“RUSİYANIN EFFEKTİV DÖYÜŞ QÜVVƏSİ ÇOX AZ QALIB” – “Ukraynalılar yaxşı zərbələr endirirlər, amma...”

Rusiya artıq üç aya yaxındır Ukraynaya qarşı müharibə aparır. Son günlər işğalçı ordunun mövqelərinə cavab zərbələri endirən Ukrayna qüvvələri bəzi yerlərdə döyüş xəritəsini yenidən çəkməyə başlayırlar.

Britaniyanın Müdafiə Nazirliyi mayın 12-də bildirib ki, Ukraynanın şimal-şərqindəki Xarkov şəhəri yaxınlığında son uğurları qismən Rusiyanın qüvvələrini şərqi Donbass regionuna yönəltməsi, başqa yerlərdə ağır itkilər verən qüvvələri yeniləməsi ilə əlaqədardır.

Ukrayna ordsunun bu strategiyası uğurlu ola biləcəkmi?

"AzPolitika.info" xəbər verir ki, Vaşinqtonda yerləşən Müharibə Araşdırmaları İnstitutunun təhlilçisi Corc Barros bu barədə fikirlərini "Azadlıq" radiosuna danışıb.

Barros deyir ki, Ukrayna bütün cavab zərbələrini, bəzi yerlərdə uğurla etdiyi kimi, daha böyük əks-hücum əməliyyatlarına çevirməlidir. Ancaq təhlilçi bu cavab zərbələrinin bəzən yanlış olaraq əks hücum kimi qələmə verildiyini bildirir. Çünki cavab zərbəsi miqyasına görə daha kiçikdir, taktiki səviyyədə qüvvələrin kiçik ərazini ələ keçirməsidir. Əks hücum isə daha yüksək səviyyədə aparılan əməliyyatdır, daha böyük əraziləri ələ keçirməyi hədəfləyir “Hazırda bu cavab zərbələrinə baxanda bir, iki, yaxud üç kəndin alındığını görürük. Hələlik, ukraynalıların Rusiyanın möhkəmləndirdiyi mövqeyə həqiqi zərbə endirməsi məqamına çatmamışıq”, – təhlilçi vurğulayır.

Digər tərəfdən ekspert ukraynalıların bu əks zərbələr zamanı hansı dərəcədə müqavimətlə üzləşməsinin də tam aydın olmadığını deyir. Çünki bəzən rusiyalılar mövqelərindən geri çəkilir. Barros rusiyalıların Xarkovdan çıxarılmasını çox vacib məqam adlandırır. Rusiyanın Ukrayna sərhədi yaxınlığındakı Belqoroddan təchizat xətləri İzyuma, oradan da Donetsk və Luqanska gedir: “İnanırıq ki, ukraynalıların indi başladığı döyüşlər İzyumda və ətrafında savaş üçün şərtlər müəyyənləşdirir ki, bu da Ukraynadakı müharibənin indiki mərhələsi üçün çox vacibdir”.

Xatırladaq ki, Rusiya Ukraynanın şimalında böyük şəhərləri tuta bilməyəndən sonra qüvvələrini şərqə yönəldib, məqsədin Donbasın “tam azad olunması” olduğunu bəyan edib.

Barros isə deyir ki, rusiyalıların təchizat xətlərinin çox yükləndiyi, yaxud arxa cəbhələri təhlükəsiz olmayan yerlərdə ukraynalılar çox effektiv zərbələr endirirlər. Onlar yanacaq maşınlarına, logistika konvoylarına basqın edirlər: “Ancaq Rusiyanın möhkəmləndirdiyi, yaxşı kommunikasiya və təchizat xərtləri olan mövqelərini o qədər də effektli vura bilmirlər”.

Təhlilçi ukraynalıların Rusiya qüvvələrini kənd yerlərindən, böyük şəhərlərin kənarlarından daha rahat çıxara bildiyini vurğulayır. Bu zaman ukraynalılar kəşfiyyatla Rusiya bölmələrinin yerini müəyyənləşdirir, onlara qarşı artilleriya və raketləri işə salır: “Ancaq sıx məskunlaşmış şəhər yerlərinə keçəndə hər iki tərəfin döyüş tempi və irəliləmə səviyyəsi əhəmiyyətli dərəcədə azalır. Ukraynalılar şəhər yerində düşmənin nəzarətində olan əraziyə girərək qüvvələri geri oturtmaq güclərini nümayiş etdirə bilməyiblər. Bunu bacarmadıqlarını demək istəmirəm, sadəcə, döyüşdə hələ ki bunu müşahidə etməmişik”.

