Bu gün bahalaşmaya etiraz mitinqidir!

Milli Şura xalqı meydana səslədi: "Həyatımızı hakimiyyətinin talançılığından qorumalıyıq"

Bu gün saat 14:00-da Milli Şuranın təyin etdiyi qiymət artımına etiraz mitinq ibaşlayacaq. Bakı Şəhər Icra Hakimiyyəti mitinqlə bağlı Milli Şuranın müraciətinə müsbət cavab versə də, vaxtı dəyişdirib. Müraciətdə “Məhsul” stadionunda keçiriləcək mitinqin saat 16.00-da başlayıb 18.00-qədər davam edəcəyi göstərilmişdi. Meriya isə naməlum səbəblərdən aksiyanın 14.00-da başlayıb 16.00-a qədər davam edəcəyini məqsədəuyğun sayıb.

Milli Şuranın sədri Cəmil Həsənli də aksiya ilə bağlı xalqa çağırış edib. O, facebook səhifəsində bu barədə yazıb: “Sevgili millət, uca xalq!

Hər həftə, hər gün bizdən növbəti mitinqin vaxtını soraqlayırdınız. Sizin arzuladığınız mitinq təyin edildi. Milli Şuranın növbəti mitinqi dekabrın 15-i saat 14:00-da “Məhsul” stadionunda olacaq. Sizə tanış yerdir, “Inşaatçılar” metrosunun yanıdır. Hər kəsin iştirakı zəruridir.

Biz həyatımızı Azərbaycan hakimiyyətinin talançılığından qorumalıyıq. Son qiymət artımından sonra “Qlobal Vitnesin” “Anonim Azərbaycan” hesabatı açıqlandı. Ölkə daxilində yanacağın qiymətin artıran və onu “Cip” maşınların çoxalması ilə izah edənlərin, xaricdəki əməllərinin açılması üçün çox vaxt lazım gəlmədi. Məlum oldu ki, yalnız bir il ərzində bir məmurun neft əməliyyatlarından mənimsədiyi vəsait, qiymət artımı nəticəsində büdcəyə daxil olacaq vəsaitdən dəfələrlə çoxdur. “Anonim Azərbaycan” hesabatı ölkəmizin neft mənimsəmələrinin yalnız kiçik bir hissəsini ortaya qoydu, əslində real mənzərə bundan çox ağırdır.

Yadınızdadırsa, seçki debatları zamanı biz bu mənzərəni təsvir edəndə YAP yetkililəri sənəd-sübut tələb edirdi. Bu da yerli-yataqlı sübut. Bir daha aydın oldu ki, ölkəmizin əsas sərvəti olan neft məhsulları xalqımızın həyatına, rifahına, inkişafına deyil, bir ovuc oğru və dələduzun maraqlarına tabe edilib. Vətənimizdə milyonlarla insan süfrəsinə qoymağa, uşağını doyurmağa çörək tapmır, amma bunlar millətin sərvəti hesabına gecəsi 5 min - 10 min dollara dəbdəbəli hotellərdə qalırlar, çirkli neft əməliyyatlarından xalqa çatacaq milyardları mənimsəyirlər. Bu böyük mənimsəmələrin, milli sərvətlərimizin belə talan edilməsinin başında bilavasitə Ilham Əliyev özü dayanır. Onun xəbəri olmadan heç kəs bir litr nefti belə mənimsəyə bilməz. Siz indi seçkilərin total şəkildə saxtalaşdırılmasının arxasında duran korrupsiya və monopolyanın, rüşətxorluq və talançılığın mahiyyətini daha aydın anlayırsınız.

“Anonim Azərbaycan” hesabatı Azərbaycan hakimiyyətinin oğru təbiətini, onun əsl mahiyyətini açıb göstərdi. Biz qiymət artımına qarşı öz səsimizi qaldırmalıyıq, vətənimizin sərvətlərini talayanlara yox deməliyik, 9 oktyabrda seçki adı altında hakimiyyəti mənimsəyənlərə etirazımzı bildirməliyik. Azərbaycan xalqı ləyaqətli həyat, demokratik cəmiyyət haqqına malikdir. Bu haqqa tapınmaq üçün ölkədə dəyişikliklər, islahatlar olmalıdır. Bu haqqa tapınmaq üçün millətimiz öz iradəsini ortaya qoymalıdır. 15 dekabr etiraz günüdür, qiymət artımına etiraz, talançılığa etiraz, ədalətsizliyə və haqsızlığa etiraz, seçki saxtakarlığına etiraz, hüquqsuzluğa etiraz!

