“İspaniyanın kəşfiyyat xidmətləri “Mİ-8” helikopteri ilə Ukraynaya qaçan keçmiş rusiyalı hərbi pilot Maksim Kuzminovun qətlinin arxasında Moskvanın dayandığına şübhə etmir”.
“AzPolitika.info” xəbər verir ki, bu barədə İspaniyanın “El Pais” qəzeti özəl mənbələrə istinadla məlumat yayıb. Qəzet İspaniya hakimiyyətinin baş verənlərlə bağlı hələ də son dərəcə ehtiyatlı olduğunu və Kremlə qarşı ittihamlar səsləndirmədiyini vurğulayaraq, əvvəlcə istintaqın tamamlanmalı olduğuna işarə edir. Mənbələrin sözlərinə görə, Madrid Rusiyanın qətldə iştirakı ilə bağlı kifayət qədər sübutlar toplanarsa, ona qətiyyətli cavab verməyə hazırdır.
Kuzminovun cəsədi fevralın 13-də İspaniyanın cənub-şərq sahilindəki Alikante əyalətinin Villajoyos şəhərində kommunal qarajın girişində tapılıb. O, şəxsi avtomobilində güllələnib. Hadisəni törədən şəxslər hadisə yerindən qaçıblar. Öldürülən şəxsin üzərində “İqor Şevçenko” adına Ukrayna pasportu tapılıb. İspaniya rəsmiləri öldürülən şəxsin kimliyini rəsmən təsdiqləməyib, lakin Alikante polisindəki mənbələr onun Kuzminov olduğunu təsdiqləyib. Onun ölümünü Ukraynanın Baş Kəşfiyyat İdarəsi və dolayısı ilə Rusiya hakimiyyəti də təsdiqləyib. Rusiya Xarici Kəşfiyyat Xidmətinin rəhbəri Sergey Narışkin Kuzminovu “mənəvi meyit” adlandırıb, Təhlükəsizlik Şurasının sədr müavini Dmitri Medvedev isə keçmiş pilotun ölümü ilə bağlı suala cavab olaraq “İtin ölümü” deyib.
“El Pais” Rusiyayönlü mənbələrin Kuzminovun ölümünü ilk xəbər verdiyinə diqqət çəkir. “Moskva onun qətlini nümayiş etdirmək üçün onu ictimaiyyətə açıqladı, yəni bu, digər mümkün fərarilərə xəbərdarlıq ola bilər”, nəşr yazır. Qəzet qeyd edir ki, qətl həm də qaçış planından xəbəri olmayan və helikopter Ukraynaya endikdən sonra öldürülən iki rusiyalı pilotun qisası da ola bilər.
İspaniya kəşfiyyat xidmətləri Rusiyanın iştirakına şübhə etmir və yalnız Rusiya kəşfiyyat xidmətlərindən qətlin hansı - SVR, FSB və ya Baş Qərargahın Hərbi Kəşfiyyat Baş İdarəsi (GRU) tərəfindən törədildiyindən əmin deyillər. Eyni zamanda, İspaniyanın xüsusi xidmət orqanlarındakı mənbələr etiraf edirlər ki, istintaq üçün Rusiyanın iştirakına dair birbaşa sübut tapmaq çox çətin olacaq. Çünki, böyük ehtimalla, cinayət İspaniyanı artıq tərk etmiş muzdlu qatillər tərəfindən törədilib. Mənbələr İspaniyada yerləşən rus agentlərinin cinayətdə birbaşa iştirakına inanmırlar və muzdlu qatillər versiyasına meyllidirlər.
Qəzet həmçinin qeyd edir ki, Kuzminov İspaniyada saxta sənədlərlə yaşayıb və ölkə hakimiyyətinin keçmiş rusiyalı hərbçinin İspaniyada olması ilə bağlı heç bir təsəvvürü olmayıb və buna görə də ona mühafizə verilməyib. Nəşr həmçinin iddia edir ki, Kuzminov Rusiyada qalan keçmiş sevgilisi ilə yazışmalarına görə "müəyyən edilə bilərdi", çünki onu İspaniyaya dəvət etmişdi.
Nəşr xaricdə Rusiya hakimiyyətinin əleyhdarlarının və ya məxfi xidmət işçiləri arasından qaçanların qətlə yetirilməsi və ya onların həyatına sui-qəsdlə bağlı çoxsaylı hadisələri sadalayır. Qeyd olunur ki, bu cür hadisə ilk dəfədir İspaniyada baş verib.
Kuzminov Rusiya ordusunun kapitanıdır, Sızran Aviasiya Məktəbinin məzunudur. 28 yaşlı hərbçi Ukraynaya qarşı müharibəyə qarşı çıxıb və Ukrayna xüsusi xidmət orqanları ilə əlaqə saxlayıb. Avqustun 9-da o, qırıcı təyyarənin ehtiyat hissələrini daşıyan helikopterlə hökumətin nəzarətində olan Ukrayna ərazisinə uçub. Onunla birlikdə təyyarədə iki baş leytenant olub: 35 yaşlı şturman Xuşbəxt Tursunov və 28 yaşlı texnik Nikita Kiryanov. Onlar qaçışda iştirak etməyiblər və Rusiya ərazisinə qayıtmaq istəyərkən öldürülüblər.
“Rossiya 1” dövlət telekanalının süjetində müxbir Sergey Zenin iddia edib ki, Müdafiə Nazirliyinin xüsusi təyinatlı zabitləri Kuzminovu öldürmək əmri alıblar. Onlardan biri pilotun tapılacağını və “dövlətə xəyanətə görə qanunlar çərçivəsində tam şəkildə” cəzalandırılacağını, ikincisi isə Kuzminovun “mühakiməni görmək üçün yaşamayacağını” vurğulayıb.
Rasim Əliyev
“AzPolitika.info”
Şərhlər