“KREML ÜÇÜN YEGANƏ KOZIR NÜVƏ SİLAHINDAN İSTİFADƏDİR...” – “Səfərbərlik Putinin Qərbi danışıqlara çəkmək planıdır”

"İşğal olunmuş Ukrayna ərazilərində referendum keçirmək istəyi Kremlin Kiyev və Qərblə danışıqlarında mövqelərini gücləndirmək cəhdidir. Təbii ki, cəbhə xəttindəki hazırkı bərbad vəziyyəti düzəltmək istəyirlər. Çünki Rusiya güc yolu ilə yeni əraziləri ələ keçirmək imkanını itirib”.

"AzPolitika.info" xəbər verir ki, bu fikirləri "Gələcək Ukrayna" İnstitutunun eksperti İqor Popov “Azadlıq” radiosunun Rusiya xidmətinə müsahibəsində deyib.

Xatırladaq ki, Rusiya Prezidenti Vladimir Putin sentyabrın 21-də xalqa müraciətində Ukrayna müharibəsini davam etdirmək üçün ölkədə qismən səfərbərlik elan edib. Kreml rəhbəri həmçinin Qərbi nüvə silahları ilə adekvat zərbələr endirməklə təhdid edib.

Ekspertin sözlərinə görə, Moskva bu səsvermələri elan etməklə eskalasiyaya və yeni ərazilərin Rusiyanın tərkibinə daxil edilməsi ilə bağlı qərarlar qəbul etməyə hazır olduğunu göstərir:"Lakin onların sərhədlərinin necə müəyyən ediləcəyi hələ də qeyri-müəyyən olaraq qalır: Ukraynanın nəzarətində olan Donetsk, Luqansk, Zaporojye və Xerson əraziləri Rusiya ərazisi elan olunacaq, yoxsa yox? Rusiyada qismən səfərbərlik elan edən Kreml açıq şəkildə hücum potensialını gücləndirməyə ümid edir. Lakin hərbi ekspertlərin fikrincə, müharibədə iştirak etmək üçün kifayət qədər həvəsli olmayan mülki əhalinin səfərbər edilməsi çətin ki, Rusiya üçün döyüş meydanında sürətli uğura gətirib çıxarsın. Buna görə də Kreml üçün yeganə kozır kütləvi qırğın silahlarından istifadə, yəni, çox güman ki, taktiki nüvə zərbəsi endirmək təhlükəsi aktual olaraq qalır".

Rusiya hərbi doktrinasının 22-ci bəndi nüvə və digər kütləvi qırğın silahlarından istifadəyə Rusiya Federasiyasının ərazisinə hücum edildiyi təqdirdə və ya dövlətin mövcudluğuna təhlükə yarandığı təqdirdə icazə verir.

İqor Popov deyir: "Çətin ki, Ukrayna Moskvanın Xerson vilayətini Rusiya Federasiyasına daxil edəcəyinə razılaşsın. Bu, hətta nüvə təhdidi ilə də mümkün deyil. Belə bir təhdidin reallaşması isə Ukraynaya qarşı beynəlxalq arenada münasibəti əhəmiyyətli dərəcədə dəyişəcək, hətta Rusiyanın başlatdığı müharibə ilə bağlı indiyədək neytral qalan Çin, Hindistan və digər ölkələrin mövqelərinə təsir edəcək”.

Xatırladaq ki, ABŞ Prezidenti Co Bayden CBS telekanalına müsahibəsində Putinə Ukraynada kimyəvi və ya taktiki nüvə silahlarından istifadə etməmək barədə xəbərdarlıq edib. Lakin o, ABŞ-ın Rusiyanın belə bir addımına necə reaksiya verəcəyini dəqiq söyləməkdən imtina edib. Daha əvvəl amerikalı diplomat Kurt Volker Rusiyanın Ukraynaya qarşı nüvə silahından istifadəsinin Qərbin birbaşa hərbi reaksiyasına səbəb olacağını bəyan etmişdi.

İqor Popov əmindir ki, Kremlin belə bir addımına Qərbin və NATO-nun reaksiyası çox sərt olacaq: "Qərb liderlərinin dolayı bəyanatlarına görə, Rusiyanın Ukraynada NATO üzvlərinin ərazilərinin radioaktiv çirklənməsinə səbəb olacaq nüvə silahından istifadə etməsi Alyansa hücum kimi qəbul ediləcək. Bu, Qərbi Rusiyaya adekvat zərbə endirməyin məsuliyyətindən azad edəcək. Birinci mərhələdə, Qərb liderlərinin dediklərindən göründüyü kimi, bunlar əvvəlcə nüvə deyil, taktiki nüvə bombalarının atılacağı nöqtələrə "Tomahawk" qanadlı raketləri ilə birbaşa zərbələr endirəcəklər. Qərb siyasətçilərinin bəyanatlarına görə, Rusiya rəhbərliyi Ukraynaya nüvə zərbəsi endiriləcəyi təqdirdə Qərbin ildırım sürəti və avtomatik reaksiyası ilə üzləşəcəyi ilə bağlı xəbərdarlıq edilib".

