QƏRİB MƏMMƏDOV VƏ ETİBAR PİRVERDİYEVİN ADI CİNAYƏT DOSYESİNDƏ- "Komitə sədrinə qızıl fiqur hədiyyə verdim"

"Etibar Pirverdiyev dedi ki, ona Sumqayıtdakı texnoparka işçi lazımdır, yanıma gələrsən, oturub söhbət edərik"

(YENİ HİSSƏ YAZININ ARDINA ƏLAVƏ OLUNUB)

Bakı Ağır Cinayətlər Məhkəməsinin keçmiş hakimi Həsən Əliyevin adı keçən qalmaqallı cinayət işi ilə bağlı yeni faktlar ortaya çıxıb. Daha dəqiqi Həsən Əliyevə vəzifəyə düzəlmək üçün 600 min manat verdiyini bildirən iş adamı Ramazan Səlimovun istintaqa ifadəsi yayılıb.

Xatırladaq ki, hazırda Ağır Cinayətlər Məhkəməsində baxılan cinayət işinin materiallarına görə Həsən Əliyev Ramazan Səlimova vəzifədə olan tanışları vasitəsilə onu 1 milyon dollar müqabilində icra başçısı təyin etdirəcəyinə dair vəd verib. Həmin pulun 600 min manatını da ondan alıb, lakin vədini yerinə yetirməyib. Ramazan Səlimov Həsən Əliyevin dələduzluq yolu ilə onun pullarını mənimsədiyi barədə hüquq-mühafizə orqanlarına müraciət edib.

Bundan sonra Həsən Əliyevin hakimlik fəaliyyətinə xitam verilib və barəsində cinayət işi başlanıb. O, Cinayət Məcəlləsinin 178.3.2-ci (külli miqdarda ziyan vurmaqla dələduzluq) və 312.2-ci (vəzifəli şəxs tərəfindən bilə-bilə qanunsuz hərəkətlər (hərəkətsizlik) etməyə görə ona rüşvət vermə) maddələrilə ittiham olunur. Lakin keçmiş hakim həbs olunmayıb. Onun barəsində başqa yerə getməmək haqqında iltizam qətimkan tədbiri seçilib. Hazırda bu iş məhkəmə istintaqı mərhələsindədir. Bu hadisənin başqa bir iştirakçısı da var: Elman Məmmədov. Həsən Əliyevdən fərqli olaraq Elman Məmmədov həbs olunub. Ondan əlavə Həsən Əliyevlə əlaqdə olan daha bir nəfər – Taleh Süleymanov barəsində isə həbs-qətimkan tədbiri seçilib

Bu işlə bağlı həmçinin Nərimanov rayon prokuroru Fikrət Mahmudov və prokuror müavini Cavid Quliyev tutduqları vəzifədən azad edilib, rayon prokurorunun köməkçisi Samir Məmmədov isə prokurorluq orqanlarından xaric olunub. Baş prokuror Zakir Qaralov mətbuata açıqlamasında prokurorluq işcilərinin də cinayət məsuliyyətinə cəlb olunacağını istisna etməyib. İndisə keçək yeni təfərrüatlara. “Azadlıq” qəzetnin əldə etdiyi istintaq materiallarından bəlli olur ki, Həsən Əliyevə Ramazan Səlimovu işə düzəltmək üçün xeyli məmurla görüşdürüb.

Ramazan Səlimov[/caption]

