Rusiya Mərkəzi Seçki Komissiyası prezidentliyə namizəd Boris Nadejdinin imzalarında 15%-dən çox qüsur aşkar edib. Qeydə alınmada isə 5%-dən çox qüsura icazə verilmir.
"Komissiyanın iclası başa çatıb, sənədlər götürülüb. 15,348% qüsurlu imza var, qarşıda isə bizi 2 yuxusuz gecə gözləyir”.
“AzPolitika.info” Rusiya mətbuatına istinadla xəbər verir ki, Nadejdinin seçki qərargahının nümayəndəsi İqor Artemyev “Teleqram”da yazıb.
Prosedura görə, üç mərhələli yoxlamadan sonra şübhəli imzaların sayı 5%-dən çoxu olmamalıdır. Əks halda, Mərkəzi Seçki Komissiyası namizədi qeydə almır və o, prezidentlik uğrunda mübarizədən kənarlaşır.
"Biz imzaları yoxlamağı planlaşdırırıq. Etibarsız hesab edilən 9209 imzadan sadəcə 4500-ə yaxınını silməliyik. Əgər Mərkəzi Seçki Komissiyası məni qeydə almaqdan imtina edərsə, qərardan Ali Məhkəməyə şikayət edəcəyəm", - Nadejdin yazıb. Qeydiyyat iclası fevralın 7-də MSK-da keçiriləcək.
Nadejdinin qərargahının mətbuat katibi Pavel Burlakov xatırladıb ki, bütün dünya onların vicdanla imza topladığını görüb. Qeyd edək ki, Rusiya şəhərlərindəki imzatoplama məntəqələrində Nadejdini dəstəkləmək istəyənlərin uzun növbələri yaranmışdı.
Ötən həftə Mərkəzi Seçki Komissiyasının sədr müavini Nikolay Bulaev Boris Nadejdin və Sergey Malinkoviçin problemli imzalarına eyham vurub. "Artıq bu dünyada olmayan, lakin imza verən onlarla insanı görəndə, imza toplayanların etik standartları ilə bağlı sual yaranır. Müəyyən dərəcədə namizədin bu işdə əli var", - Bulaev Mərkəzi Seçki Komissiyasının iclasında deyib. O, hansı namizədə verilən imzaları nəzərdə tutduğunu dəqiqləşdirməyib.
Nadejdin Bulayevin sözlərini belə şərh edib: "Sən və mən bütün canlılardan daha canlıyıq. Əgər kimsə mənə verilən imzalarda ölü canları görürsə, onlara xatırladıram ki, bu barədə suallar əslində mənə aid deyil”.
Nadejdin açıq şəkildə Ukraynada müharibənin dayandırılmasına çağıran və Rusiyanın hazırkı Prezidenti Vladimir Putinin siyasətinin əleyhinə çıxış edən yeganə namizəddir.
Mərkəzi Seçki Komissiyası artıq dördüncü namizədi, o cümlədən beşinci dəfə prezident olmaq üzrə olan Putini qeydə alıb. Putin özü özünün namizədliyini irəli sürüb. Qeydiyyatdan keçmək üçün o, ən azı 300 min imza təqdim etməli idi. Mərkəzi Seçki Komissiyası onlarda 0,15% qüsur aşkar edib.
Rusiyada prezident seçkilərində səsvermə 2024-cü il martın 15-dən 17-dək keçiriləcək. Müstəqil müşahidəçilər və ekspertlər Rusiyada keçirilən seçkiləri azad və ədalətsiz kimi qiymətləndirirlər. Hakimiyyət seçki prosesinə müdaxilə edir, iqtidaryönlü namizədlərə üstünlüklər yaradır, bəzi hallarda isə birbaşa saxtakarlığa yol verilir.
“AzPolitika.info”
Şərhlər