Noyabrın ikinci yarısında Asiya-Sakit Okean İqtisadi Əməkdaşlıq forumu çərçivəsində keçirilməsi planlaşdırılan üçtərəfli sammit - Si Cinpin, Donald Tramp və Vladimir Putin arasında görüş baş tutmaya bilər.
“AzPolitika” xəbər verir ki, bu barədə nüfuzlu “The Wall Street Journal” nəşri məlumatlı diplomatik mənbələrə istinadla məlumat yayıb.
Nəşr iddia edir ki, görüşün formatı və gündəliyi ilə bağlı ciddi fikir ayrılıqları var.
Belə bir görüşün təşəbbüskarı kimi Rusiya liderinin çıxış etdiyi bildirilir. O, oktyabr ayında telefon danışığı zamanı Donald Trampa bu tərkibdə görüş təklif edib və güman edilir ki, orada Ukraynadakı müharibəyə Rusiyanın şərtləri daxilində son qoyulması müzakirə oluna bilər.
Tramp öz növbəsində Ukrayna məsələsi ilə deyil, üç böyük dünya gücü arasında nüvə silahsızlanması və silahlara nəzarət üzrə genişmiqyaslı üçtərəfli danışıqların başlanması ilə maraqlandığını vurğulayıb.
Lakin Pekin bu müzakirələri faktiki olaraq bloklayıb. Çin rəhbərliyi ölkənin nüvə silahının nisbətən az olmasını və nüvə silahlanmasına məhdudiyyətlərdə maraqlı olmadığını nəzərə alaraq, Moskva və Vaşinqtonun nəhəng nüvə arsenalları ilə müqayisədə Pekinin daha zəif tərəf kimi görünməsini istəmir, ona görə də Si Cinpin nüvə məsələsini qaldırmaqdan qəti şəkildə imtina edir.
Çin tərəfi ciddi şəkildə protokol əsaslı yanaşmada israr edir ki, bu yanaşmada hər bir liderin canlı müzakirə üçün minimal imkanla sadəcə hazırlanmış bəyanatı oxuyacağı gözlənilir.
ABŞ administrasiyası belə bir protokolu rədd edir və tam fikir mübadiləsi tələb edir. Üstəlik, bu məsələdə konsensus olmadan üç liderin görüşünün ümumiyyətlə baş tutmayacağı barədə xəbərdarlıq edir.
Əgər bu qeyd edilənlər həqiqətdirsə, çoxlarının Ukrayna müharibəsi başda olmaqla, bir çox qlobal məsələlərin həllində önəmli irəliləyiş gözlədikləri üçtərəfli görüşün üzərinə böyük kölgə düşür.
“AzPolitika.info”
Şərhlər