“TOY BİZNESMENLƏRİ HARA YOXA ÇIXIB?” – Dəstək fonduna cəmi 6 restoran ianə köçürüb...

Deputat, Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov koronavirus pandemiyası ilə bağlı yaranmış vəziyyətdən istifadə edərək, toy adət-ənənələrimizi yenidən nəzərdən keçirməyi təklif edib.

“AzPolitika.info” xəbər verir ki, S.Qurbanov mövzuya dair feysbuk statusunda toy biznesini idarə edənlərin pandemiya günlərində “yoxa çıxmalarına” diqqəti çəkərək, yazır:

“Azərbaycan xalqının adət-ənənələri sırasında ən başlıca yeri toy etmək, oğul evləndirib, qız ərə vermək tutur. Toy yeni bir ailənin təməlqoyma mərasimidir. Hətta mən deyərdim ki, övlad toyu görmək bizdə hər ata-ananın həyatının mənasına, mahiyyətinə çevrilib. Təsadüfi deyil ki, bir insan vaxtsız dünyasını dəyişəndə, ilk növbədə onun övladlarının toyunu görüb-görmədiyi soruşulur. Hə cavabını eşidəndə rəhmətə gedən haqqında “gözü dolu getdi” deyirlər. Bax, biz belə ovlad sevən xalqıq...

Ta qədimdən toy ərəfəsi və sonrası bütün qohum-əqrəba toy evinə yığılar, yeni qurulacaq ailənin çatışmayanlarını müəyyən edər və hər kəs imkan daxilində yeni qurulan ailənin təməlinin möhkəm olması üçün maddi və mənəvi köməklik göstərərdi. Təəssüf ki, son illərdə toylar mahiyyətini dəyişib, bir növü rəqabət meydanına çevrlilib. Bəzi işbazlar isə bu tendensiyadan sui-istifadə edərək, münbit psixoloji mühit, saxta rəqabət mühiti formalaşdırıb, fundamental ailə dəyərlərinin zədələnməsi hesabına küllü miqdarda pul qazanırlar. Mən toy biznesini idarə edənləri, ölkə boyu sıralanan şadlıq saraylarını, restoranları nəzərdə tuturam. 

Maraqlıdır, illik dövriyyələri çox böyük rəqəmlərlə ifadə olunan “toy biznesmenləri” xalqımızın bu ağır günündə niyə gözə dəymirlər? İndi onlardan soruşmaq lazımdır: belə çətin günlərdə koronavirusla mübarizədə dövlətə dayaq oldunuzmu, cənab Prezidentin dəstək çağırışlarına qoşuldunuzmu? İmkansız, aztəminatlı ailələrə yardım etdinizmi?”

Komitə sədri müşahidələrinə əsasən deyir ki, “toy biznesmenlərinin” əksəriyyəti yoxa çıxıb. Koronavirusla mübarizəyə Dəstək Fonduna ianə köçürən, ehtiyacı olanlara yardım kampaniyası aparan böyük restoran, şadlıq evi sahibləri barmaqla sayılacaq qədər azdır.

“Necə deyərlər, hər işdə bir xeyir var. Fikrimcə, düşdüyümüz bu vəziyyət tələb edir ki, bir daha düşünüb-daşınaq, mövcud toy adət-ənənələrimizə yenidən baxaq. Toylarımızı əvvəlki məcrasına qaytaraq, xüsusən imkansız ailələri illərlə davam edən maddi-mənəvi çətinliyə salan mənasız bəhsəbəsdən, “el nə deyər” düşüncəsindən xilas edək. Belə psixoloji mühitdən sui-istifadə edərək asan yolla böyük pullar qazanan, lakin xalqın ağır günlərində gözə görünməyən işbazlara da bundan sonra çox da fürsət verməyək”.

“AzPolitika” deputatın bu çağırışından sonra Azərbaycan iqtisadiyyatında həqiqətən də böyük payı olan toy biznesinin koronavirusla mübarəzəyə yardım məqsədilə yaradılmış Dəstək Fonduna nə qədər ianə köçürdüyü ilə maraqlanıb. Məlum olub ki, həqiqətən də Prezidentin yardım çağırışına qoşulan şadlıq sarayı və restoranların sayı barmaqla sayılacaq qədər azdır. Daha dəqiqi, cəmi 6 restoran və şadlıq sarayı fonda ianə köçürüb. Onlar aşağıdakılardı:

“Altun” şadlıq sarayı - 20 min manat

“Böyük Saray” MMC - 100 min manat

“Xəmsə M” MMC - 3500 manat

“Niaqara” və “Cratos” restoranları - 50 min manat

“Mübarək” Şadlıq Sarayı (Quba) - 100 manat

“Ulduz” Şadlıq Sarayı - 700 manat

İstisna deyil ki, daha 20-30 restoran, şadlıq sarayı sahibi də fonda fiziki şəxs kimi ianə köçürüb. Lakin nəzərə alsaq ki, təkcə Bakıda irili-xırdalı restoranların, şadlıq saraylarının sayı yüzlərlə, bəlkə minlərlə ölçülür, deputata haqq verməmək olmur…

“AzPolitika”

635x100

Şərhlər

Azer 2020-04-21 21:39:35

Dediyiniz “ SARAY”larin yarisi nazirlerindir, yarisi da deputatlarin...

BAKILI 2020-04-21 13:36:09

Hərəsinin 10 dene zali var kecirtdikləri pula bax

Son yazılar