“ABŞ rəsmiləri İsrailə “Hizbullah”la münaqişəyə girməmək barədə xəbərdarlıq ediblər. Bayden administrasiyası İsrailin iki cəbhədə müharibə aparmaqda çətinlik çəkəcəyini, həmçinin bu halda həm ABŞ, həm də İranın müharibəyə qoşula biləcəyini düşünür”.

“AzPolitika.info” xəbər verir ki, bu barədə ABŞ-ın “The New York Times” qəzetində yayımlanan məqalədə bildirilir.

Nəşrin məlumatına görə, HƏMAS-a qarşı başlayan müharibədə ABŞ rəsmilərinin əsas narahatlığı “Hizbullah”la bağlıdır.

ABŞ-ın “Hizbullah”ı cilovlamağa çalışdığını bildirən qəzet, amerikalı diplomatların Yaxın Şərqdə bir çox görüşlərində ərəb həmkarları ilə bu mövzuda danışdıqlarını və İsrail-“Hizbullah” müharibəsinin qarşısını almaq üçün onlardan dəstək istədiklərini qeyd edir.

ABŞ mediasındakı bir çox mənbələrin məlumatına görə, İsrailin müdafiə naziri Yoav Qallant “Hizbullah”ın HƏMAS-dan daha böyük təhlükə olduğu fikrindədir və bu səbəbdən ilk zərbənin İsrail tərəfindən endirilməli olduğunu düşünür. Məsələ ilə bağlı məlumatlı mənbə bildirib ki, Qallant bu təklifi ABŞ dövlət katibi Antoni Bilinkenlə görüşdə dilə gətirib, lakin “Hizbullah”a hücum təklifi digər rəsmilər tərəfindən rədd edilib.

Mənbələr həmçinin bildirirlər ki, ABŞ Prezidenti CO Bayden Qallant da daxil olmaqla İsrailin digər rəsmiləri ilə görüşüb və “Hizbullah”la genişmiqyaslı münaqişənin İsrail üçün hansı nəticələrə səbəb olacağıyla bağlı xəbərdarlıq edib.

“AzPolitika.info”