Ramazan Səlimov daha sonra bildirir ki, Həsən Əliyev ona növbəti dəfə zəng vuraraq “Fəvvarələr meydanı”na gəlməsini və saat 14.00-da Nizami adına Ədəbiyyat Institutunun qarşısında bir həkimlə görüşməyi tapşırıb: “O mənə həmin həkimin indi unutduğum mobil telefon nömrəsini də verərək qeyd olunan şəxsin yüksək vəzifələrdə işləyən şəxslərlə geniş əlaqələrinin olduğunu və mənim icra başçısı təyin olunma məsələmi həll edəcəyini söylədi. Mən həmin həkimə zəng vurdum və onunla ”Fəvvarələr meydanı"nda görüşdüm. Onun adını unutmuşam. O, Bakı şəhərində hansısa özəl tibb mərkəzində işlədiyini, əslinin Şabran rayonundan olduğunu, Şabran rayon icra hakimiyyətinin başçısı vəzifəsində işləmiş qadının qardaşı olduğunu bildirdi. Dedi ki, Həsən müəllimin xahişi ilə başçı təyinatımın həlli məqsədilə məni lazımi adamlarla görüşdürəcək və bu işdə hər hansı marağı yoxdur. Əlavə etdi ki, işin həll olunanda nə verərsən-verərsən. O, məni bir nəfərlə görüşdürəcəyini vəd edib iki saat ərzində həmin şəxsə zəng vursa da, görüş baş tutmadı. Onunla sağollaşıb ayrıldım və piyada Həsən Əliyevin iş yerinə gəldim. Məhkəmənin qarşısında Həsən Əliyevin qara rəngli 003 qeydiyyat nişanlı “Range Rover” markalı avtomaşınına mindik və Tbilisi prospektində yerləşən adını bilmədiyim restorana girdik. Bu görüşdə Həsənə işimin həlli ilə əlaqədar nəticə olmadığını dedim və bildirdim ki, əgər belə olacaqsa ümumiyyətlə mənə iş lazım deyil".

Oxucuların diqqətinə çatdıraq ki, Şabranın qadın icra başçısı Sündüz Babayeva olub. O, 1995-ci ildən 2007-ci ilə qədər bu vəzifədə işləyib. Sündüz Babayevanın Altay Babayev adlı qardaşı keçmiş polis rəisi olub. Ramazan Səlimovla görüşən həkimin həqiqətən də Sündüz Babayevanın qardaşı olduğunu söyləyə bilmərik.

Həsən Əliyev iş adamına hansısa fonda yarım milyon köçürməyin vacib olduğunu deyib

Ramazan Səlimov daha sonra bildirir ki, Həsən Əliyev ona hansısa fonda pul köçürməyin vacib olduğunu deyib. Onun sözlərinə görə, bunu keçmiş hakimə işlə bağlı görüşdüyü şəxslər deyib. Ramazan Səlimov söhbətin hansı fonddan getdiyini bilməyib: “O, söhbəti konkretləşdirib mənim icra başçısı təyinatım üçün razılaşdığımız məğbləğin yarısının, yəni 500.000 dolların fonda köçürülməsi üçün verməyimi israrla tələb etdi. Həsən məni o qədər nüfuzlu, yüksək vəzifəli şəxslərlə görüşdürdüyündən ona inanırdım. Bu səbəbdən ona dedim ki, 500.000 dollar yox, 300.000 manat verə bilərəm. 21.12.2011-ci ilə kimi Həsən hər gün mənə zəng vurub bu pulu tələb etdi, mənə deyirdi ki, lazımi adamlar bizi gözləyir, hətta narazılıq etməyə başladı ki, əgər pul verməyəcəkdinsə niyə məni bu işə qoşdun, mən sən işin üçün elə adamlara ağız açmışam ki, indi dala dursaq lap biabırçılıq olacaq, mənim öz hakimlik işim də düzəlməyəcək. Nəhayət 21.12.2011-ci ildə günortadan sonra onunla görüşüb ”Kişmiş" restoranında çörək yedik, Həsən 300.000 manat pulun bu gün verilməli olduğunu bildirdi. Mən əlacsız qalıb həyat yoldaşıma zəng vurdum və ona dedim ki, əmanətdən 3 dənə gətirib bizə çatdır. O əvvəlcə etiraz etsə də, onu inandıra bildim. Yoldaşımın restorana gəlməməsi üçün ona Atatürk prospektində yerləşən “Samsung” mağazasının qarşısına gəlməsini tapşırdım. Orada onun gətirdiyi 300.000 manat pulu alıb Həsənin maşınına qayıtdım. Pullar qara rəngli “kleyok”un içində olmaqla 30 ədəd 100-lük bağlamalarda idi. Həsən bağlamaları saydı, bağlamaların içindəki əskinasları saymadı. Özünün maşınında olan iş qovluğunu və şəxsiyyət vəsiqəsini çıxartdı, mənə qəbz yazıb verdi ki, məndən 300.000 manat pulu borc kimi alıb. Qeyd edim ki, mənim ondan qəbz almaq barədə heç fikrim də olmayıb. Sonra dedi ki. maksimum 2012-ci ilin yanvarın axırı, fevralın əvvəlində səni çağıracaqlar. Daha sonra o mənə tövsiyyələr verməyə başladı, dedi ki, toylara getmə, səni izləyəcəklər, yoxlayacaqlar, narahat adamlarla görüşmə, telefon danışıqlarına fikir ver, sənin danışıqlarına qulaq asa bilərlər, 180 dərəcə dəyiş, dövlətçiliyə aid kitablar oxu. Mən ona söz verdim və ondan ayrılıb evə gəldim".

