Macarıstan Rusiyanın Ukraynaya genişmiqyaslı müdaxiləsinin ikinci ildönümü ilə bağlı Avropa İttifaqı (Aİ) adından bəyanatın verilməsinə mane olub.
“AzPolitika.info” xəbər verir ki, bu barədə Qərb mediasına Brüsseldəki mənbələr məlumat verib. Qeyd olunur ki, bütün Aİ ölkələri adından ümumi bəyanat əvəzinə, Avropa Komissiyası, Aİ Şurası və Avropa Parlamenti rəhbərlərinin imzaladığı bəyanat dərc olunacaq.
Aİ-nin rəsmi bəyanatını dərc etmək üçün Birliyin bütün 27 ölkəsinin razılığı tələb olunur. Macarıstan keçmişdə tez-tez bu cür bəyanatların dərcini əngəlləyirdi, sonuncu dəfə bu, keçən həftə Budapeştin İsrailin cənubundakı Qəzza zolağının Rəfah şəhərində əməliyyat keçirmək planlarını pisləyən bəyanatı təsdiqləməməsi zamanı baş verdi.
Aİ ölkələrindən birinin diplomatının sözlərinə görə, Ukraynanın işğalının ildönümünə həsr olunmuş bəyanatın təklif olunan mətni Budapeşt üçün çox sərt olub, görünür, orada Rusiyaya qarşı sərt tənqidlər var.
Macarıstan hakimiyyəti Ukraynadakı müharibə ilə bağlı xüsusi mövqe tutur və bu, Aİ ölkələrinin böyük əksəriyyətinin mövqeyindən fərqlənir. Macarıstan Ukraynaya hərbi yardım göstərmir və rəsmi olaraq ilkin şərt olmadan sülh danışıqlarına çağırır ki, bu da Kiyev üçün qəbuledilməzdir.
Bu həftənin əvvəlində Aİ Rusiyaya qarşı müharibənin başlanmasının ikinci ildönümünə təsadüf edən 13-cü sanksiyalar paketini təsdiqləyib. Macarıstan onun iradlarının müzakirə mərhələsində nəzərə alındığını bildirərək onu təsdiqləməyə razılıq verib.
Rasim Əliyev
“AzPoltika.info”
Şərhlər