Anar Məmmədlinin və Rəsul Cəfərovun şikayətləri təmin edilmədi

Dekabrın 10-da Nəsimi rayon məhkəməsində hüquq müdafiəçisi Rəsul Cəfərov iştirakı ilə onun ev dustaqlığına buraxılmasına görə müraciətinə baxılıb. Məhkəmə müraciəti təmin etməyib. Bu haqda AzadlıqRadiosuna hüquqşünas Günay İsmayılova məlumat verib. Onun sözlərinə görə, məhkəmənin qərarından apelyasiya şikayəti veriləcək.

Rəsul Cəfərov avqustun 8-də 3 ay müddətinə həbs olunub, sonradan – oktyabrın 23-də məhkəmə onun həbs müddətini daha 3 ay uzadıb.

Ona qarşı qanunsuz sahibkarlıq, vergidənyayınma və vəzifə səlahiyyətlərini aşma maddələri ilə ittiham irəli sürülüb. Hüquq müdafiəçisi ona qarşı ittihamları rədd edir, bunu özünün fəaliyyəti ilə əlaqələndirir.

Bu gün həmçinin Bakı Apelyasiya Məhkəməsində Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli, qurumun icraçı direktoru Bəşir Süleymanlı və Könüllülərin Beynəlxalq Əməkdaşlığı İctimai Birliyinin rəhbəri Elnur Məmmədovun apelyasiya şikayəti üzrə məhkəmə prosesi keçirilib. Lent.az-ın məlumatına görə, hakim Əflatun Qasımovun sədrliyi ilə keçirilən prosesdə təqsirləndirilən şəxslərin işi üzrə qərar elan edilib. Qərara görə, təqsirləndirilən şəxslərinm apelyasiya şikayəti təmin edilməyib.

Qeyd edək ki, Bakı Ağır Cinayətlər Məhkəməsinin hökmü ilə Anar Məmmədli 5 il 6 ay və Bəşir Süleymanlı 3 il 6 ay müddətinə azadlıqdan məhrum edilib. Zamində olan Süleymanlı məhkəmə zalından həbs edilib. Elnur Məmmədov isə 3 il 6 ay müddətinə şərti cəza alıb.