“Cəhənnəmə gedən yol da yaxşı niyyətlə açılmışdı" – Putin rəngli inqilablardan danışdı

Belarus prezidenti Aleksandr Lukaşenko çərşənbə günü Kollektiv Təhlükəsizlik Müqaviləsi Təşkilatının (KTMT) sammitində beynəlxalq nizamın sözdə idarə olunan xaosa doğru irəlilədiyini bildirib.

“AzPolitika.info” Rusiya mətbuatına istinadən xəbər verir ki, Lukaşenko bəzən öz xalqlarının maraqları olsa belə, heç nəyi nəzərə almayan qlobal oyunçuların yaxşı düşünülmüş və təşkil edilmiş fəaliyyəti olduğunu qeyd edib.

Onun sözlərinə görə, beynəlxalq münasibətlər sistemi və silahlara nəzarət mexanizmləri əsaslı bir deformasiyaya məruz qalıb: “Ünsiyyətdə qarşıdurma ritorikası getdikcə üstünlük təşkil edir. Dünya bir daha nəzarətsiz silahlanma yarışını başlatmaq ərəfəsindədir. Ən təhlükəli fenomen - dünya güc mərkəzləri arasında hərbi qarşıdurmaların getdikcə artmasıdır”.

Sammitdə çıxış edən Rusiya Prezidenti Vladimir Putin isə Belarus xalqının daxili bir siyasi dialoq qurmaq və daxili problemləri təzyiq və kənar müdaxilə olmadan həll etmək üçün kifayət qədər siyasi yetkinliyə sahib olacağına ümid etdiyini bildirib.

“Belarus prezidentinin siyasi təcrübəsi də daxil olmaqla, bu variantın işləyəcəyinə şübhə etmirəm” - deyə Putin vurğulayıb.

Putin xalqlara özləri üçün xüsusi maraq kəsb edən məsələləri həll etmək üçün fürsət vermək lazım olduğuna inandığını söyləyib və “Ərəb baharı” hadisələrini və digər rəngli inqilabları mənfi bir nümunə olaraq göstərib: “Rəngli inqilabların nələrə səbəb olduğunu gördük, amma həmişə yaxşı niyyətlə izah olunur. Bildiyiniz kimi cəhənnəmə gedən yol da yaxşı niyyətlə açılmışdı".

“AzPolitika.info”