GENERAL DAHA BİR AĞIR CİNAYƏTDƏ İTTİHAM EDİLİR - "Oğlunun obyektində işlədilən əsgər ölüb..."

20 il öncə Kiyevdə azərbaycanlı işadamı Elçin Əliyevin qətlinə görə hazırda həbsdə olan sabiq birlik komandiri, general-leytenant Rövşən Əkbərovun haqqında başqa bir cinayət işinin də olduğu bildirilir.

"AzPolitika.info" xəbər verir ki, bu barədə "Azadlıq" radiosu özəl mənbələrə istinadən məlumat yayıb. 

Mənbə bildirib ki, həmin cinayət işi generalın 2007-2009-cu illərdə hərbi hissə komandiri olduğu dövrdə tabeliyindəki əsgərlərin onun evində və obyektlərində işlədilməsi ilə bağlı olub: "Rövşən Əkbərovun atasının adını daşıyan oğlu var, Telman Əkbərov. Onun obyekti var, bir hissəsi mebel sexi, bir hissəsi şirniyyat, bir hissəsi mağaza. O obyektdə də əsgərləri işlədiblər. Həmin vaxt orada yanğın olub. Bir əsgər ölüb, qalanları xəsarət alıb. Bu hadisə ilə əlaqədar cinayət işi başlanıb".

Mənbənin sözlərinə görə, obyektin mülkiyyətçisi oğul Əkbərov olsa da, rəsmi qaydada "N" saylı hərbi hissənin giziri İbrahim Həsənov onu icarəyə götürüb. Bu üzdən Həsənov CM-in 225.2 (yanğın təhlükəsizliyi qaydalarını pozma, ehtiyatsızlıqdan zərərçəkmişin ölümünə və ya digər ağır nəticələrə səbəb olduqda) maddəsi ilə cinayət məsuliyyətinə cəlb olunub: "İbrahim Həsənovun istintaqı başa çatıb, işi məhkəməyə göndəriləndə hərbi hissənin başqa vəzifəli şəxsləri, o cümlədən general Rövşən Əkbərov haqqında da Cinayət Məcəlləsinin 341-ci (vəzifə səlahiyyətlərindən sui-istifadə və ya vəzifə səlahiyyətlərini aşma) maddəsi ilə cinayət işi ayrıldı. Bu, 2009-cu ildə olub. Amma o işə xitam verilmədiyinə görə Rövşən Əkbərovun həbsindən sonra həmin cinayət işi yenidən araşdırılıb".

General Əkbərov həbs olunduqdan sonra onun işi üzrə araşdırmalar Baş Prokurorluğun İstintaq İdarəsində aparılıb. İdarədəki mənbə də general haqqında əvvəl cinayət işi olması haqda məlumatı təsdiqləyib.

İstintaq İdarəsindən bildirilib ki, 2009-cu il dekabrın 7-də ayrılmış cinayət işi generalın həbsindən sonra – martın 19-da onun suçlandığı qətllə bağlı cinayət işinə birləşdirilib:"Araşdırma aparılıb və belə nəticəyə gəlinib ki, Rövşən Əkbərovun əməlində Cinayət Məcəlləsinin 341.2.3 (vəzifə səlahiyyətlərindən sui-istifadə və ya vəzifə səlahiyyətlərini aşma, ağır nəticələrə səbəb olduqda) maddəsinin tərkibi olsa da, cinayət məsuliyyətinə cəlbetmə müddəti keçib. Ona görə də ərizəsi ilə, eyni zamanda, Cinayət-Prosessual Məcəllənin 39.1.3 (cinayət məsuliyyətinə cəlbetmə müddətləri keçdikdə) maddəsinə əsaslanaraq, cinayət təqibinə xitam verilib".

Xatırladaq ki, 2021-ci il martın 15-dən həbsdə olan Rövşən Əkbərov 2001-ci il mayın 31-dən iyunun 1-nə keçən gecə Kiyevdə kafenin həyətində azərbaycanlı işadamı Elçin Əliyevi qətlə yetirməkdə suçlanır.

Cinayət işinin materiallarında yazılıb ki, gecə saatlarında "Sikora" kafesində yeyib-içəndən sonra Əkbərovla Əliyev arasında mübahisə yaranıb. Onlar kafedən çıxıb mübahisəni davam etdiriblər. Bu zaman general üstündəki hərbi bıçaqla onun ürək nahiyəsinə zərbə endirib.

Əkbərov ittihamı qəbul etməsə də, Ukrayna prokurorluğu hələ o zaman Azərbaycan Baş Prokurorluğuna məktub göndərərək 29-yaşlı Əliyevin qətlində generalın iştirakını təsdiqləyən sübutların olduğunu yazırdı. Həmin sübutlar da daxil olmaqla, cinayət işinin materialları istintaqın davam etdirilməsi üçün Azərbaycana göndərilmişdi. İş əvvəlcə Hərbi Prokurorluqda, daha sonra Baş Prokurorluğun Ağır Cinayətlərə dair işlər üzrə İstintaq İdarəsində araşdırılsa da, bir müddət sonra icraat dayandırılmışdı.

29-yaşlı Əliyevin ailə üzvləri ötən 20 ildə Prezident Administrasiyası, Baş Prokurorluq da daxil olmaqla, müxtəlif dövlət orqanlarına onlarla məktub göndərərək Əkbərovun cəzalandırılmasını tələb ediblər.

"AzPolitika.info"

635x100

Şərhlər

Vətəndaş 2021-08-06 11:24:25

Bu cinayətləri bilərəkdən gizledenler,cinayətin açılmasına göz yumanlar, niyə kənarda saxlanılır?20 il~ BUna Prokurorluq.DİN və hətta hadisə yerində olanlar günahkar deyillərmi?

Faimill 2021-08-05 16:49:25

Cinayəti indiyə kimi gizlədənlər də aşkar olunub cəzalanmalıdılar.Dərəbəylik nə qdər davam edər?

Roma 2021-08-05 10:26:36

Generalın da bu qədər əli cinayətə batmış olarmı?..Bir də niyə batmasın , yeyib-içib harınlayıb, kimi tutdu öldürür...paqonlarını söküb törətdiyi cinayətlərə uyğun içəri atılmalıdır...

Müəllim 2021-08-04 21:43:15

Dövlət iki şeydən sarsila bilər: Günahsiz insan cəzalandırılldıqda Cinayətkar cəzasız qalandaa

Xalq 2021-08-04 19:48:38

bəs 20 ildə harada idiniz, niyə məhz indi cinayət hadisəsini qatilin etdiyinə aid çoxlu sübutlar ola-ola axıra kimi tədqiq edilməyib? İş niyə 20 il qalıb?

t.ədalət 2021-08-04 17:37:58

Cəzasızlıq olan yerdə cvinayət işləri bir-birinin üstünə minir.

Son yazılar