İyulun 26-na keçən gecə ilhaq edilmiş Krımda partlayış səsləri eşidilib. Yerli hakimiyyət orqanları raket hücumu elan edib. Lakin cəmi altı dəqiqədən sonra həyəcan siqnalı kəsilib.
Ukraynanın "Suspilne" telekanalı yerli sakinlərə istinadən Saki və Yevpatoriya şəhərlərində partlayışlar barədə məlumat yayıb. Saki sakini “şəhərdə çox güclü partlayışlar olduğunu” bildirib ki, bu da mənzillərdə pəncərələrin titrəməsinə səbəb olub.
Məlumata görə, Novofedorovka kəndindəki Saki hərbi aerodromunda güclü partlayış səsləri eşidilib. “Crimean Wind” aerodromda silah-sursat anbarının vurulduğunu iddia edir. Bundan sonra orada yanğın başlayıb və bir müddət partlama səsi eşidilib. Azı 13 partlayışın olduğu qeyd olunur.
Okunevka ərazisində və Simferopolda da güclü partlayışlar qeydə alınıb. Ola bilsin ki, bunlar hava hücumundan müdafiə sistemlərinin işləməsi ilə bağlıdır.
Rusiyanın "Astra" teleqram kanalı ilhaq edilmiş Krımın fövqəladə xidmətlərindəki mənbələrə istinadən iddia edir ki, Saki aerodromuna uzaqmənzilli ATACMS raketləri ilə hücum edilib. Sursat anbarına dəyən zərbə nəticəsində yanğın baş verib. “Astra” kanalı xəbər verir ki, iki əsgər qəlpə yaraları ilə yaralanıb.
Novofedorovkadakı Saki hərbi aerodromu artıq bir neçə dəfə raket hücumlarına məruz qalıb. “Su-24” bombardmançıları və “Su-30” qırıcıları ilə silahlanmış, Ukraynanın cənubundakı rus qoşunlarına dəstək verən 43-cü qırıcı aviasiya alayı orada yerləşir.
Bundan əlavə, məlumatda qeyd edildiyi kimi, ATACMS raketi Rusiyanın Saki rayonunun Şelkoviçnoye kəndindən 5 kilometr aralıda yerləşən hava hücumundan müdafiə qüvvələrinin yerləşdiyi əraziyə düşüb. Zərbə nəticəsində radar qurğusu sıradan çıxarılıb. Ümumilikdə, teleqram kanalının mənbələrinə görə, Ukrayna Silahlı Qüvvələri Krımı 4 ATACMS raketi ilə vurub, hava hücumundan müdafiə qüvvələri isə onlardan ikisini vurub.
Rusiya Müdafiə Nazirliyi (MN) və Ukrayna Silahlı Qüvvələrinin Baş Qərargahı ilhaq edilmiş Krıma hücumu şərh etməyib.
Rusiya MN yalnız gecə saatlarında hava hücumundan müdafiə qüvvələrinin Rostov vilayəti üzərində dörd, Kursk vilayəti üzərində isə daha iki pilotsuz uçan aparatı ələ keçirərək məhv etdiyini bildirib.
“AzPolitika.info”
Şərhlər