Ukrayna ABŞ ilə birlikdə Ukraynanın hava hücumundan müdafiəsini əhəmiyyətli dərəcədə gücləndirəcək sürətli “hibrid həllər” üçün beş layihə hazırlayıb.
«AzPolitika.info» «Ukrainskaya Pravda»ya istinadla xəbər verir ki, bu barədə Ukraynanın strateji sənaye naziri Aleksandr Kamışin mətbuat konfransında bildirib.
"Belə həllərin əsas üstünlüyü sürətdir. Yeni hava hücumundan müdafiə sisteminin yaradılması 3-4 il çəkir. Biz isə artıq hazır məhsul alırıq. Qısa, orta və hətta uzunmüddətli müxtəlif layihələr var. Biz tərəfdaşlarımızla rəqabət aparmaq istəmirik, əksinə, onların əvvəllər daxil ola bilmədiyi yeni bazar yaradırıq. Biz hava hücumundan müdafiə sahəsində sürətli artım əldə edirik və onlar öz sistemlərini yeni bazarlara inteqrasiya etmək imkanı əldə edirlər”, - deyə nazir bildirib.
Nazirin sözlərinə görə, ümumi «FrankenSAM» brendi altında həyata keçirilən bütün layihələrin mahiyyəti Qərbin hava hücumundan müdafiə sistemlərinin hissələrinin Ukrayna Silahlı Qüvvələrində xidmətdə olan köhnə sovet sistemlərinə inteqrasiyasından ibarətdir. Elə layihələr var ki, orada Amerika raketləri olan konteynerlər sadəcə olaraq köhnə sovet buraxılış qurğularına yerləşdirilir və bütün Amerika buraxılış qurğularının S-300 tipli ümumi hava hücumundan müdafiə kompleksinə inteqrasiya olunduğu həllər var.
Nazir qeyd edib ki, ilk komplekslər artıq Ukraynada fəaliyyət göstərir, növbəti komplekslər hər ay gələcək və hava hücumundan müdafiəni gücləndirəcək.
Dekabrın əvvəlində Ağ Ev elan etdi ki, Ukrayna və ABŞ Ukrayna Silahlı Qüvvələrinin təcili əməliyyat ehtiyaclarını ödəməyə yönəldilmiş niyyət bəyanatı imzalayıblar. Bu bəyanat hava hücumundan müdafiə sistemlərinin təkmilləşdirilməsi ilə bağlı əməkdaşlıq, təmir, texniki xidmət və kritik döyüş sursatlarının istehsalını nəzərdə tutur. Xüsusilə, Pentaqon «FrankenSAM» hibrid hava hücumundan müdafiə sistemlərinin istehsalına başlamaq üçün Ukraynaya texnoloji məlumatlar təqdim edib. Bu, Ukraynanın mövcud hava hücumundan müdafiə sistemlərinin, o cümlədən sovet istehsalı olan sistemlərin modernləşdirilməsinə və müəyyən Qərb sursatları ilə inteqrasiyasına imkan verəcək.
Rüfət
AzPolitika.info
Şərhlər