“Əldə edilən iqtisadi sabitlik uzağı bir il yarıma dağılmağa başlayacaq”
Rusiyanın iqtisadi gücü zəifləməyə başlamazdan əvvəl daha bir il yarım davam gətirə bilər.
“AzPolitika” xəbər verir ki, bunu “Business Insider” nəşri “Karnegi” fondunun hesablamalarına istinadla yazıb.
Yazıda qeyd olunur ki, artan hərbi xərclərə və Qərbin ticarət məhdudiyyətlərinə baxmayaraq, Rusiya iqtisadiyyatı hələ də güclüdür. Eyni zamanda, Beynəlxalq Valyuta Fondu bu il Rusiyanın bütün inkişaf etmiş iqtisadiyyatlardan, o cümlədən ABŞ-dən daha sürətli inkişaf edəcəyini proqnozlaşdırır.
Qeyd olunur ki, bu, Rusiyanın sanksiyalardan qismən yayınmağın yollarını tapa bilməsi, məsələn, müttəfiqlərinə neft satmaqla yanaşı, üçüncü ölkələr vasitəsilə Qərb mallarını idxal etməsi ilə bağlıdır. “Paradoksal bir vəziyyət yaranıb: Rusiya iqtisadiyyatı həm Qərbin sanksiyalarına rəğmən, həm də onların sayəsində sabitdir. Lakin bu çətin əldə edilən sabitlik ən yaxşı halda, bir il yarım ərzində artan disbalans və mümkün sosial problemlər səbəbiylə dağılmağa başlayacaq”.
Bunu “Karnegi” Avrasiya Mərkəzinin tədqiqatçısı Aleksandr Prokopenko deyib.
Bununla belə, yazı müəlliflərinin fikrincə, Rusiya müharibənin üçüncü ilində üç böyük problemlə üzləşir: “Vladimir Putin üçün problem Rusiya ordusunun maliyyələşdirilməsi, Rusiya vətəndaşlarının həyat səviyyəsinin saxlanması və iqtisadiyyatın sabitliyinin qorunması ilə bağlıdır. Bu üç məqsədə nail olmaq Rusiya üçün getdikcə çətinləşir”.
Məqalədə göstərilir ki, iqtisadiyyatdakı zəiflik əlamətləri artıq üzə çıxmağa başlayıb. Belə ki, Kreml bu il öz ordusuna rekord məbləğdə vəsait xərcləməyi planlaşdırır. Bu, ölkə iqtisadiyyatına mənfi təsir göstərə bilər, çünki müdafiə xərcləri qeyri-məhsuldardır və Rusiya-Ukrayna müharibəsinin tezliklə bitib-bitməyəcəyi bəlli deyil: “Yaşayış şəraiti də pisləşməyə başlaya bilər. Baxmayaraq ki, iqtisadçılar hazırda rusların əsasən normal həyat sürdüyünü deyirlər. Bu dövrdə inflyasiya sürətlə yüksəldi və Mərkəzi Bankı faiz dərəcələrini 16%-ə qədər artırmağa məcbur etdi. Mərkəzi Bank inflyasiyanın azaldılmasına nail olarsa, bu, iqtisadiyyatın daralmağa başlaması ilə ev təsərrüfatlarının gəlirlərini yeyəcək. Gəlirlərin azalması rusların borclarını ödəmək qabiliyyətinə də təsir göstərərək və borc böhranı riskini artıracaq. Rusiya indiyə qədər iqtisadiyyatını sabit saxlamaq və tənəzzüldən qaçmaq üçün alətlərə malik olsa da, iqtisadçılar işçi qüvvəsi çatışmazlığı, məhsuldarlığın azalması və dünyanın qalan hissəsindən artan təcrid şəraiti nəzərə alınmaqla qaranlıq gələcək barədə xəbərdarlıq edirlər. Siyasi imperativlərin idarə etdiyi iqtisadiyyatda davamlı inkişaf üçün çox az stimul var. Gec-tez bu, adi rusiyalıların rifahına zərər verəcək. Başqa sözlə, aşağı həyat standartları Kremlə doğru əsən siyasi və iqtisadi küləklərə əlavə olunacaq.
Mütəxəssislər Rusiyada sosial iğtişaşların baş verəcəyi barədə xəbərdarlıq edirlər. Xüsusən də Qərb Moskvaya qarşı sanksiyaları sərtləşdirməyə davam edərsə, ilin sonuna qədər ölkə geniş iğtişaşlarla üzləşə bilər”.
“AzPolitika.info”
Şərhlər