PKK terror təşkilatı bu gün Türkiyəyə qarşı silahlı terror fəaliyyətini dayandırdığını və özünü ləğv etdiyini elan edə bilər.
"AzPolitika" xəbər verir ki, bu barədə Türkiyə medası məlumat verib.
Məlumata görə, mayın 5-dən 7-dək PKK qurultay keçirib və orada partiyanın həbsdə olan terrorçubaşı Abdullah Öcalanın müraciətini müzakirə ediblər.
“PKK qurultayda tarixi əhəmiyyət kəsb edən qərarların qəbul edildiyini və bu qərarların yaxın vaxtlarda müvafiq sənədlər və izahatlarla birlikdə rəsmən elan ediləcəyini bildirib”, - məlumatda deyilir.
Xatırladaq ki, Öcalan 2025-ci ilin fevralında 1978-ci ildə qurduğu terror təşkilatını silahı yerə qoymağa çağırıb. O, silahlı mübarizəni köhnəlmiş metod adlandırıb və bunu yalnız Türkiyə dövlətinin siyasətinin kürd kimliyini rədd etdiyi və kürdlərin hüquq və azadlıqlarını məhdudlaşdırdığı şəraitdə anlam daşıdığını vurğulayıb. Həbsdə olan PKK lideri Türkiyə hökumətinin son islahatlarının və bölgədəki dəyişikliklərin növbəti silahlı mübarizəni qeyri-mümkün etdiyini söyləyib.
O, bütün kürd silahlı qruplarının silahı yerə qoymalı və PKK-nın mövcudluğuna son qoymalı olduğunu vurğulayıb. Bu, təkcə PKK-nın özünə deyil, onun Suriya, İrandakı strukturlarına, İraq və Türkiyədə də fəaliyyət göstərən Kürdüstan İcmaları Birliyinə (KCK) aiddir.
Martda PKK rəsmi olaraq Öcalanın çağırışını yerinə yetirdiyini açıqlayıb və atəşkəs elan edib.
Şərhlər