Bir neçə gündür ki, Azərbaycan Demokratik Respublikasının qurucusu Məhəmməd Əmin Rəsulzadənin Gəncə Şəhər Dəmiryolçular parkında qoyulan heykəli ilə bağlı qalmaqal yaşanır. İctimaiyyət nümayəndələri, media, hətta bəzi deputatlar milli dövlətçilik ideologiyasının banisi, Azərbaycan tarixinin ən böyük şəxsiyyətlərindən biri Rəsulzadəyə qarşı bu cür hörmətsizliyə etiraz edirlər.

Bu etirazların nəticəsi olaraq iyunun 1-də abidənin üzərindəki örtük götürüldü. Ancaq iyunun 2-də büstün üstü yenidən örtülüb. 

Maraqlıdır ki, büstün üstünə örtük çəkilməsi ilə bağlı hər hansı rəsmi aşıqlama verilmir.

Qeyd edək ki, bu məsələ parlamentin sonuncu iclasında müzakirəyə çıxarılmış,  deputat Sabir Rüstəmxanlı Rəsulzadənin büstü ilə bu cür davranışa görə Gəncə Şəhər İcra Hakimiyyətinin başçısını sərt formada tənqid etmişdi.

Deputat Musa Quliyev isə həmkarının bu tənqidinə daha sərt formada cavab verərək demişdi ki, S.Rüstəmxanlı ilə nəqliyyat naziri Ziya Məmmədov qudadırlar. Həmin park da Nəqliyyat Nazirliyinin balansındadır. “Qudasından xahiş etsin, büstün başına keçirilən çuvalı çıxartdırsın” – deyə M.Quliyev məsələyə öz münasibətini bu formada bildirmişdi.

Bundan sonra məsələyə Z.Məmmədovun deputat qardaşı Elton Məmmədov da qarışmışdı və Musa Quliyevi "boş-boş danışmaqda" suçlamışdı.

Sabir Rüstəmxanlı isə mətbuatda böyük bir məqalə ilə çıxış edərək, M.Quliyevi icra başçısının tapşırığı ilə “iftira püskürməkdə" ittiham edib. Sitat: “Ancaq bu sətirləri yazmağımın əsas səbəbi həmkarım Musa Quliyevin mən iclas salonunda olmayanda, çıxışımdan bir neçə saat sonra aldığı təlimat əsasında püskürdüyü iftira və öz dediyi kimi, mənim “daş”ıma “kəsək” lə cavab vermək cəhdidir.... Yüz belə məsələ olsun, Musanın səsi çıxmaz; amma elə ki, Gəncə icra başçısı sözü dilə gəldi, onun müdafiə arsenalı işə düşdü. Sən demə, Milli Məclisə elə buna görə seçilibmiş: “get, otur orda, nə iş görürsən gör, aylarla sus, ancaq əsas odur ki, bizim adımız çəkilən kimi, yalan-doğru, səsini qaldır”. Bu adam bilmir ki, mənim niyyətim Gəncə icra başçısını tənqid etmək deyil...”.

Gəncə Şəhər İcra Hakimiyyətinin başçısı Elmar Vəliyevin buna cavabı isə özünü çoz gözlətməyib. İcra başçısı Cümhuriyyətin banisi Məmməd Əmin Rəsulzadənin büstünün illərlə torba keçirilərək saxlanılması ilə bağlı qısa danışıb. O, musavat.com-a açıqlamasında bildirib ki, məsələnin ona aidiyyatı yoxdur: “Aidiyyatı üzrə müraciət edin. Həmin park Dəmiryol İdarəsinin balansındadır”.

Yəni, Elmar Vəliyev də Rəsulzadəyə qarşı bu cür hörmətsizliyə yol verənin o olmadığını bəyan edib.

Beləliklə, bu məsələdə ittiham olunan hər iki tərəf hadisəyə görə məsuliyyət daşımadığını bəyan edib. Bəs onda Rəsulzadənin büstü ilə bu cür davranışa görə, məsuliyyəti kim daşıyır?

Qəribə də olsa, həm media, həm ictimaiyyət nümayəndələri ilk gündən bu məsələdə ya icra başçısını, ya da Ziya Məmmədovu ittiham edib, onları günahkar göstərməyə çalışıb. Baxmayaraq ki, Rəsulzadənin büstü olan parkın Dəmiryol İdarəsinin balansında olduğu hamıya məlumdur. Ancaq bu qurumun rəhbərinin - Cavid Qurbanovun adını, sanki hamı unudub.

Həm Ziya Məmmədov, həm də Elmar Vəliyev bu məsələyə aidiyyatları olmadıqlarını bəyan etdiklərindən, qalır bircə Cavid Qurbanov!

Qeyd edək ki, Dövlət Dəmiryol İdarəsi Nəqliyyat Nazirliyinin tabeçiliyində olsa da, bu ilin fevralından qurumun rəhbərliyinə gətirilən Cavid Qurbanovun müstəqil hərəkət etdiyi, Ziya Məmmədovla hesablaşmadığına dair əsaslı iddialar var. Odur ki, bu məsələnin də məhz Cavid Qurbanovun iradəsi əsasında baş verdiyi istisna deyil.

Məsələ ondadır ki, nə Rəsulzadənin büstü həmin parka yeni qoyulub, nə də Ziya Məmmədov yeni vəzifəyə gəlib. Elmar Vəliyev də artıq neçə ildir ki, Gəncə Şəhər İcra Hakimiyyətinə rəhbərlik edir. Məntiqlə onlar Rəsulzadənin büstünü həmin parkda görmək istəməsəydilər, bunu indiyədək edərdilər.

Onlardan fərqli olaraq, Cavid Qurbanov Dövlət Dəmiryol İdarəsinin rəisi vəzifəsinə yeni gəlib - bu ilin fevralında. Gələn kimi də Dəmiryol İdarəsində, onun strukturlarında dəyişikliklərə başlayıb, qatarları yeniləməyə, İdarənin balansında olan obyektlərdə təmir-tikinti işlərinə start verib. Dəmiryol İdarəsinin balansında olan Gəncədəki parkda aparılan yenidənqurma işlərinin Cavid Qurbanovun tapşırığı ilə başladığı şübhə doğurmur. Elə Rəsulzadənin büstü də, böyük ehtimalla, onu tapşırığı ilə qapadılıb. Ancaq bu addımın parkdakı təmir işləri ilə əlaqədar atıldığı, yoxsa Rəsulzadənin büstünü ordan götürmək niyyətilə edildiyi, məlum deyil. Hər halda Cavid Qurbanovun Rəsulzadəyə qarşı düşmənçilik mövqeyində dayanan “kommunist başlılardan” olduğunu güman etmirik.

Murad Məmmədov

AzPolitika.info