Prezident İlham Əliyevin Sərəncamları ilə Anar Bayramov və Rəşad Mustafayev əmək və əhalinin sosial müdafiəsi nazirinin müavinləri təyin ediliblər.

Bu barədə Əmək və Əhalinin Sosial Müdafiəsi Nazirliyi məlumat yayıb.

A.Bayramov hazırkı vəzifəsinə qədər nazirliyin tabeliyində Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri olub.

“AzPolitika” xəbər verir ki, A.Bayramov 1975-ci ildə Bakı şəhərində anadan olub.

1991-ci ildə orta məktəbi medalla bitirib. Həmin il Azərbaycan Tibb Universitetinə (ATU) daxil olub. Akademik Mirqasımov adına təqaüdə layiq görülüb və Azərbaycan Tibb Universitetini qırmızı diplomla bitirib. ATU Daxili xəstəliklər 1 və Reanimatologiya kafedrasının kliniki ordinatoru, sonradan aspirantı kimi çalışıb.

2003-cü ildən etibarən Tibb üzrə fəlsəfə doktorudur (PhD).

2006-ci ildə Azərbaycan Dövlət İqtisad Universitetini fərqlənmə diplomu ilə bitirərək İqtisadiyyat və İdarəetmə ixtisası üzrə magistr dərəcəsini alıb.

Tibb sahəsindəki fəaliyyətini 1998-ci ildə “MediClub” klinikasında həkim olaraq davam etdirib.

Elmi dərəcə aldıqdan sonra 2003-cü ildən ATU-nun Daxili xəstəliklər 1 və Reanimatologiya kafedrasının assistenti vəzifəsində işləyib.

2002-ci ildə “A-Group” Sığorta Şirkətinin baş tibbi eksperti vəzifəsində işləməyə başlayıb. Həmin il şirkətin baş direktorunun müavini təyin olunub.

2004-cü ildə isə həmin şirkətin baş direktoru təyin edilib.

2009-cu ildə “A-Group” Sığorta Şirkətinin İdarə Heyətinin sədri təyin edilib.

2021-ci ildə Əmək və əhalinin sosial müdafiəsi nazirinin müşaviri vəzifəsinə təyin olunub.

Eyni ildən etibarən, Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri vəzifəsinə təyin edilib.

2006–2014-cü illərdə Azərbaycan Sığortaçılar Assosasiyasının Tibbi Sığorta Komitəsinin sədri, 2012-2017 illərdə Xəzər-Avropa Maliyyə Klubunun (CEİBC) Prezidenti, 2017-2020 illərdə Xəzər-Avropa Klubunun Sığorta Komitəsinin Rəhbəri, 2021-ci ildən “A-Group” Sığorta Şirkətinin Direktorlar Şurasının üzvü, 2023-cü ildən Azərbaycan Respublikası Deflimpiya Komitəsinin Prezidenti, 2025-ci ildən Azərbaycan Respublikası Milli Olimpiya Komitəsi Baş məclisin üzvü olaraq ictimai vəzifərdə çalışır.

20-dən artıq məqalə və 2 səmərələşdirici təklifin müəllifidir. Maliyyə, sığorta, tibb, səhiyyədə islahatlar sahələri üzrə çoxsaylı beynəlxalq seminar, təcrübə və proqramların iştirakçısı olmuşdur.

Rəşad Mustafayev isə 1978-ci ildə anadan olub. 1998-ci ildə Elm və Təhsil Mərkəzi Təfəkkür Universitetinin Hüquq fakültəsinin bakalavr, 2001-ci ildə Bakı Dövlət Universitetinin Hüquq fakültəsinin magistr, 2014-cü ildə Azərbaycan Respublikası Prezidenti yanında Dövlət İdarəçilik Akademiyasının İnzibati idarəetmə fakültəsinin bakalavr, 2018-ci ildə İspaniyada Empreza Universitetinin Biznes məktəbinin MBA proqramı üzrə magistr pilləsini bitirib.

2000-2001-ci illərdə Dövlət Əmlakı Nazirliyinin Hüquq şöbəsində aparıcı məsləhətçi, 2001-2015-ci illərdə İqtisadiyyat Nazirliyinin Hüquq şöbəsində aparıcı məsləhətçi, baş məsləhətçi, sektor müdiri, müdir müavini, 2015-2023-cü illərdə “Cənub Qaz Dəhlizi” QSC-nin Baş direktorunun müavini, 2023-cü ildən hazırkı vəzifəsinə qədər “Ekol Mühəndislik Xidmətləri” QSC-nin Baş direktoru olub.