Azərbaycanın keçmiş xarici işlər naziri Tofiq Zülfüqarov öz xatirələrini bölüşərək, Ermənistanın keçmiş prezidentləri Robert Köçəryan və Serj Sarkisyanın törətdiyi ağır cinayətlər, eləcə də onların işğal dövründə əsir və girov götürülmüş azərbaycanlıların alveri ilə məşğul olaraq ilk böyük sərvətlərini necə qazandıqları barədə faktları açıqlayıb.
“AzPolitika” xəbər verir ki, diplomat həmin dövrün diplomatik pərdəarxası məqamlarını və erməni hərbi-siyasi rəhbərliyinin cinayətkar əməllərini təfərrüatı ilə diqqətə çatdırıb:
"Xatirələrdən... Bu, 1994-cü ilin iyun ayında xarici işlər nazirinin müavini təyin olunduğum, bundan bir neçə ay sonra isə Prezident Heydər Əliyevin qapalı sərəncamı ilə sülh sazişinin mətnini ilkin imzalamaq (paraf etmək) hüququ olan xüsusi nümayəndəsi təyin edildiyim dövr idi.
Həmin vaxtdan başlayaraq 1998-ci ilin martında nazir təyin olunana qədər mən idarədəki həmkarlarımla birlikdə birbaşa Prezidentin rəhbərliyi və nəzarəti altında çalışırdıq.
Bu, çox çətin bir dövr idi; Minsk Qrupu formatında və paralel olaraq Rusiyanın vasitəçiliyi ilə aparılan danışıqlar fasiləsiz rejimdə keçirilirdi...
Bu gün mətbuatda R.Köçəryanın həbs olunması və S.Sarkisyan barəsində təhqiqat aparılması haqqında oxuyarkən məndə sual yaranır: nə üçün bu personajlara vaxtilə müvəqqəti işğal olunmuş ərazilərdə 'çalışdıqları' dövrdə törətdikləri ən ağır cinayətlərlə bağlı ittihamlar irəli sürülmür?
Axı bu cinayətkarlar ilk böyük pullarını əsir və girovların alverindən 'qazanıblar'.
S.Sarkisyan həmin dövrdə R.Köçəryanın 'kisəsi' rolunu oynayır və hazırda törətdiyi cinayətlərə görə cəza çəkən A.Qukasyana əsasən mülki şəxslərin, o cümlədən bəziləri hələ Xocalı soyqırımı vaxtından saxlanılan qadın və uşaqların azad edilməsi prosesini uzatmaq barədə təlimatlar verirdi.
Mənə bu vəziyyət barədə V.N.Kazimirovdan məlumat çatmışdı və o, söz vermişdi ki, xüsusi hökumət işçi qrupu çərçivəsində Qarabağdakı bu dəstəyə birbaşa rəhbərlik edən müdafiə naziri P.Qraçovdan nəhayət 'hamının hamıya' prinsipi ilə dəyişdirilməni reallaşdırmağı xahiş edəcək.
O zaman, 1994-cü ilin avqustunda yalnız qadınların və uşaqların dəyişdirilməsi həyata keçirildi (28 azərbaycanlı qadın 4 erməni ilə dəyişdirildi).
Hərbi əsirlərin alveri isə Y.Primakov Ermənistan və Azərbaycana səfəri zamanı öz təyyarəsində qalan 52 azərbaycanlı hərbi əsiri gətirənə qədər davam etdi..."
Tofiq Zülfüqarov şərhinin sonunda vurğulayıb ki, erməni siyasi rəhbərliyinin əsas fiqurları hesab edilən bu şəxslər törətdikləri əməllərə görə mütləq cavab verməlidirlər: "Beləliklə, korrupsionerlər R.Köçəryan və S.Sarkisyan öz ilk milyonlarını Azərbaycanın işğal olunmuş torpaqlarında, vətəndaşlarımızın qanı və əzabları hesabına qazanmağa başlayıblar... Və buna görə cavab verməlidirlər”.
Rasim
“AzPolitika.info”
Şərhlər