Anar Məmmədovun işçisini öldürənə ömürlük həbs... – Məhkəmə

Bakı Ağır Cinayətlər Məhkəməsində “Qarant Sığorta”nın İdarə Heyətinin üzvü Natəvan Əliyevanı qətlə yetirməkdə təqsirli bilinən Tərlan Tahirovun cinayət işi üzrə məhkəmə prosesi keçirilib.

AzNews.az xəbər verir ki, hakim Eynulla Vəliyevin sədrliyi ilə keçirilən prosesdə iş üzrə şahid qismində adları hallanan şəxslər dindirilib.

Zərərçəkmiş qismində mərhumun anası Tamara Əliyeva bildirib ki, hadisədən 10 gün sonra hüquq mühafizə orqanları tərəfindən qızının qatilin tapıldığını eşidib.

Tamara Əliyeva məhkəmədən maddi və mənəvi təzminat istəmədiyini deyib və xahiş edib ki, qatilə ömürlük həbs cəzası verilsin.

Məhkəmədə qatil Tərlan Tahirovun atası və anasına da söz verilsə də, onlar danışmaqdan imtina ediblər.

Məhkəmənin növbəti iclası yanvar ayının 9-a təyin edilib.

Qeyd edək ki, 2014-cü il iyulun 11-də Bakıxanov küçəsi, 50 ünvanında yaşayan 31 yaşlı Natəvan Əliyevanın evində üzərində zorakılıq əlamətləri olan meyiti aşkar edilib. Həmin faktla bağlı Bakı şəhər prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

Həyata keçirilən istintaq-əməliyyat tədbirləri ilə müəyyən edilib ki, N.Əliyevanın yaşadığı mənzildə hadisədən əvvəl mebel quraşdırmış Quba rayon sakini, 1988-ci il təvəllüdlü Tahirov Tərlan Rahib oğlu tamah məqsədi ilə iyulun 10-da həmin mənzilə gəlib. O, üstündə gəzdirdiyi bıçaqla Natəvanın bədəninin müxtəlif nahiyələrinə çoxsaylı xəsarətlər yetirərək öldürüb.

Daha sonra o, mənzildə axtarış apararaq N.Əliyevaya aid qızıl-zinət əşyalarını götürüb hadisə yerindən qaçıb. Cinayətin T.Tahirov tərəfindən törədilməsində şübhələnməyə kifayət qədər əsaslar olduğundan o, iyulun 22-də tutularaq istintaqa cəlb olunub. T.Tahirov dindirilərkən törətdiyi əməli etiraf edib.

"Qarant Sığorta" "Qarant Holdinq"ə daxildir. Holdinqin idarə heyətinin sədri isə nəqliyyat naziri Ziya Məmmədovun oğlu Anar Məmmədovdur.