İdarə rəisinə 1100 manatlıq nərdtaxta

Lakin Həsən Əliyev daha sonra Ramazan Səlimova zəng vuraraq ona deyib ki, “Azərsu” Açıq Səhmdar Cəmiyyətinin Bakı sukanal idarəsinin rəisi Habil Quliyevlə görüşməyi tapşırıb: “Dedi ki, Habil müəllim səni gözləyir, onunla görüş, səni Bakı şəhərinin rayonlarından birinə idarə rəisi qoyacaq. Mən pul, hədiyyə məsələsini üstüörtülü soruşanda Həsən dedi ki, o məsələ açılan kimi deyərsən ki, həmin məsələləri Həsən müəllim həll edəcək, o işlərə qarışmırsan. Həsən mənə Habilin yaxşı nərd oynayan olduğunu dediyi üçün yenə də Həsənin tapşırığına əsasən Habilə vermək üçün internet vasitəsilə 1100 manata sədəfli nərdtaxta aldım. Onu da götürüb Bakı Sukanal Baş Idarəsinə gəldim və soyadını bilmədiyim Habil müəllim adlı şəxslə görüşdüm. Habil müəllim deyilən şəxs yaşlı kök adamdır, Həsən mənə demişdi ki, o əvvəllər Dövlət Neft Şirkətində həmkarlarda işləyib. Hədiyyəmi ona təqdim etdim və Habil məni yaxşı qarşıladı, söhbətlərimiz bir-birimizin xoşuna gəldi, mənə çox razı qaldığını dedi. Söhbət zamanı Habil mənə dedi ki, o Həsən Əliyevi tanımır, məni qəbul etməyi və iş məsələmi həll etməyi ondan Nazirlər Kabinetində hansısa şöbənin rəisi vəzifəsində işləyən, soyadını bilmədiyim Mübariz adlı şəxs xahiş edib. Habillə aramızda pul söhbəti olmadı, o mənə onu dedi ki, özü birbaşa müdir vəzifəsinə işçi götürə bilmir. Bunu mütləq ”Azərsu" ASC-nin sədri ilə razılaşdırmalıdır. O, söhbət əsnasında mənə Nəsimi və Xətai rayonlarının sukanal idarəsinin rəisi vəzifəsini təklif etdi, mən də Xətai rayonunu seçdim. Onun yanından çıxıb, söhbətin nəticəsini Həsənə zəng vurub dedim. Bir müddət gözləsəm də, hər hansı xəbər çıxmadı".

"İdarə rəisi təyin olunmağımın 100-200.000 manat xərci olacağını dedi"

Ramazan Səlimov deyir ki, bundan sonra Həsən Əliyevin tapşırığı ilə Birləşmiş Sukanal Idarəsinin (Ramazan Səlimov bu qurumun adını Rayonlararası Sukanal Idarəsi kimi qeyd edib) rəisi Etibar Məmmədovun qəbuluna gedib: “Əvvəlki ifadəmdə mən onun adını səhvən Ərəstun kimi göstərmişəm. Əslində Ərəstun Etibar müəllimin köməkçisidir və mən qəbulla bağlı onun yanında olmuşdum. Bu səbəbdən adları qarışıq salmışam. Həsən Əliyev mənə dedi ki, Etibar müəllimlə danışılıb, səni ya Abşeron, ya da Sumqayıtın sukanal idarəsinə rəis təyin edəcəklər. Yenə də mənə işarə etdi ki, hər hansı pul söhbəti etmə, soruşsalar de ki, o məsələləri Həsən müəllim həll edəcək. Həsənin tapşırığına əsasən Mərkəzi Univermağın ikinci mərtəbəsindəki mağazadan brillyant qaşlı ”Polyot" markalı qol saatını Etibara vermək üçün hədiyyə kimi 1350 manata satın aldım və soyadını bilmədiyim, Həsənin dediyinə görə Dövlət Neft Şirkətinin rəhbərinin yaxın qohumlarından olan Etibarın qəbuluna getdim və hədiyyəmi ona təqdim etdim. Sonuncu mənimlə söhbətində Sumqayıt şəhərinə idarə rəisi təyin olunmağımın 100-200.000 manat xərci olacağını dedi. Mən ona bu məsələlərə qarışmadığımı və bu işləri Həsən müəllimin həll edəcəyini deyəndə, o, təəccüblə məndən Həsənin kim olduğunu soruşdu.

