MÜDAFİƏ NAZİRLİYİNDƏN RUSİYAYA SƏRT ETİRAZ - Sülhməramlıların saxtakarlığı ifşa edildi
Rusiya Müdafiə Nazirliyinin internet səhifəsində yaşayış məntəqələrimizin adları uydurma erməni toponimləri ilə qeyd edilir.
Bu barədə Azərbaycanın Müdafiə Nazirliyindən bildirilib.
“Azərbaycan Respublikasının Qarabağ iqtisadi rayonunun yaşayış məntəqələrinin Azərbaycan toponimlərinə uyğun adlı siyahısı və xəritəsi Rusiya Federasiyasının Müdafiə Nazirliyi, Azərbaycan ərazisində müvəqqəti yerləşdirilmiş Rusiya sülhməramlı kontingentinin əvvəlki və hazırkı komandanlığı, eləcə də Türkiyə-Rusiya Birgə Monitorinq Mərkəzinə Azərbaycan tərəfindən rəsmi qaydada göndərilmiş və məlumatlarda məhz bu adlardan istifadə olunması barədə dəfələrlə müraciət edilib.
Buna baxmayaraq, təəssüf ki, Rusiya Federasiyasının Müdafiə Nazirliyinin rəsmi internet səhifəsində dərc olunan Rusiya Federasiyasının sülhməramlı kontingentinin rəsmi məlumatlarında yaşayış məntəqələrimizin adları uydurma erməni toponimləri ilə qeyd edilir.
Belə ki, Rusiya Federasiyasının sülhməramlı kontingentinin 24 noyabr 2022-ci il tarixli rəsmi məlumatında “Maqavuz” yaşayış məntəqəsi istiqamətində Azərbaycan tərəfindən guya atəşkəsin pozulmasının qeydə alındığı bildirilir.
Rusiya tərəfinin nəzərinə çatdırırıq ki, onların “Maqavuz” adlandırdığı Azərbaycan yaşayış məntəqəsinin rəsmi adı ÇARDAQLIDIR. Azərbaycan Ordusunun bölmələri atəşkəsi pozmayıb və bu istiqamətdə heç bir atəş açmayıb.
Eyni zamanda onu da bəyan edirik ki, son zamanlar qeyri-qanuni erməni silahlı dəstələri tərəfindən atəşkəsin pozulması və digər hadisələr barədə Rusiya tərəfinə verilən məlumatlar nədənsə Rusiya sülhməramlı kontingentinin rəsmi açıqlamalarında öz əksini tapmır”, - nazirlikdən əlavə edilib.
Şərhlər
"Sulhməramlı", daha doğrusu, Sülhməramsızlarla məsələni konkretləşdirmək lazımdır, Qarabağa ermənilər artıq onların əli ilə bəs qədər silah-sursat yığıblar. "Mən artıq onlara çuxamın altından ala çıxarmağa başlamışam..."
Biz, zənnimcə, çox belə hallarla qarşılaşacağıq. Belə ki, "sülhməramlı" adlandırılan bu sülhməramsızların bu hələ kiçik sürprizləridir, onlardan istənilən naqis, namərd hərəkətlər gözləniləndir və mən onları qınamıram. Belə ki, onlar əmrə tabedirlər, Moskvanın proqramına uyğun hərəkət edirlər...