“Bizim KTMT-də müttəfiqimiz yoxdur” - “Onlar Azərbaycanpərəstdir...”

Ermənistan KTMT-yə üzvlüyünü dondurduğunu deyir, ancaq niyə dondurduğunu izah etmir.

“AzPolitika” xəbər verir ki, bunu Qarabağdakı keçmiş qondarma qurumun “müdafiə naziri” olmuş Samvel Babayan yerli mətbuata müsahibəsində deyib.

Babayan iddia edib ki, KTMT üzvləri Ermənistandan daha çox Azərbaycanla yaxın münasibətlərə malikdirlər: “Vaxtilə mən öz fikrimi açıq şəkildə bildirdim və indiki hakimiyyətə yazılı şəkildə təqdim etdim. Səbəb odur ki, Belarus KTMT-nin üzvü olmaqla Azərbaycana hətta Rusiyanın da satmadığı silahları, “Polonez” və digər silahları verib və KTMT çərçivəsində Azərbaycana lobbiçilik edir. Yəni, Belarus maraqlı tərəfdir və bu strukturda Azərbaycanın maraqlarına lobbiçilik edir. Eyni şey Mərkəzi Asiya ölkələrinə də aiddir, Azərbaycan bu ölkələrə 20 milyarddan çox sərmayə qoyub. Lobbiçilik edirlər, hətta bunu gizlətmirlər.

Onlar Azərbaycanı qələbə münasibəti ilə təbrik etdilər. 2020-ci il müharibəsində Rusiya və KTMT-nin mövqe formalaşdırmasının qarşısını almaq üçün əllərindən gələni etdilər. Yəni, bizim orada müttəfiqimiz yoxdur. Rusiya ilə münasibətlər var, qalanları isə bir qədər Azərbaycanpərəstdir. 6 nəfərdən 4-nün sizə qarşı olduğu ailədə belə bir sual yaranır: sən orada nə edirsən?

Bunun üçün mən Rusiya ilə birbaşa “yol xəritəsi” təklif etdim, Rusiya normallaşana qədər müqavilələri dəyişdirək, o zaman bu ailə nəzarətə sahib olacaq, kimin hara getdiyini anlayacağıq.

Bütün baş verənlərdən sonra KTMT-də qalmağımız üçün daha nə baş verməlidir, niyə qalmalıyıq, nə etməliyik, hansı problemi həll etməliyik? Aydın deyilmi ki, Rusiya istəsə belə, bu dövlətlər Ermənistanın sərhədlərini qorumaq üçün qoşun yeritməyin əleyhinədirlər? Ona görə də mən hələ 2021-ci ildə Rusiya ilə birbaşa dialoq təklif etmişəm”.

“AzPolitika.info”