Biləsuvar rayonunda azyaşlının ölməsi faktı ilə bağlı ittiham olunan şəxsin barəsində istintaq orqanının təqdimatına baxılıb.
APA-nın cənub bürosunun məlumatına görə, Biləsuvar rayon Məhkəməsində rayonda sınıqçı kimi tanınan Nərgiz İmanova barəsində 2 aylıq ev dustaqlığı qətimkan tədbiri seçilib.
Azyaşlının ailə üzvləri qərardan yuxarı instansiyaya şikayət edəcəklərini bildiriblər.
Qeyd edək ki, sentyabrın 7-də Biləsuvar rayon sakini, 2022-ci il təvəllüdlü Qubadlı Nəzrin Emin qızının xalq təbabətilə məşğul olan şəxs tərəfindən sümüklərinin manipulyasiyası zamanı ölməsi faktı ilə bağlı rayon prokurorluğunda araşdırma aparılıb.
Araşdırmalarla N.Qubadlının bədən səthinə göstərilən təzyiqlər nəticəsində yaranmış ağrı şokundan ehtiyatsızlıqdan ölməsinə əsaslı şübhələr müəyyən edilib.
Faktla bağlı Biləsuvar rayon prokurorluğunda Cinayət Məcəlləsinin 124.1-ci (ehtiyatsızlıqdan adam öldürmə) maddəsilə cinayət işi başlanıb, ibtidai istintaq aparılır.
Şərhlər
Ölkədə sınıqçılıq, çöpçülük, cindarlıq, köpgötürməlik, çildağlıq, yengəlik, qeyri-leqal mamaçalıq və bu qəbildən olan digər "qədim peşələr" qanunla qadağan edilməlidir. Uşağa dözülməz ağrılar yaşadıb onun ölümünə səbəb olan adıgedən arvad isə haqq etdiyi və qanunun göstərdiyi müddətə qədər ərindən və eləcə də bütün cəmiyyətdən təcrid edilərək həbsxana divarları arasına atılmalıdır.