,Nigar kimi,Aysel kimi özümüz olaq,ingiliscə oxusaq da.Yəni heç kəsə bənzəməyə çalışmayaq.Yeməklərimiz də sırf milli olsun.
Mən kasıb olduğumu bilirdim,amma indi dərk etdim ki,doğrudan da kasıbammış.Çünki başlığı oxuyanda gördüm ki,kasıblıq məni cəmiyyətin yüksəlişindən o qədər geri salıb ki,Azərbaycan dilinin inkişafından da geri qalmışam.A balam,veqan,brauni,tartalet,avokado-filan nə deməkdir?Bir cümlədə 5 kəlmə var,yalnız “üçün” Azərbaycancadı deyə dədə-babadan,onu anlaya bildim.Bir də “və” bağlayıcısı.Bu yeməkləri yeməzdən əvvəl gərək Azərbaycan dili repetitorunun yanına gedim azı bir il.