Azərbaycan Yay Olimpiya Oyunlarında yeni idman növündə medal qazanıb.
"Report"un məlumatına görə, bu, "Rio-2016"da akademik avarçəkmə növündə kayakçı İnna Osipenko-Radomskayanın sayəsində reallaşıb. 1 nəfərlik qayıqla 200 metr məsafəyə yürüşə qatılan 34 yaşlı idmançı finişə 40,401 saniyəyə çataraq bürünc medala sahib olub.
Ölkəmiz müstəqillik əldə etdikdən sonra - 1992-ci ildə Barselonadan etibarən Yay Olimpiya Oyunlarında təmsilçiləri cüdo, idman gimnastikası, güləş, atıcılıq, boks və ağır atletika növlərində medal baxımından fərqlənmişdi. Avarçəkmə Azərbaycana Olimpiya medalı qazandıran 7-ci idman növü olub. Ölkəmiz bu yarışlarda ən çox güləşdə mükafat əldə edib - 14 medal.
Avarçəkmə kimi 1 medal qazanan ağır atletikadır ki, onu da milliləşdirilən legioner - bolqar Valentin Xristov "London-2012"-də bürünc medalla reallaşdırıb. Əslən Ukraynadan olan İnna Osipenko-Radomskayanın ardıcıl 4-cü olimpiadada 5-ci medalını qazanıb.
Xatırladaq ki, Azərbaycan akademik avarçəkmə növündə "Bakı-2015" I Avropa Oyunlarında da medal qazanmışdı. Bu, Mingəçevirdə keçirilən yarışda gümüş mükafat qazanan Valentin Demyanenkonun sayəsində gerçəkləşmişdi.
Şərhlər