"Mənə qarşı söyüş kampaniyasının başında Fərəc Quliyevin oğlu dayanır" - Deputatdan sensasiyalı açıqlama

"Mənə qarşı sosial şəbəkələrdə aparılan çirkin kampaniyanın başında duran şəxs seçkilərdə alternativim olmuş Fərəc Quliyevin oğlu Mətin Quliyevdir".

"AzPolitika.info" xəbər verir ki, bunu millət vəkili Etibar Əliyev "Facebook"-dakı hesabında yazıb.

Xatırladaq ki, bir neçə gündür sosial şəbəkələrdəki müxtəlif səhifələr deputatın hərbçilərin maaşlarının kəsilməsinə bəraət qazandırmasını əks etdirən sitatlar paylaşır. E.Əliyev bildirib ki, bu cür paylaşımlar ona qarşı həyata keçirilən "qara piar" kampaniyasının tərkib hissəsidir.

E.Əliyev yazıb ki, Mətin Quliyev analoji kampaniyanı hələ növbədənkənar parlament seçkiləri zamanı da aparıb: "Əlimdə kifayət qədər sübutlar var. Hüquq-mühafizə orqanlarına müraciət hazırlayıram. Həmin şəxs mənim adımdan "Facebook"-da paylaşılan, mənim işlətmədiyim ifadələri məqsədli şəkildə hazırlayaraq ictimaiyyətə ötürüb. Nəticədə ünvanıma təhqir, küçə şöyüşləri yazılıb, özüm və ailə üzvlərim ən ağır formada həqarətlərə məruz qalmışıq. Bununla Parlamentin, eyni zamanda onun üzvü olaraq mənim nüfuzuma xələl gətirməyə cəhd edilib".

Millət vəkili həmçinin qeyd edib ki, "Facebook"-da onun ünvanına olmazın söyüşlərin yazılmasını təşkil edən "Əbulfəz Babasoy" profili Fərəc Quliyevin oğlu tərəfindən idarə olunur.

"AzPolitika.info"