Avropa İttifaqı ölkələrinin daimi nümayəndələri Rusiyaya qarşı 13-cü sanksiyalar paketi ilə bağlı razılığa gəliblər. Yeni məhdudiyyətlərin Rusiya qoşunlarının Ukrayna ərazisinə daxil olmasının ildönümündə - fevralın 24-də təsdiq edilməsi planlaşdırılır.
“AzPolitika.info” Qərb mediasına istinadla xəbər verir ki, yeni sanksiya siyahısına 200-ə yaxın hüquqi və fiziki şəxs daxil ediləcək. Bununla belə, 13-cü sanksiyalar paketində sektoral tədbirlər olmayacaq. Yeni məhdudiyyətlər siyahısı Rusiyaya qarşı indiyə qədər tətbiq edilən sanksiyalardan biri olacaq.
Avropa Komissiyasının rəhbəri Ursula fon der Leyen bildirib ki, yeni sanksiyalar paketi Rusiyanın pilotsuz təyyarələrə çıxışını məhdudlaşdıracaq və Avropa İttifaqı “Putinin döyüş maşını”nı zəiflətməyə davam etməlidir.
İndiyə qədər Avropa İttifaqı Rusiya ilə ticarəti və Rusiya siyasi elitasının fəaliyyətini məhdudlaşdıran on iki sanksiya paketi təqdim edib. Avropa İttifaqı hesab edir ki, sanksiyalar Rusiya ordusunu və onun təchizatçılarını Ukraynanın suveren ərazisində müharibə aparmaq üçün lazım olan mal və avadanlıqlardan məhrum edir.
Rusiyaya qarşı sanksiyalar 2022-ci ilin fevralında Ukraynaya genişmiqyaslı hərbi müdaxiləsinə cavab olaraq qəbul edilib. Rusiya Ukraynanın Donetsk, Xerson, Luqansk və Zaporojye vilayətlərinin ərazilərini ilhaq etdiyini elan etdikdən sonra məhdudiyyətlər genişləndirilib.
Bundan əvvəl Avropa İttifaqı Rusiyanın Ukrayna ərazilərini ilhaq etməsindən sonra genişləndirdiyi sanksiyaları 2025-ci il fevralın 24-dək uzadıb.
Rasim Əliyev
“AzPolitika.info”
Şərhlər