BAKI AVROPA İTTİFAQINDAN PUL VƏ QARANTİYA İSTƏYİR – “Biz əmin olmalıyıq ki, bu tələb müharibəyə görə deyil...”

Azərbaycan xəbərdarlıq edib ki, onun Avropa İttifaqına (Aİ) qaz ixracını iki dəfə artırmaq öhdəliyini yerinə yetirməsi blokun onun kəmər şəbəkəsinə yeni investisiyalar yatırması və Avropa şirkətlərinin uzunmüddətli müqavilələr bağlamasından asılı olacaq.

"AzPolitika.info" xəbər verir ki, bu barədə "Financial Times" (FT) qəzeti məlumat yayıb. Qəzet xatırladır ki, Brüssel və Bakı iyul ayında Azərbaycandan Avropa İttifaqına ixrac olunan qazın həcmini 2027-ci ilədək ildə 20 milyard kubmetrə çatdırmağa dair razılaşma imzalayıblar. Aİ hazırda Rusiya qazından asılılığını minimuma endirməyə can atır.

Məqalədə deyilir ki, 3500 kilometrlik Cənub Qaz Dəhlizinin genişləndirilməsi milyardlarla dollarlıq investisiya və Avropa şirkətləri ilə yeni müqavilələr tələb edir.

Azərbaycan xarici işlər nazirinin müavini Elnur Məmmədov deyib ki, bu müqavilələr 2027-ci ildən sonrakı dövrü də əhatə etməlidir: “İnvestisiyada maraqlı olanlar, istər özəl olsun, istərsə dövlət pullarını masa üstünə qoymalıdırlar ki, biz ixrac həcmlərini artıra bilək. Mən demək istəməzdim ki, bu məsələdə Aİ ilə fikir ayrılığı var, amma bu, məsələnin mühüm hissəsidir”.

Nazir müavini əlavə edib ki, hazırda Avropa İttifaqının alternativ təchizatçılara ehtiyacı var, amma Bakıya da qarantiyalar verilməlidir: “Biz buna əmin olmalıyıq ki… bu, Ukrayna müharibəsinə görə spontan bir tələb deyil. Bu müharibə bir gün qurtaracaq və sonra siz yenidən Rusiyadan qaz almağa qayıdacaqsınız və deyəcəksiniz ki, “yaxşı da, daha sizin qazınıza ehtiyac yoxdur””. Məmmədov vurğulayıb ki, Azərbaycan sözügedən investisiyalara öz pay töhfəsini verə bilər.

Qeyd edək ki, Cənub Qaz Dəhlizinin tikintisi 40 milyard dollara başa gəlib.

S&P Global Commodity Insights firmasından Loren Ruzekas deyib ki, Azərbaycan İtaliya və Bolqarıstana qaz ixracını bir qədər artıra bilər, amma bu həcmin əsaslı artırılması üçün əhəmiyyətli məbləğdə investisiyalara ehtiyac olacaq: “Heç bir ölkə uzunmüddətli alıcısını tanımadan üzərinə milyardlarla dollarlıq riski götürmək istəməz”.

Avropa Komissiyası bu istiqamətdə hər hansı danışıqların aparıldığına dair sorğuya şərh verməyib. Aİ rəsmilərindən biri FT-yə deyib ki, blokla Azərbaycan arasında uzun müddətdir davam edən enerji əməkdaşlığı var və Aİ Azərbaycanı etibarlı təchizatçı hesab edir.

"AzPolitika.info"