Gələcəyindən məhrum edilmiş 100 minlərlə tələbə və gənclərimiz, layiqli güzaran haqqından məhrum edilmiş, büdcədən “dilənçi payı” alan zavallı əməkçilərimiz, aylıq pensiyası aylıq dərmanına çatmayan 10 minlərlə təqaüdçülərimiz, 15 dekabrda “Məhsula” gəlin etirazınızı bildirin. Bilirəm hava soyuqdur, amma etiraz hissi, uğrunda mübarizə apardığınız həyat haqqının səmimi ideyaları Sizi isindirəcək. Biz birlikdə bu hakimiyyətə, onun qanunsuz əməllərinə, millətin cibinə hesablanmış qiymət artımına yox deyəcəyik!".

AXCP sədri azadlıq.info-ya Əli Kərimli isə facebook səhifəsində yazıb ki, hakimiyyət anlamalıdır ki, hətta “dözümlü xalq”ın da dözümünün həddi var.

AXCP sədri həmçinin vətəndaşları fəal olmağı çağırıb: “Əziz həmvətənlər, bu mitinqin sifarişi sizdən gəldi. Qiymət artımından hiddətlənmiş minlərlə vətəndaşımız müxalifəti etiraz aksiyaları təyin etməyə çağırdı. Əsassız qiymət artımına etiraz etmək nəinki haqqımız, hətta vəzifəmizdir. Etiraz etməsək, qiymət artımı da, hüquqsuzluq da davam edəcək. Söz millətindir!”.

“EL” hərəkatının Ali Məclisinin sədri Eldəniz Quliyev azadlıq.info-ya bildirib ki,

xalq öz taleyinə biganə qalmamalı və onu fəlakətə aparan vəziyyətə etiraz etməlidir: “Bahalaşma yalnız Milli Şura üzvlərini əhatə edən problem deyil. Bu, onsuz da ağır vəziyyətdə yaşayan, maddi sıxıntılar içində boğulan xalqa ciddi təsir edəcək məsələdir. Bahalaşma mənəvi soyqırıma məruz qalmış xalqa yönəlmiş maddi zərbədir. Hesab edirəm ki, Milli Şura millətin şurası olduğunu sübut etməli və xalqı etiraza səsləməlidir. Xalq da öz taleyinin tamaşaçısından iştirakçısına çevrilməlidir. Inanırıq ki, xalq bu vəziyyətə biganə qalmayacaq”.

ACP sədri Sülhəddin Əkbər bu mitinqdə hər kəsin öz ailəsi üçün iştirak etməli olduğunu bildirib: “Yanacağın qiymətinin artması, ərzaq zənbilinin qiymətinin artması deməkdir. Bu isə aztəminatlı ailələrə çox ciddi təsir edəcək. Bir tərəfdən əhalinin əmək haqqının dondurulmuş vəziyyətdə saxlanması, digər tərəfdən qiymət artımı əhaliyə böyük zərbədir. Bu, birbaşa ölkə vətəndaşının şəxsi büdcəsinə təsir edəcək. Nə qədər ki, xalq öz şəxsi həyatının yaxşılaşdırılması uğrunda mübarizəyə qalxmayıb, bu problemlər daha da artacaq. Hər kəs öz ailəsinin bugünü və sabahını düşünməlidir. Xalq neft gəlirlərindən özünə düşən payı istəməlidir. Azərbaycan xalqı soyuq qışa baxmayaraq, qonşu xalqlar kimi öz haqqını tələb etməli və bu gedişi durdurmalıdır”.

Milli Şuranın Beynəlxalq Əlaqələr Komitəsinin sədri Gültəkin Hacıbəyli azadlıq.info-ya 15 dekabr mitinqinin tam əsaslı və bu mitinqdə bir vətəndaş kimi iştirak etməli olduğunu bildirib: “Vətəndaşların maddi vəziyyətinin acınacaqlı olduğu vaxtda, qiymətlərin qalxması yolverilməzdir və insanlara zərbədir. Xalq üzləşdiyi çətinliklərə biganə qalmamalı və öz etirazını ifadə etməlidir. Mən də bu mitinqdə iştirak etməklə öz etirazımı bildirəcəm”.