12 avqustda Ukraynanın Novorossiyskə endirdiyi zərbə Rusiya Qara Dəniz Donanmasının flaqman gəmisi olan “Admiral Makarov” freqatına ciddi ziyan vurub. “AzPolitika” xəbər verir ki, bu barədə Rusiya Z-kanalları məlumat yayıblar.

Peyk görüntülərinə görə, gəminin yuxarı göyərtəsinin burnunda, “Kalibr” qanadlı raketlərinin solunda açıq-aydın bir dəlik var. Həmçinin, "Centaur-NM1" peyk rabitə stansiyasının və arxa hissəyə daha yaxın olan üst quruluşdakı Pozitiv-M1.2 aşkarlama radarının zədələndiyi görünür.

Ukraynanın "Krımskiy Veter" kanalı zərbələrin şaquli buraxılış qurğularının ərazisinə dəydiyini bildirir. Bu, daxili partlayışa səbəb olub və UKSK 3S14 buraxılış boruları məhv olub.

Ukrayna Silahlı Qüvvələri 14 aprel 2022-ci ildə "Moskva" kreyserini raket zərbəsi ilə batırdıqdan sonra "Admiral Makarov" Rusiya Qara Dəniz Donanmasının flaqman gəmisi olub. Müharibənin əvvəlindən bu freqat Ukraynaya hücumlar üçün istifadə olunub.

Eyni zamanda, Ukrayna Silahlı Qüvvələri "Admiral Essen" freqatını vurub. Peyk görüntülərinə görə, ən ciddi ziyan gəminin burnuna: göyərtəyə və UKSK 3S14 "Kalibr" raket buraxılış qurğusunun səkkiz elementli moduluna dəyib. "Centaur" peyk rabitə günbəzinin antenaları məhv edilib.

"Gəmilər zərbə potensialını və döyüş idarəetmə qabiliyyətini tamamilə itirib. Hər ikisi ən azı bir illik istismardan kənar qalacaq", - deyə "Krımskiy Veter" yazıb.

Ukrayna Müdafiə Nazirliyinin Baş Kəşfiyyat İdarəsi freqatlara hücum etmək üçün "Palyanitsa" reaktiv dronları, "Neptun" raketləri və "dəniz platformaları"ndakı zərbə sistemləri də daxil olmaqla Ukrayna PUA-larının istifadə edildiyini bildirib.

Ukraynanın zərbələri Rusiyanı ilhaq edilmiş Krımdan gəmilərini geri çəkməyə məcbur etdikdən sonra Novorossiysk Qara Dəniz Donanmasının əsas bazasına çevrilib. Lakin bu, Qara Dəniz Donanmasının Ukrayna Silahlı Qüvvələrindən qaçmasına kömək etmədi.

“AzPolitika.info”