Nazirlər Kabinetində işləyən Mübariz adlı şəxs kimdir?

Mən ona Həsənin məni onun yanına göndərən şəxs olduğunu dedim. O yenə də təəccüblə mənə dedi ki, səni mənim yanıma Nazirlər Kabinetində işləyən Mübariz adlı şəxs göndərib və mənim yanımda Mübarizə zəng etdi. Ona dedi ki, həmin yoldaş yanıma gəlib, hansısa Həsənin adını çəkir. Bu nə məsələdir? Mübarizin ona nə deməsini eşitmədim, ancaq bu danışıqdan sonra Etibar narazı tərzdə mənə dedi ki, o Həsən adlı hakim tanımır, məni Mübariz müəllimin xahişi ilə qəbul edibdir və özünün Vəli Həsənov soyadlı müavinini otağına çağırtdıraraq ona mənim sənədlərini qaydaya salmağı tapşırdı. Həmin müavin “Qaçqınkom”un sədri Əli Həsənovun qardaşı idi və mənə anket verib doldurmağı tapşırdı. Mən anketi doldurduqdan sonra mənimlə əlaqə saxlayacaqlarını dedi. Onların yanından çıxan kimi görüş barədə Həsənə zəng vurub məlumat verdim, Həsən mənim üstümə düşdü ki, sən niyə mənim adımı çəkmisən. Mən dedim ki, axı sən mənə adını çəkməməyi tapşırmamışdın, mən hardan bilim ki, sənin adını çəkmək lazım deyil. Qeyd edim ki, aldığım hədiyyələr barədə Həsənə məlumat vermişdim və onun bunlardan xəbəri var idi. Təxminən 3 gündən sonra, mənə Rayonlararası Su-Kanal Idarəsindən zəng gəldi və bildirildi ki, sənin təqdimatını yazıb göndərmişik, get “Azərsu” cəmiyyətinə, səni sədrin müavini Teyyub müəllim qəbul edəcək.

"“Azərsu” sədrinin müavininə hədiyyəmi təqdim etdim"

Bu barədə Həsən Əliyevə zəng vurub dedim, o tapşırdı ki, həmin şəxsə bir dənə dəri materialdan əl çantası al və hədiyyə apar. Mən Mərkəzi Univermağın yanındakı türk dəftərxana mağazasına girib 320 manata əl çantası və 80 manatlıq müxtəlif qələmlər alıb qablaşdırdım və “Azərsu” ASC-yə gəldim. ASC-nin sədr müavini işləyən şəxsin ikinci mərtəbədəki otağına girdim və hədiyyəmi ona təqdim etdim. Onun mənim gəlişimdən məlumatı var idi, məni çox yaxşı qəbul etdi, Abşeron rayon Sukanal Idarəsinə rəis vəzifəsinə təyin olunmağım barədə təqdimatın verildiyini dedi, işimin əsas sahələrini, strukturunu təmkinlə, savadlı surətdə izah edərək bir azdan ASC-nin sədri Qorxmaz Hüseynovun qəbuluna gedəcəyimizi dedi. Ancaq gözləsək də Qorxmaz Hüseynov işə gəlmədi, məlum oldu ki, sədr təcili surətdə Qobustan rayonuna getməli olub.

