Türkiyə parlamenti Fransa Senatının Qarabağ üzrə qətnaməsini pislədi (Yenilənib)

Türkiyə Böyük Millət Məclisinin üzvləri Fransa Senatının Dağlıq Qarabağ üzrə qətnaməsini qətiyyətlə pisləyiblər. Bu barədə “Report” “Anadolu” agentliyinə istinadən xəbər verir.

Türkiyənin dörd aparıcı parlament partiyası - Ədalət və İnkişaf Partiyası (AKP), Cümhuriyyət Xalq Partiyası, Milliyyətçi Hərəkat Partiyası və İYİ partiya Fransa qanunvericilərini qınayıblar.

Parlamentin spikeri Mustafa Şentopun rəhbərliyi ilə imzalanan bəyanatda ərazilərin işğaldan azad olunması məsələsində qardaş Azərbaycanın mövqeyinə dəstək vurğulanır.

Qeyd edilir ki, Türkiyə parlamenti və xalqı şübhəsiz qardaş Azərbaycan barəsində düşmən addımları nəzərə alacaq. Fransa Senatının qətnaməsi beynəlxalq hüquq nöqteyi-nəzərindən heç bir əhəmiyyət kəsb etmir, Dağlıq Qarabağ Azərbaycan ərazisidir.

Bəyanatda həmçinin Fransanın ATƏT-in Minsk qrupunun həmsədri postunda 30 illik fəaliyyətsizliyinə diqqət çəkilir.

***

Türkiyə Böyük Millət Məclisində təmsil olunan Ədalət və İnkişaf Partiyası (AKP), Cümhuriyyət Xalq Partiyası (CHP), Milliyətçi Hərəkət Partiyası (MHP) və İYİ Partiyanın millət vəkillərinin qrup rəhbərləri Fransa Senatının Dağlıq Qarabağla bağlı qəbul etdiyi qətnaməni pisləyən birgə bəyanat yayıblar.

Trend bu barədə Türkiyə mediasına istinadən məlumat verir.