Rusiyalılar Qərb sanksiyalarının ləğv olunacağını və ya müharibədən əvvəlki həyat tərzinə qayıdacaqlarını gözləməməlidirlər. 

“AzPolitika” xəbər verir ki, bunu Rusiya Prezident Administrasiyasının rəhbərinin müavini Maksim Oreşkin Sankt-Peterburq Beynəlxalq İqtisadi Forumunda (SPIEF) deyib.

"Biz hər şeyin əvvəlki vəziyyətinə qayıtmasını, Qərb sanksiyalarının ləğv olunacağını və ya bu kimi bir şey gözləməməliyik. Baş verən dəyişikliklər əsasən qlobaldır. 20 il əvvəlki dünya artıq mövcud deyil və heç vaxt geri qayıtmayacaq", - deyə Oreşkin bildirib.

Eyni zamanda, o, Qərb sanksiyalarının "heç bir konkret hadisə ilə əlaqəli olmadığını" iddia edib və yeni məhdudiyyətlərin tətbiqinə reaksiya vermək əvəzinə, onları qabaqlamağa çağırıb. "Biz bu sırf müdafiə modelindən uzaqlaşmalıyıq. Əslində, biz artıq əsasən bundan uzaqlaşmışıq", - deyə Oreşkin bildirib.

Kremlin nümayəndəsi həmçinin xəbərdarlıq edib ki, sanksiyalara cavab olaraq müdafiə və hücum arasındakı balans getdikcə hücuma doğru dəyişəcək.

Oreşkindən öncə çıxış edən Rusiya Xarici Kəşfiyyat Xidmətinin keçmiş polkovniki, "Rosneft"in baş direktorunun hazırkı müşaviri Andrey Bezrukov isə Rusiyanın "bir neçə onillik" müharibədə qalacağını və qlobal münaqişələrdə iştirak edəcəyini bildirib. "Bu, indi yaşadığımız çox qızğın müharibə, ya da digər bölgələrə yayılan sürünən bir müharibə ola bilər. Praktik olaraq müharibə aparan hesab edilə biləcək iki nəslimiz olacaq və biz bu müharibə ilə yaşamağı öyrənməliyik", - deyə Bezrukov SPIEF-də çıxış edərkən bildirib.

O, həmçinin Qərbin Rusiyaya qarşı guya apardığı və “viruslarla hamımızı məhv edə biləcək biomüharibəni" xatırladıb.

Bir sözlə, Kreml rusları Qərbin “dəhşətli planları” ilə qorxutmaqda davam edir və yeni müharibələrə hazır olmağa çağırır.

“AzPolitika.info”