Bir müddət sonra mən yenə “Azərsu” ASC-yə gəldim, ancaq bəlli oldu ki, Teyyub müəllim Cənubi Koreyaya ezamiyyətə gedib və iki həftədən sonra olacaq. Mən Etibarın müavini Vəli Həsənova zəng vurdum, ona dedim ki, bəlkə Etibar müəllim özü Qorxmaz Hüseynova zəng vursun və sonuncu məni qəbul etsin. Ancaq Həsənov mənə dedi ki, səni ancaq Teyyub müəllim Qorxmaz Hüseynova təqdim edə bilər. Bütün baş verənlər barədə Həsən Əliyevə zəng vurub dərhal məlumat verirdim. Həsən hər dəfə danışanda mənə deyirdi ki, o məsələ həll olunub, narahat olma. 2012-ci ilin yanvar ayında Teyyub müəllimlə telefonla danışdım və sonuncu mənə 20 yanvardan sonra gəlməyi tapşırdı. 24.01.2012-ci ildə bazar ertəsi gün onun qəbuluna getdim, mənə dedi ki, Qorxmaz Hüseynov sənin təyinatına razıdır, ancaq Abşeron rayon və Sumqayıt şəhər Sukanal idarələrinin rəislərinin işdən çıxarılması 1-2 ay çəkəcək ona görə də məsləhətdir ki, bir az gözləyəsən. Mənə Quba, Qusar rayonlarını təklif etdi, ancaq mən imtina etdim".

----------

“Azəriqaz”ın sədr müavini dedi ki, onlarda paket sistemi tətbiq olunur"

Ramazan Səlimovun sözlərinə görə, 1 həftədən sonra Həsən Əliyev ona zəng vuraraq onu “Azəriqaz”ın sədr müavini Zahid Səfərovun qəbuluna göndərib: “Dedi ki, ”Azərsu" məsələsi uzanır, bu isə bizə sərf etmir, gəl səni qaz sisteminə işə düzəldək, “Azəriqaz”ın sədr müavini Zahid Səfərov səni qəbul edəcək. Həsən ona hədiyyə almağı tapşırdı. 2012-ci ilin fevral ayının 23-də Hökumət Evi ilə üzbəüzdə yerləşən “Ideal” mağazasından 370 manata kişi ətirlərinin dəstini aldım və qablaşdırıb “Azərqaz”a getdim. Zahid müəllim artıq məni gözləyirdi, hədiyyəmi ona verdim və oturub söhbət etdik. Ona məni Həsən müəllimin göndərdiyini dedim, Zahid Həsəni tanıyırdı. Zahid mənə dedi ki, onlarda rüşvət yoxdur, paket sistemi tətbiq olunur, bir ay plan dolmasa dərhal işdən çıxarılacaqsan. Yenə də sənədlərimi təqdim etməyimi istədi, onun yanından çıxıb “Azərsu” ASC-yə gəldim və Teyyub müəllimin yanına girdim. Ondan soruşdum ki, mənim işim necə oldu? O, məsələnin uzandığını deyəndə sənədlərimi geri istədim və həmin sənədləri də gətirib Zahid müəllimə təqdim etdim. Zahid müəllim dedi ki, 2 həftəyə əlaqə saxlayacaq. 2012-ci ilin səhv etmirəmsə mart ayında Həsən mənə zəng vurub dedi ki, Zahid səni gözləyir, get onun yanına. Zahidi 1 saat gözləyəndən sonra yanına girə bildim, o mənə dedi ki, səni Xətai rayon qaz idarəsinin plan şöbəsinə müdir təyin edirik. Mən imtina etdim, Zahid mənə dedi ki, əvvəldən Həsənə demişdim ki, səni birbaşa rəis qoya bilməyəcəyəm, çünki sən bizim sahədə işləməmisən".

"Bacısı oğlunu qurtarmağa Həsən Əliyev 150.000 manat pul istəyir"

Daha sonra Zahid Səfərov Ramazan Səlimova Həsən Əliyevlə tanışğının tarixçəsini danışıb: “Dedi ki, onun Vergilər Nazirliyində işləyən bacısı oğlu bir nəfər iş yoldaşı və məhəllədə yaşayan dostu ilə birgə Ismayıllı şəhərində qanunsuz yoxlama keçirmək istəyəndə ilişiblər və onların cinayət işinə Həsən Əliyev baxır. Zahid əlavə etdi ki, bacısı oğlunun işinin qurtarmasına görə Həsən Əliyev cəmi 150.000 manat pul istəyir. Vergilərdə işləməyən üçüncü şəxs pul verə bilmədiyinə görə digər iki nəfərə, o cümlədən Zahidin bacısı oğlunun payına 75.000 manat pul düşür. Həsən Zahidə təklif edib ki, həmin pulun əvəzinə məni işə götürsün. Mən Zahidə minnətdarlıq etdim və onun yanından ayrıldım. Qayda üzrə Həsənə zəng vurub məlumat verdim ki, Zahid məni müdir təyin edə bilmir. Həsən mənə dedi ki, darıxma səni ora hökmən yerləşdirəcəyəm. Ancaq Həsən mənə Zahidin bacısı oğlunun işi barədə heç nə demədi.

