“Ötən ilin martında Rusiya Prezidenti Vladimir Putin Ukrayna hakimiyyəti ilə Krımın statusu ilə bağlı danışıqlara razılıq verib”.
“AzPolitika.info” xəbər verir ki, bunu Belarus lideri Aleksandr Lukaşenko “Rossiya 1” telekanalının aparıcısı Olqa Skabeyevaya müsahibəsində bildirib.
Lukaşenkonun sözlərinə görə, Putin Ukrayna ilə müttəfiq ölkələrin nümayəndə heyətləri tərəfindən razılaşdırılmış sülh müqaviləsi layihəsini şəxsən ona təqdim edib. Lukaşenko deyib ki, sənəddə ilhaq edilmiş Krımın "uzunmüddətli icarəsi" yazılıb və Donbasın statusu məsələsinin Rusiya və Ukrayna rəhbərlərinin Türkiyədə şəxsi görüşü zamanı müzakirə edilməsi təklif edilib.
"Rusiya bu sənədi indi açıqlaması çılğınlıq olardı. Bu, Rusiya üçün tamamilə sərfəli deyildi. Lakin Rusiya rəhbəri razılaşdı", - Lukaşenko deyir.
Bundan əvvəl Ukrayna Prezidenti Aparatının keçmiş müşaviri Oleksiy Arestoviç sülh müqaviləsi layihəsinin mövcudluğundan danışıb. Onun sözlərinə görə, 2022-ci ilin yazında Rusiya ordusunun ilk ağır itkilərindən sonra Rusiya müharibə başlamazdan əvvəl irəli sürdüyü demək olar ki, bütün tələblərindən, o cümlədən Krım və Donbasa nəzarətdən imtina edib.
Geridə qalan tələblər arasında Ukrayna silahlı qüvvələrinin sayının 50 min nəfərə qədər azaldılması, Ukraynanın blokdan kənar statusu və rus dilinə ikinci dövlət dili statusunun verilməsi də var idi.
Aretoviçin sözlərinə görə, ölkələrin danışıqlar qrupları hətta Putin və Zelenski arasında şəxsi görüş barədə razılığa gəliblər, lakin son anda Ukrayna Prezidenti Rusiya rəhbəri ilə hər hansı danışıqlardan imtina edib. Prezident Aparatının keçmiş müşavirinin sözlərinə görə, səbəb Ukraynanın Buça şəhərində baş vermiş qətliamdır.
Xatırladaq ki, bu şəhər ukraynalı hərbçilər tərəfindən azad edildikdən sonra orada Rusiyanın işğalı zamanı öldürülmüş yüzlərlə mülki şəxsin cəsədi tapılıb.
Rusiyanın fevral ayında Ukraynaya hücumundan sonra Rusiya və Ukrayna nümayəndə heyətləri ilk həftələrdə Belarus və Türkiyədə danışıqlar aparırdılar. Daha sonra İstanbulda keçirilən görüşdə onların Ukraynanın təhlükəsizlik zəmanəti müqabilində NATO-ya üzv olmaqdan imtina etməsi və Krımın statusu ilə bağlı qərarın təxirə salınacağını bildirən sənəd üzərində razılaşdıqları bildirilib. Ancaq daha sonra görüşlər dayandırıldı və sənəd imzalanmadı.
Çərşənbə günü axşam Rusiya Prezidentinin mətbuat katibi Dmitri Peskov Aleksandr Lukaşenkonun Rusiyanın Krımın Ukrayna ilə icarəyə verilməsi məsələsini müzakirə etməyə hazır olması ilə bağlı iddiasını rədd edib.
"Xeyr, belə deyil. Krım Rusiya Federasiyasının ayrılmaz hissəsidir, Rusiyanın bölgəsidir", - Peskov bildirib.
“Azpolitika.info”
Şərhlər