“ABŞ və Britaniya rəsmiləri elə deyirlər ki, Rusiya qüvvələri qrafikdən geri qalırlar, ləng irəliləyirlər, baxmayaraq ki, onlar müəyyən qədər irəli gedə biliblər. Rusiya qüvvələrinin müharibənin yeni mərhələsində əldə etdiklərinə baxanda onlar Donbasda irəliləyə biləcəklərmi?” Barros bu suala cavabında deyir ki, rusiyalıların qüvvələri azaldığından irəliləmə səviyyələri düşüb, yenidən qruplaşmalıdırlar.

“Dəyərləndirməmiz belədir ki, Rusiyanın müharibəyə cəlb edə biləcəyi effektiv döyüş qüvvəsi çox az qalıb. Rusiya cəmiyyətində səfərbərlik və mümkün çağırış mənalı döyüş qüvvəsilə nəticələnməyəcək... Bunu ukraynalılar haqda da demək olar, onların da qüvvələri azalıb. 75 gündür ağır döyüşlər gedir. Rusiyaya vurduqları zərbələri nəzərə alanda, ukraynalıların da effektiv döyüş qüvvəsi zəifləyib”, – təhlilçi deyir.

O, hər iki tərəfin ləng irəlilədiyini qeyd edir, özəlliklə Ukraynanın şərqində və Donbasda. Ekspert Rusiya Prezidenti Vladimir Putinin üstün şərtlərlə atəşkəs əldə etmək riskindən, bununla da şərqi və cənubi Ukraynada, özəlliklə Azov dənizinin şimalında və Qara dəniz yaxınlığında qanunsuz əldə etdiklərini möhkəmləndirə biləcəyindən danışır.

“Atəşkəs Putinə Ukraynanın bu ərazilərini tam tutmağa, həmin yerlərdə Ukrayna hökumətinin strukturlarının qalıqlarını məhv etməyə, eləcə də Kremlin istədiyi vaxt hücum əməliyyatlarını bərpa etmək üçün şərtlər qoymağa zaman və fürsət tanıyar”, – Barros vurğulayır.

Təhlilçi Kremlin atəşkəs cəhdinə Qərbin, müəyyən liderlər və qurumların avtomatik maraq göstərəcəyini narahatedici məqam kimi qeyd edir, çünki atəşkəs zorakılığın dayandırılması yolu kimi görüləcək: “Narahatlıq ondan ibarətdir ki, Kreml bu oyunu işə salan kimi Ukrayna Prezidenti Volodimir Zelenskinin həmin şərtləri qəbul etməsi üçün beynəlxalq təzyiq baş verə bilər”.

Corc Barros Rusiyanın qısa müddətdə, 6-12 ay ərzində daha effektiv döyüş qüvvəsi yığmasını mümkün saymır. Çünki keyfiyyətli bir əsgərin təliminə 8-10 ay vaxt lazımdır. Üstəlik, ukraynalıların Rusiya zabit korpusuna vurduğu zərbəni nəzərə alanda, canlı qüvvə itkisinin bərpası bir nəsil çəkə bilər.

"AzPolitika.info"

635x100

Şərhlər

RÜFƏT 2022-05-14 13:40:39

Rusiya ordusu bəzəklü-düzəkli parad ordusudur.Müharibə əsl reallığı üzə çıxarmağa başlayır.Əslində Rusiyanın hər şeyi zaydır,Olan qalanlarını da SSRİ-dən qalma texnologiyaların üstündə qurublar.Moskva və Leninqraddan savayı ölkənin qalan hissəsi yetimçə kökündədir..

Qarabağlıya 2022-05-14 12:29:15

Heç düşündünmüki ukraynalılar niyə amerika və ingiltərənin maraqları naminə ölür yanukoviçin vaxtında rahat yaşayırdılarda amerika yanukoviçi yıxmaqla ukraynada xaosun əsasını qoydu adınıda qoydular demokratiya hansı demokratiya rusiya sizə deyəndəki neytral status qəbul edin sizinlə işim olmasın ama zeleniski amerikanın maraqlarına xidmət edib xalqını qırğına verdi əsas günahkar avropa və amerikadır

B.Qarabağlı 2022-05-14 10:37:40

İki şəxsin hökmranlıq xəyaləti naminə Rusiya ordusu niyə qardaş xalqın qatili olmaq üçün effektiv döyüşməlidir?

Son yazılar