““Əmək Pensiyaları haqqında” Qanuna 2017-ci ildə edilən dəyişikliklərə əsasən, qadınların pensiya yaşı gələn aydan daha 6 ay uzadılacaq”.
“AzPolitika” xəbər verir ki, bu haqda iqtisadçı, deputat Vüqar Bayramov bildirib.
“Pensiya yaşı ilə bağlı diferensial yaş mexanizmi tətbiq olunmasını və kişilər ilə xanımların pensiya yaşı arasında fərqin müəyyənləşdirilməsini təklif edirik. Bir sıra inkişaf etmiş dövlələrdə, o cümlədən Mərkəzi və Şərqi Avropa ölkələrində olduğu kimi xanımların daha tez pensiyaya çıxması məqsədəuyğundur”, - iqtisadçı əlavə edib.
Deputat vurğulayıb ki, əvvəla, xanımların pensiya yaşının kişilərlə müqayisədə daha az olması onların sosial təminatı baxımdan vacibdir.
Onun sözlərinə görə, bu baxımdan daha öncə, xanımların pensiya yaşının 63-də saxlanılmasını təklif edirdik.
V.Bayramov deyir ki, xanımların xüsusən yaşlı dövrlərində sosial təminata daha çox ehtiyacları var: “Digər tərəfdən, kişilərin rəsmi əməkhaqqısı xanımlarla müqayisədə təxminən 2 dəfə çoxdur. Bu o deməkdir ki, xanımların sosial kapital yığımları nisbətən azdır. Ona görə də xanım vətəndaşlarımız üçün pensiya yaşı tamam olan zaman kapitalın xüsusi əmsala vurulmasını təklif edirik. Əgər xanım vətəndaşımızın pensiya kapitalı 40 min manatdırsa, həmin vəsait 1,5 əmsalına vurula bilər. Bu zaman kapital avtomatik olaraq 60 min manat olur. Bu da imkan verə bilər ki, xanım vətəndaşımız pensiya yaşı tamam olan zaman daha çox pensiya alsın”.
İqtisadçı hesab edir ki, pensiya islahatların növbəti mərhələsində gender aspektindən diferensial yanaşmanın tətbiq edilməsi sosial təminat baxımdan arzuolunan olardı.
“AzPolitika.info”
Şərhlər
Bu deputatların mənasız danışıqlarına fikir verməyin ,zatən hökumət bunları saymır ,istədiyini edir ,bunların dediyini küçədə hamı deyir ,onda deputatnan vətəndşın nə fərqi var ? Fərq yalnız maaş və imtiyazdadır