Azərbaycan Beynəlxalq Təhsil Kompleksinin ümumtəhsil müəssisələri və “Araz Kursları” MMC-nin fəaliyyətinin dayandırılması haqqında qərar verilib.

Azərbaycan Respublikası Dövlət Neft Şirkətinin (ARDNŞ) mətbuat xidmətindən APA-ya verilən məlumata görə, ARDNŞ-nin həmtəsisçi olduğu “Azərbaycan Beynəlxalq Təhsil Mərkəzi” İctimai Birliyinin (ABTM) iyunun 18-də toplantısı keçirilib.

Toplantıda Azərbaycan Beynəlxalq Təhsil Kompleksinin (ABTK) nəzdində fəaliyyət göstərən “Araz Kursları” MMC, onun təsisçisi olduğu digər qurumların və ümumtəhsil məktəblərinin fəaliyyəti ilə bağlı ABTM-də yaranmış əlavə xərclərin qarşısının alınması və bu layihənin maliyyə və idarəetmə baxımından mürəkkəbliyini nəzərə alaraq qeyd olunan qurumların ləğv edilməsi məqsədəmüvafiq hesab edilib.

Birliyin ümumi yığıncağında o da qeyd olunub ki, “Araz Kursları” MMC-nin fəaliyyəti ali təhsil müəssisələrinə qəbul imtahanları başa çatanadək davam etdiriləcək və ABTK-da təhsil alan və əmək münasibətlərində olan şəxslərin hüquqları və qanuni mənafeləri qanunvericiliyə uyğun şəkildə təmin olunacaq. Belə ki, hər bir təsisatda təhsil alan və çalışan şagird və pedaqoji heyətin yeni dərs ili başlayanadək müvafiq qaydada yerləşdirilməsi üçün lazımi tədbirlər görüləcək.

Qeyd edək ki, Azərbaycan Beynəlxalq Təhsil Kompleksinin tərkibinə bir neçə bağça, ölkənin müxtəlif bölgələrində 11 lisey, "Araz" hazırlıq kursları və "Qafqaz" Universiteti daxildir.

AzPolitika.info xatırladır ki, Azərbaycan cəmiyyətində bu təhsil müəssisələri "Gülən camaatı"na məxsus müəssisələr kimi tanınır. Azərbaycan hakimiyyəti daxilində bir neçə aydır başlamış "nurçu" əməliyyatı fonunda yuxarıda barəsində bəhs olunan qərar maraq doğurur. Belə görünür ki, siyasi hakimiyyət bəlli səbəblərdən bu təhsil müəssisələrinin fəaliyyətini məqsədəuyğun hesab etməyib. BU QƏRAR "GÜLƏN CAMAATI"NA AZƏRBAYCANDA ƏN SARSIDICI ZƏRBƏ KİMİ QİYMƏTLƏNDİRİLƏ BİLƏR. 

V.Nəsibov