2012-ci ilin mart ayının əvvəllərində Novruz bayramı ərəfəsində Respublika Kliniki Xəstəxanasında öz işimlə bağlı olarkən təsadüfən Elmanın sürücüsü Valehi gördüm. Valeh dedi ki, Elman əsəb xəstəliyindən 3-cü mərtəbədə yatır. Mən onun yanına qalxdım və Elmanla görüşdüm. Elmanın qapısının ağzında bir nəfər mülki şəxs dayanıb keşik çəkirdi. Mən onun dərmanlarının alınması üçün həkiminə 40 manat da pul verdim. Elmanın yanından çıxandan sonra, Həsənə zəng vurub onun yanına gəldim. Görüşərkən Elmanın xəstəxanada yatmasını Həsənə dedim. Sonuncu mənə dedi ki, Elman kiriminal adamdır, onunla əlaqə saxlama. Həsən mənə dedi ki, sənin işinlə bağlı proses gedir, çox böyük ehtimalla Mingəçevir şəhərinə əvvəl müavin, sonra isə başçı vəzifəsinə təyin olunacaqsan.

"Nizami Süleymanov məni Etibar Pirverdiyevlə görüşə göndərdi"

18 mart 2012-ci ildə mənim ad günümdə Həsən mənə zəng vurub təbrik etdi. Ankara şəhərində çox güclü adamlarla görüşdüyünü, 10 günə mənim məsələmi həll edəcəyini dedi.

31 mart 2012-ci ildə soyqırımı günü Həsən mənə zəng vurdu və onunla “Neftçilər” xəstəxanasının qarşısında saat 11:30-da görüşdük. Piyada gəzişə-gəzişə Dəniz limanının yanına gəldik. Yolda mənə danışdı ki, oktyabr ayında onun hakimlik müddəti başa çatır, bu yaxınlarda rayonların birinə məhkəmə sədri təyin olunacaq. Mənim icra başçı təyin olunmağımı da danışıbdır, tezliklə həll olunacaq. Gəzə-gəzə onun iş yerinə gəldik, ondan Zahid haqqında soruşanda, Zahidin yaxşı adam olmadığını dedi".

Ramazan Səlimov ifadəsində yazır ki, 2012-di il aprelin 2-də Həsən Əliyev onu iş yerinə dəvət edib: “Otağında məni Milli Elmlər Akademiyasının Neft-Kimya Prosesləri Institutunun direktor müavini kimi təqdim etdiyi Qüdrət adlı şəxslə tanış etdi. Həsən dedi ki, Qüdrət səni işə düzəlmə məsələnin həlli üçün nüfuzlu bir adamın yanına aparacaq. Həsənin yanından çıxandan sonra sonuncu ilə səhəri gün saat 11:00-da ”Elmlər Akademiyası" metrostansiyasının qarşısında görüşməyi razılaşdıq və bu zaman Qüdrət mənə dedi ki, Həsən müəllim səndən soruşsa deyərsən ki, Qüdrətlə həmin adamın yanına getsək də, yerində tapa bilmədik. Qüdrət mənə yanına getməli olduğumuz şəxsin adını demədi.

03 aprel 2012-ci il tarixdə “Elmlər Akademiyası” metrostansiyasının qarşısında Qüdrətlə görüşdük, bir taksi tutdum və onunla birlikdə Badamdar qəsəbəsinə gedərək akademik Nizami Süleymanovla görüşdük. Qüdrət mənə dedi ki, Nizami Süleymanov Etibar Pirverdiyevlə yaxın münasibətlərdədir, yüksək əlaqələri var və onun vasitəsilə məni strukturların birinə rəhbər təyin etdirəcəklər.

Nizami Süleymanov 2012-ci ilin aprel ayının səhv etmirəmsə 15-də məni “Azərenerji” ASC-nin sədri Etibar Pirverdiyevlə görüşə göndərdi. Etibar Pirverdiyevlə “Avrovizion”nun keçiriləcəyi binanın tikildiyi meydanda, ayaqüstə görüşmüşəm və görüşümüz 5-7 dəqiqə çəkib. Etibar Pirverdiyev dedi ki, ona Sumqayıtdakı texnoparka işçi lazımdır və əlavə etdi ki, fikrin olsa “Kristal hall” tikilib başa çatandan sonra yanıma gələrsən, oturub söhbət edərik.

