Gürcüstanın Marneuli rayonunun Sadaxlı kəndində yerli azərbaycanlı və ermənilər arasında qarşıdurma olub.
“Report”un yerli bürosu xəbər verir ki, hadisəyə kəndin polis idarəsində işləyən erməni əsilli əməkdaşın oğlunun etdiyi hərəkət səbəb olub.
“Sadaxlı Dirçəliş İttifaqı”nın sədri Sabir Mehdiyev bildirib ki, Şaumyan kəndindən olan həmin şəxs Ermənistan dövlət nömrə nişanlı avtomobili ilə kəndin mərkəzində təhlükəli vəziyyət yaradıb: “O, yolda azərbaycanlı gənclərin olduğu avtomobilin qarşısını kəsib və nalayiq hərəkətlərə yol verib. Gəncin əməllərindən hiddətlənən kənd sakinləri onu saxlayıb və tərəflər arasında mübahisə, daha sonra isə fiziki qarşıdurma yaranıb. Erməni gənc azərbaycanlıların ünvanına təhqir, söyüş işlədib və hədə-qorxu gəlib”.
Təşkilat rəhbəri deyib ki, kənd sakinləri gəncin atasının polis sıralarından istefa verməsi tələbi ilə aksiya keçiriblər: “Hazırda kənddə vəziyyət sakitdir və insidentlə bağlı araşdırmaya başlanılıb”.
Şərhlər
vallah utancvericidir,Sadaxlı kəndi 100%azərbaycanlılardan ibarət Gürcüstanda ən böyük kəndlərdən biridir,təxminən 10 min əhalisi var,necə olur ki,ora gürcülər gətirib erməni polis təyin edir,bəs bu əhali niyə onda susurdu?bizimkilər birlik yarada bilməyən,xaotik hərəkət edən,təşkilatlanmayan bir camaatdır.Ona görə problem olanda ayılıb görürlər ki,heç onları adam yerinə sayan yoxdur.Azərbaycan respublikası oranın azərbaycanlı əhalisinin maarifləndirməli,onlara hüquqi yardım göstərməlidir,yoxsa vaxt gələcək onları da oralardan qovacaqlar,hələ gec deyil.