ABŞ Qara dənizə hərbi gəmilər göndərməyi təxirə salıb - Bayden-Putin görüşünə görə...

ABŞ hərbi gəmilərinin Bosfordan Qara dənizə aprelin 14 və 15-nə planlaşdırılan keçidi baş verməyəcək. "AzPolitika.info" xəbər verir ki, bu barədə Türkiyə mediası və "Reuters" agentliyi bu ölkənin rəsmilərinə və diplomatik dairələrinə istinadən xəbər yayıblar.

Mənbələr bildirirlər ki, ABŞ gəmilərin Bosfordan keçəcəyinə dair Türkiyəyə verdiyi bildirişi geri götürüb. Montrö Konvensiyasına uyğun olaraq qeyri-Qara dəniz ölkələri hərbi gəmilərinin Bosfordan keçməsi üçün Türkiyəyə müraciət etməlidirlər.

ABŞ aprelin ortalarında Qara dənizə iki hərbi gəmi göndərəcəyini Rusiya-Ukrayna sərhədində gərginliyin eskalasiyası və Rusiyanın burada qoşun cəmləşdirdiyi bir vaxtda bildirmişdi.

"Reuters" xəbər verir ki, ABŞ-ın Ankaradakı səfirliyi gəmilərin Bosfordan keçidinin ləğv olunmasına dair məlumat verib, lakin bu addımın səbəbi açıqlanmayıb. "Anadolu" agentliyi bildirir ki, ABŞ yaxın gələcəkdə hərbi gəmilərinin keçidi üçün də müraciət etməyib. ABŞ rəsmiləri bildirirlər ki, ola bilsin, Türkiyə tərəfi ilkin bildirişi yanlış başa düşüb, çünki gəmilərin keçidi barədə rəsmi təsdiq verilməyib. ABŞ rəsmiləri bunu da əlavə ediblər ki, ABŞ Türkiyəyə potensial keçidlər barədə vaxtaşırı bildiriş göndərir, lakin bu, heç də gəmilərin Bosfordan mütləq keçəcəyi anlamına gəlmir.

Həmin ərəfədə bildirilirdi ki, ABŞ-ın bu manevrindən məqsəd onun və müttəfiqlərinin Ukraynaya dəstəyinin nümayişi olmalıdır.

Şərhçilər diqqəti belə bir məqama çəkirlər ki, aprelin 13-də ABŞ və Rusiya prezidentləri Co Bayden və Vladimir Putin arasında telefon söhbəti olub. Ağ Evin bəyanatında deyilirdi ki, Bayden söhbət zamanı Ukraynanın suverenliyinə və ərazi bütövlüyünə Vaşinqtonun “sarsılmaz” dəstəyini ifadə edib.

Bayden habelə Putinə yaxın aylarda üçüncü bir ölkədə görüşməyi təklif etmişdi. Bayden aprelin 14-də Ukrayna ətrafında yaranmış vəziyyəti Almaniya kansleri Angela Merkellə müzakirə edib.

Bu söhbət zamanı qeyd olunub ki, Ukrayna ilə sərhəddə gərginliyin aradan qaldırılması üçün Rusiya qoşunlarının sərhədə yaxın ərazilərdən çıxarılması məqsədəuyğun olardı.

Rusiya-Ukrayna gərginliyi ilə bağlı məsələlər NATO ölkələri xarici işlər və müdafiə nazirlərinin Brüsseldə keçirilən iclasında da müzakirə olunub. Bu görüşdə ABŞ müdafiə naziri Lloyd Ostin demişdi ki, Vaşinqton Ukraynanın müdafiə qabiliyyətinin gücləndirilməsinə dəstəyini davam etdirəcək.

Ukrayna məsələsi habelə xüsusi xidmət rəhbərlərinin iştirakilə ABŞ Senatında müzakirə olunub. Bu müzakirə zamanı Mərkəzi Kəşfiyyat İdarəsinin direktoru Uilyam Berns deyib ki, Rusiya Ukrayna ilə sərhədə qoşun cəmləşdirməsi ilə çox güman Kiyevə siyasi təzyiqini artırmağa çalışır.

Rusiya Vaşinqtona xəbərdarlıq etmişdi ki, Krımdan və onun Qara dəniz sahilindən kənar dursun. Moskva bildirir ki, Rusiya qoşunlarının hərəkəti üçhəftəlik qəfil manevrlərlə bağlıdır və NATO-nun təhdidli davranışına reaksiyadır.

Rusiya ABŞ hərbi gəmilərinin Qara dənizə gətiriləcəyinə dair xəbərlərlə eyni vaxtda, aprelin 14-də hərbi dəniz təlimlərinə başlayıb. Təlimlər zamanı dəniz və hava hədəflərinin vurulması məşq edilir.

"AzPolitika.info"