Ukraynalı hərbi ekspert Sergey Qrabski əmindir ki, Ukraynanın dörd rayonunda keçiriləcək referendumlar Ukrayna ordusunun əks-hücumunu dayandırmayacaq: “Bu referendumların heç bir mənası yoxdur, çünki Rusiya ordusu bu bölgələrə tam nəzarət etmir. Təbii ki, onlar istəsələr, belə tədbirlər keçirə bilərlər, lakin bu, Ukrayna və onun ordusu üçün heç nəyi dəyişməyəcək. Əgər psevdoreferendumlardan sonra Moskvanın ələ keçirdiyi əraziləri Rusiya torpağı elan edib, Kiyevi hədələməsindən danışsaq, biz çoxdan onların elan etdikləri “qırmızı xətti” keçmişik. Ukrayna ilhaq edilmiş Krımda hərbi obyektlərə hücum edib. Rusiyanın reaksiyası necə oldu? Heç nə! Baxmayaraq ki, Krım Rusiya üçün Donbass və ya Xersondan daha əhəmiyyətli bölgədir".

- Putinin Rusiyada qismən səfərbərlik elan etməsi hərbi əməliyyatların gedişinə necə təsir edəcək? Rusiya ordusunun potensialı nə qədərdir?

- Hətta qismən səfərbərliyi nəzərə almasaq da, biz bir müddətdir ki, Rusiyanın döyüşə məcburi "könüllü" dəstələr göndərdiyi, məhkumları döyüşlərə cəlb etdiyini, regional batalyonlar yaratdığını və s. bilirik. Bunlar vəziyyətdən doğan narahatlıqla bağlıdır. Əslində, bu hissələrin hamısı yüngül silahlanmış piyadadır və belə bir yanlış fikir var ki, guya Rusiyanın resursları tükənib. Təəssüf ki, bu doğru deyil. Ukrayna ordusunun necə hərəkət etdiyinə baxsaq, o zaman belə yüngül piyadalardan ibarət olan rus qoşunlarının irəliləyişini dayandıraraq Donbass ərazisində vaxt qazandıq. Təxminən eyni alqoritm bu gün Rusiya tərəfində də işləyir. Bu cür piyada birləşmələri ilə onlar Ukrayna qoşunlarının irəliləyişini dayandırmağa çalışırlar, eyni zamanda, yaxşı təlim keçmiş, silah və hərbi texnika ilə tam təchiz olunmuş əlavə döyüş hissələri formalaşdırırlar. Rusiya ordusunun potensialı nə qədərdir? Ümumi rəqəmlərə əsaslansaq, bir qayda olaraq, səfərbərlik potensialının hesablanması ölkə əhalisinin on faizini təşkil edir. Beləliklə, maksimum dərəcədə hərbi əməliyyatlarda iştirak edə biləcək 14 milyon Rusiya vətəndaşından danışmaq olar. Bu rəqəmin on faizini götürsək belə, demək olar ki, 1,5 milyondur. Bu, Rusiyanın Ukrayna ilə müharibədə istifadə edə biləcəyi minimum potensialdır. Amma nəzərə almaq lazımdır ki, bu milyon yarımın bir hissəsi artıq Rusiya Silahlı Qüvvələrində xidmətdədir. Bundan sonra Rusiya uzaqbaşı daha yarım milyon adamı səfrəbər edə bilər.

Əlavə edirik ki, Rusiyanın müdafiə naziri Sergey Şoyqu sentyabrın 21-də Rusiya televiziyasına müsahibəsində hakimiyyətin 300 min ehtiyatda olan əsgəri səfərbər etmək niyyətini açıqlayıb. Nazir çağırışçıların cəbhəyə göndərilməyəcəyini də bildirib. Bir müddət əvvəl “Dojd” telekanalı çağırışçıların analarına istinad edərək bildirib ki, onların oğulları Ukrayna ilə “sərhədi möhkəmləndirmək” üçün göndəriləcək və ya artıq Belqorod vilayətinin sərhədyanı rayonlarına göndərilib.

“AzPolitika”