“TAKSİ SÜRÜCÜLƏRİ QORXMASINLAR...” – Cəriməyə səbəb olacaq sistem hələ işə düşməyib

"Dünəndən yayılan məlumatların əksinə olaraq, 1 yanvardan taksi sürücülərinə heç bir yeni cərimə yazılmayacaq".

"AzPolitika.info" xəbər verir ki, bu barədə nəqliyyat sahəsi üzrə ekspert, hüquqşünas Ərşad Hüseynov bildirib.

"Səbəbi də çox sadədir. Taksi fəaliyyətində müxtəlif qanun pozuntularına görə yeni cərimələr formal olaraq bu gündən qüvvəyə minsə də, tətbiq edilə bilməyəcək. Ona görə ki, taksi fəaliyyəti üçün yeni icazə sistemi hələ işə düşməyib. AYNA yeni sistemi tam işə salmalıdır, bu fəaliyyət üçün buraxılış vərəqələri və buraxılış kartları verilməlidir. Yalnız ondan sonra bu vərəqə və kartı almadan fəaliyyət göstərənlərə cərimə yazılması mümkün ola bilər, - ekspert əlavə edib.

Hüquqşünas qeyd edib ki, hələlik heç kimə buraxılış vərəqəsi və buraxılış kartı verilməyib və verilmir. Onun sözlərinə görə, hətta bu vərəqə və kartın verilməsinin bütün şərtləri hələ tam hazır deyil. "Onların verilmə proseduru da tam müəyyən edilməyib. Yəqin ki, xüsusi elektron portal üzərindən rəsmiləşdirmə həyata keçiriləcək", - o vurğulayıb.

Ekspet bildirib ki, qeyd etdiyi məsələlərə tam aydınıq gətirilib, texniki məsələlər də həll edilənədək heç kimə yeni cərimələr yazıla bilməz və yazılmayacaq.

Ə.Hüseynov vurğulayıb ki, taksi sürücüsü üçün 2000 manatlıq cərimə ümumiyyətlə mövcud deyil: "Belə böyük məbləğli cərimələr yalnız taksi sifarişi operatorları və taksi şirkətləri barəsindədir. Taksi sürücüsü barəsində buraxılış kartı olmadan bu işlə məşğul olmağa görə cəmi 50 manat cərimə nəzərdə tutulur. Eyni sürücü bunu il ərzində təkrar törətdikdə isə 80 manat cərimə var. Taksi sürücüsünə bundan artıq cərimə nəzərdə tutulmur.

Digər tərəfdən, hələlik bu yeni cərimələri tətbiq edəcək dövlət orqanı da müəyyən edilməyib. Bu barədə Prezidentin fərmanı ilə İXM-in tətbiqi barədə fərmana dəyişiklik olmalıdır. Həmin dəyişiklik də yoxdur.

Ən əsası, hələlik bu cərimələrin heç biri tətbiq edilə bilməyəcək. Taksi fəaliyyəti ilə məşğul olanlar qorxmasınlar. Lakin işin gedişini izləsinlər və sistem işə düşəndə sənədlərini qaydasına salsınlar".

Rasim Əliyev

"AzPolitika.info"

Qeyd: Məqalə Azərbaycan Respublikası Medianın İnkişafı Agentliyinin maliyyə dəstəyi ilə və müsabiqə şərtlərinə uyğun olaraq “İnsan hüquq və azadlıqlarının müdafiəsi, vətəndaşların hüquqi, siyasi, mədəniyyət səviyyəsinin yüksəldilməsi, sosial və siyasi fəallığının artırılması” mövzusunda hazırlanmışdır.