BEYNƏLXALQ BANKDAN ŞOK QƏRAR - Müflisləşmə prosedurunu başlatmaq üçün ABŞ-ın yuridikasiyasına sığındı (Yenilənib)

Milyardlarla dollarlıq xarici borcunu ödəməyi dayandırdı

Kreditorlarla razılaşdırılacağı təqdirdə bankın 3.3 milyard dollarlıq xarici borcu dövlət borcu kimi yenidən rəsmiləşdiriləcək

Azərbaycan Beynəlxalq Bankı valyuta ilə olan milyardlarla dollarlıq xarici borcunu ödəməyi dayandırıb və borcların restrukturizasiyasını, yaxud dövlətə yüklənməsi prosesini başlatdığını elan edib. Virtualaz.org xəbər verir ki, bankın bu bəyanatı Qərb maliyyə dairələrində ciddi rezonans doğurub və Azərbaycanın beynəlxalq maliyyə bazarlarına buraxdığı borc sənədlərini dəyərdən salıb.

Azərbaycan Beynəlxalq Bankı ötən gün restrukturizasiya planını elan edərək bildirib ki, kreditorlarla razılaşdırılacağı təqdirdə bankın 3.3 milyard dollarlıq xarici borcu dövlət borcu kimi yenidən rəsmiləşdiriləcək. Habelə bank xarici borclar üzrə faiz ödəmələrini dayandırdığını elan edib və restrukturizasiya prosesində müflisləşmə prosedurunu başlatmaq üçün ABŞ-ın yuridikasiyası altına sığınıb. “Bloomberg” xəbər verir ki, Azərbaycan Beynəlxalq Bankı bir gün əvvəl Nyu-Yorkun Manhetten Federal Məhkəməsinə müflisləşmə ilə bağlı ərizə təqdim edib.

Bank bildirir ki, onun xarici valyuta ilə olan borclarının bir hissəsi Azərbaycan dövlətinin suveren borclarına transfer ediləcək. Və kreditorlarla anlaşma baş tutarsa borcların restrukturizasiyası mütləq xarakter daşıyacaq. Hazırda bankın borclarının üçdə ikisi xarici borclardır. ABŞ-da təqdim edilmiş məhkəmə sənədlərinə əsasən bank “Cargill Financial Services International Inc.” Şirkətini özünün ən iri kreditoru kimi təqdim edib.

“İNG Groep NV” investisiya şirkətinin Moskvadakı baş kredit analitiki Yeqor Fyodorov agentliyə açıqlamasında deyib: “Biz nəhayət ümid edirik ki, hökumət nəhayət kreditorlar üçün məqbul və ağrısız həll yolu təklif edəcək”.Analitik əlavə edib ki, Azərbaycan hazırda beynəlxalq maliyyə bazarlarında investorları cəlb etmək üçün bir çox addımlar atır və belə bir vaxtda Beynəlxalq Bankın borclarının restrukturizasiyası risklərin neqativ qarşılanmasına səbəb olacaq.

“Bloomberg” Azərbaycan hökumətinin indiyə qədər bankın 10 milyard dollarlıq toksik aktivlərini aldığını, bankın sağlamlaşdırılması tədbirlərini dəstəkləmək üçün Neft Fondunun kapitalı hesabına orada 1.3 milyard dollar depozitin yerləşdirildiyini xatırladır. O da xatırladılır ki, bankın keçmiş sədri Cahangir Hacıyev mənimsəmədə və vəzifə səlahiyyətlərini aşmaqda günahlandırılaraq 15 il həbs cəzası alıb. Hacıyev məhkəmədə bankın bu vəziyyətə düşməsində keçmiş milli təhlükəsizlik naziri Eldar Mahmudovun rolunun olduğunu inkar edib.

“Bloomberg” onu da xəbər verir ki, Azərbaycan Beynəlxalq Bankının restrukturizasiya planını elan etməsindən sonra bankın beynəlxalq maliyyə bazarlarına buraxdığı 500 milyon dollarlıq istiqrazın dəyəri 16 faiz aşağı düşüb, bank istiqrazların gəlirlilik dərəcəsini 9.45 faizdən 14.8 faizə qaldırmalı olub. Habelə Azərbaycan dövlətinin 2014-cü ilə qədər ödənilməsi şərti ilə buraxdığı istiqrazıların dəyəri kəskin düşüb.

Agentlik bildirir ki, maliyyə naziri Samir Şərifov Beynəlxalq Bankın sağlamlaşdırılmasının Azərbaycanın maliyyə sistemi üçün həyati əhəmiyyət kəsb etdiyini bildirib. Nazirin sözlərinə görə, restrukrutizasiya prosesi ərzində heç bir əmanətçinin depoziti zərər görməyəcək. Bununla belə bankın Azərbaycan Dövlət Neft Fonduna 500 milyon dollar borcu var. Habelə 500 milyon dollarlıq borc istiqrazları buraxıb. Eləcə də “Societe Generale SA”, “Commerzbank AG”, “Intesa Sanpaolo SpA” və “Cargill” kimi qlobal maliyyə bazarlarının aparıcı oyunçularına milyardlarla dollarlıq borcu var.