"Bəylər müəllimin toyunu o edib, onunla çox yaxın münasibətləri vardır"

05 aprel 2012-ci ildə Həsən mənə zəng vurub yanına çağırdı, getdim gördüm ki, Elman onun otağında oturub. Saat 10:55 olardı. Həsən mənə dedi ki, Elmana hər şeyi izah etmişəm, mən prosesə düşürəm, Elmanla birlikdə 5 nömrəli xəstəxananın qarşısındakı dayanacaqda sizi bir nəfər gözləyir, o adamla Dövlət Neft Şirkətinə gedəcəksiniz və orada çox nüfuzlu bir adamla görüş olacaq. Görüşün nəticəsini mənə bildirərsiniz. Elmanla qeyd olunan yerə gəldik və orada bir nəfər ağsaqqal adamla görüşdük. Həmin şəxs özünü bizə Tariyel kimi təqdim etdi. Biz birlikdə Kondisioner zavodunun yaxınlığında yerləşən Dövlət Neft Şirkətinin hansısa idarəsinin 20 mərtəbəli göy rəngli şüşələri olan inzibati binasına gəldik. Elmanla sürücüsü aşağıda maşında qaldı, Tariyellə mən binaya girdik. Mühafizəçi Tariyeli tanıdı və 6 mərtəbə piyada yuxarı qalxdıq. Sağ tərəfdəki şüşə arakəsmələrlə bir-birindən ayrılan otaqların birinə keçdik, otaq boş idi, Tariyel özü haqqında danışdı ki, Naxçıvanda polis rəisi olub, əməkdar hüquqşünasdır, Bəylər müəllimin toyunu o edib, onunla çox yaxın münasibətləri vardır. Bir müddət sonra hündürboylu, arıq, qara saçlı, özünü Ramiz kimi təqdim edən bir nəfər şəxs otağa girdi, Tariyel məni özünün və Həsənin yaxın dostu kimi təqdim etdi və məni SOCAR sistemində işlə təmin etməyi xahiş etdi. Ramiz cavab verdi ki, o bu işi bacarmaz, bu işi Rövnəq Abdullayevin Mehman adlı bacanağı həll edə bilər. Beləliklə oradan çıxıb Tariyeli 5 nömrəlili xəstəxananın yanına gətirdik, “Gənclik” metrostansiyasının yanında Elmandan ayrıldım. Həsənə zəng vurub axşama yaxın onunla danışa bildim və bu görüşün səmərəsiz olduğunu dedim. Həsən dedi ki, Tariyel onun atası əvəzidir, onu guya “rezerv” saxlayıbmış və bir az gözləməyi təklif etdi.

"Qərib Məmmədov dedi ki, elə günü bu gün məni Quba şöbəsinə müdir göndərə bilər"

2012-ci ilin aprel ayının əvvəllərində isə Həsən məni Neft-Kimya Prosesləri Institutunun direktoru Vaqif adlı şəxsin yanına göndərdi. Həsənin tapşırığına əsasən Vaqifə 600 manat dəyərində “Samsung Qalaxi” markalı mobil telefon hədiyyə alıb verdim. Vaqif mənə Əhmədlidə zavod direktoru vəzifəsini təklif etdi, mən imtina etdim. Vaqifin vasitəsilə elə həmin ay mən Dövlət Torpaq və Xəritəçəkmə Komitəsinin sədri Qərib Məmmədovun qəbuluna getdim. Qərib Məmmədova Həsən Əliyevin tapşırığı ilə 1700 manata Mərkəzi Univermaqdan qızıl fiqur alıb hədiyyə aparıb verdim. Qərib Məmmədov mənə dedi ki, elə günü bu gün mənim əmrimi Quba rayon şöbəsinə müdir verə bilər. Mən imtina edib, Bakı şəhərində su və ya qaz idarələrinin birinə müdir təyin olunmağıma köməklik etməyi xahiş etdim. Qərib Məmmədov mənə dedi ki, hər adama zəng edə bilər, ancaq işin düzəlib-düzəlməyəcəyinə söz verə bilməz. Mən minnətdarlıq edib onun yanından çıxdım".

(ardı var)