Bildirilir ki, bankın xarici borclarının restrukturizasiyası ilə bağlı təkliflər investorlara mayın 23-də White & Case LLP”-nin ofisində təqdim ediləcək. Bankın bu məsələdə məsləhətçisi qismində “White & Cas” və “Lazard Freres” şirkətləri çıxış edirlər.

ABŞ məhkəməsinə təqdim edilmiş müflisləşmə iddiasının məqsədi isə bankın Birləşmiş Ştatlardakı dörd müxbir hesabını qorumaqdır. Həmin hesablar bankın dollar əməliyyatları üçün istifadə olunur. Ərizədə göstərilir ki, bankın restrukturizasiyası planına mane olmamaq üçün istənilən kreditorların iddiası bloklansın. İddia ABŞ-ın müflisləşmə Məcəlləsinin 15-ci maddəsinə əsasən qaldırılıb.

Bu maddə xarici şirkətlərin aktivlərini restrukturizasiya zamanı kreditorlardan qorumağa imkan verir. Başqa sözlə, Azərbaycan Beynəlxalq Bankı ABŞ qanunvericiliyindən yararlanır ki, borclarının dövlətə dövr edilməsi prosesində xarici kreditorlar onun aktivlərini dondura və borcların əvəzində ələ keçirə bilməsin. Lakin bildirilir ki, ABŞ qanunvericiliyinə əsasən kreditorlar resturukturizasiya prosesinin ədalətli olmadığı qənaətinə gələrək Azərbaycan Beynəlxalq Bankının bu qoruma tədbirini şübhə altına alaraq iddianın təmin edilməməsini tələb edə bilərlər.

Bankın məhkəməyə təqdim etdiyi iddiada göstərilir ki, Azərbaycan Beynəlxalq Bankı borclarının restrukturizasiyasını başladıb. Daxili borclar ötən ilin fevralından dövlətə dövr edilib. Bu ilin mart ayında isə bank “Cargill” qarşısında olan əsas borcunu ödəmək qabiliyətində olmayıb, borcun ödənilməsi müddəti iki dəfə uzadılıb.

Bildirilir ki, bu baş verənlər Beynəlxalq Bankın əsas səhmdarı olan Azərbaycan dövlətinin banka dəstəyi davam etdirmək planlarından xəbər verir. Maliyyə Bazarlarına Nəzarət Palatasının rəhbəri Rüfət Aslanlı bildirib ki, bankın maliyyə və kapital göstəricilərinin aşağı düşməsinin davam etməsi ciddi narahatlıq doğurur. Ona görə də bankın təklif etdiyi restrukturizasiya planının dəstəklənməsi nəinki Beynəlxalq Bank, eləcə də Azərbaycanın bütövlükdə maliyyə sistemi üçün kritik əhəmiyyətə malikdir.

***

Bankın mətbuat xidmətindən "APA-Economics"ə verilən məlumata görə, qərara əsasən, ABB-nin xarici öhdəliklərinin könüllü restrukturizasiyası prosesi zamanı xarici kreditorlar bankın aktivlərinə qarşı tələblər irəli sürə bilməyəcək.

"Bəyan etdiyimiz kimi, ABB-nin xarici kreditorlar qarşısındakı öhdəliklərinin könüllü restrukturizasiyası planı bankın maliyyə vəziyyətinin güclənməsinə xidmət edir. Bu proses nəticəsində ABB-nin uzunmüddətli maliyyə dayanıqlılığı təmin olunacaq və özəlləşdirmə öncəsi bankın bazar dəyəri artacaq. Bu prosesin önəmli istiqamətlərindən biri də restrukturizasiya zamanı xarici kreditorların ABB-nin xarici ölkələrdəki aktivlərinə qarşı hər hansı iddialar irəli sürməməsinə nail olmaqdır. ABB xarici öhdəliklərinin restruturizasiyası prosesinin ABŞ-da tanınması və bu səbəbdən kreditorlar tərəfindən ABŞ məhkəmələri vasitəsilə onun aktivlərinə qarşı iddia qaldırılmasının qarşısının alınması məqsədilə Nyu-York Məhkəməsinə müraciət etdi. Bu müraciətimiz məhkəmə tərəfindən təmin olundu. Bütün bunlar, restrukturizasiya prosesini uğurla həyata keçirməkdən ötrü lazımi addımların atıldığını göstərir", - deyə ABB-nin İdarə Heyətinin sədri Xalid Əhədov məhkəmə qərarını şərh edərkən bildirib.

Məlum olduğu kimi, ABB-nin bir sıra xarici maliyyə institutlarından cəlb etdiyi xarici valyutada borcların bu plana uyğun olaraq birbaşa dövlətə ötürülməsi nəzərdə tutulur. Bu proses bankın yalnız xarici öhdəliklərini əhatə edir, bütün digər öhdəliklər, o cümlədən Azərbaycan Respublikası vətəndaşlarının, hüquqi şəxslərin və digər qeyri-rezidentlərin milli və xarici valyutada qorunan və qorunmayan, tələbli (cari) və müddətli əmanətləri üzrə əməliyyatlar isə cari rejimdə həyata keçirilir. Açıqlamada bir daha bildirilib ki, banka yerləşdirilmiş əmanətlər üzrə fərdi və korporativ müştərilərə faiz ödənişləri də daxil olmaqla ABB bütün xidmət və əməliyyatları adi qaydada davam etdirməkdədir.