BAYDEN OLA BİLMƏYƏN KILIÇDAROĞLU... - Və anti-Azərbaycan təbliğatının Türkiyə seçkisində buraxdığı iz

Sifarişlə oturub-durmaq Türkiyə kimi dövlətin və xalqın Prezidenti olmağa iddialı bir siyasətçiyə qətiyyən yaraşmır...

Nə zamansa Azərbaycan amilinin Türkiyə seçkilərində bu qədər təsir və müzakirə mövzusu olacağı kimsənin ağlına gəlməzdi. Bu, Azərbaycanın Türkiyə və bütünlükdə region üçün əhəmiyyətinin nə dərəcədə artdığını göstərir. Ancaq digər yandan Türkiyənin aparıcı müxalifət partiyası sədrinin və müxalifətin vahid namizədinin ölkəmizə qarşı sərgilədiyi birmənalı olmayan mövqe, ona yaxın mətbuatın Azərbaycanla bağlı apardığı təbliğat müəyyən narahatlıq və hətta məyusluq doğurur...

Azərbaycanda CHP ideyalarını dəstəkləyən və müxalifətin uğurunu arzulayanlar az deyildi, indi də az deyil. Ancaq bu adamların müxalifət liderinin davranışlarından və qutudan çıxan nəticədən məyus olduğu da göz önündədir.

Kemal Kılıçdaroğlunun və yaxın ətrafının hələ Azərbaycanla bağlı digər açıqlama və eyhamlarını bir kənara qoysaq, onun seçkiyə cəmi bir neçə gün qalmış açıqladığı “Türk yolu” layihəsində Azərbaycanı bu yoldan kənarda qoyması təkcə Azərbaycanda yox, Türkiyədə də böyük narazılıqla qarşılandı. Bu məntiqsiz və bir siyasətçi kimi qeyri-peşəkar addım qutudan çıxan səslərin nisbətində əlbəttə, həlledici olmasa da, müəyyən dərəcədə özünü göstərməmiş deyil.

Azərbaycan hər zaman, xüsusilə də məlum dəhşətli zəlzələ zamanı Türkiyəyə olan münasibətini, dəstəyini ortaya qoyub. Bəs dövlətlərimizin, cəmiyyətlərimizin bu qədər yaxınlaşdığı bir dövrdə Azərbaycana qarşı nəinki münasibətlərimizin ruhuna uyğun gəlməyən, ümumiyyətlə, qeyri-dost münasibət kimi qarşılanan bu “Türk yolu” məsələsinin ortaya atılması nəyə xidmət edirdi? Ümumiyyətlə, bu xəritənin və “layihənin” təqdimatı Kılıçdaroğlu üçün o qədərmi vacib idi? Bu, ona hansı dividentlər, hansı səslər qazandıra bilərdi ki?

Axı, nəinki hansısa təcrübəli siyasətçi, az qala ən savadsız seçici də gözəl anlayır ki, Azərbaycanın Türkiyəyə ehtiyacı olduğu kimi, Türkiyənin də Azərbaycana ehtiyacı var! Bunu Türkiyə xalqı zəlzələ dəhşətini yaşayarkən bir daha gördü...

Məntiqlə bu “Türk yolu ideyasını” yalnız ermənilər və Azərbaycanı istəməyən hansısa digər azlıqlar dəstəkləyə bilərdi ki, onların da sayı Azərbaycana minnətdar olan və məlum siyasətçidən fərqli olaraq, nankorluğu yaxın belə buraxmayan və Azərbaycanı dəstəkləyən Türk toplumu, o cümlədən Azərbaycanı sevən CHP elektoratının böyük hissəsilə müqayisədə olduqca cüzi və əhəmiyyətsizdir. Bəs belə olan təqdirdə, bu mənasız “xəritəni”, özü də məhz seçki öncəsi nümayiş etdirib, öz siyasi nüfuzuna, seçki elektoratına zərbə vurmaq nəyə lazım idi? Ümumiyyətlə, seçkiyə sayılı günlər qaldığı bir vaxtda, Türkiyənin özünün saysız-hesabsız problemləri varkən Azərbaycanı hədəfə çıxarmaq nəyə gərəkdi?

Bəlkə Kemal bəy kimlərinsə, daha doğrusu, Azərbaycanı və Türkiyənin Azərbaycan siyasətini sevməyən dairələrin sifarişini yerinə yetirir? Əgər belədirsə, sifarişlə oturub-durmaq Türkiyə kimi dövlətin və xalqın Prezidenti olmağa iddialı bir siyasətçiyə qətiyyən yaraşmır...

Hər necə olsa, Türkiyə xalqı birinci turda öz seçimini etdi və siyasətdən az-çox anlayışı olanlar ikinci turun nəticəsinin necə olacağını indidən çox gözəl bilirlər. Bir qədər subyektiv və hətta aqressiv səslənsə də, Kılıçdaroğlunun qazanması ehtimalı yoxdur!

Əvəzində, bu seçki Kemal bəy üçün son prezident seçkisi olacaq. 75 yaşında Türkiyə Prezidenti olmaq istəyən Kılıçdaroğlu 78 yaşında ABŞ Prezidenti seçilmiş Co Baydenin uğurunu təkrarlaya, yəni, siyasi karyerasının finiş nöqtəsində həyatının ən böyük uğuruna imza ata bilmədi, bunun üçün nə siyasi bacarığı, nə xarizması, nə də gücü çatmadı...

Azərbaycanda bir çoxları, xüsusilə də özlərini demokrat, qərbpərəst adlandırsalar da, mahiyyət və dünyagörüşü, eləcə də intelekt və biliklər sarıdan bu anlayışlardan çox-çox uzaq olanlar cəmiyyət və siyasi isteblişment olaraq Azərbaycanın Türkiyədəki seçkilərlə bu qədər dərindən maraqlanmasına, az qala seçkinin nəticələrinə təsir cəhdlərinə görə qınayır, irad bildirirlər. Bəli, təəssüf ki, Azərbaycan cəmiyyəti və siyasi institutları hələ də Türkiyə kimi demokratiya bayramı təsiri bağışlayan seçki keçirəcək səviyyədə deyil.

Ancaq cəmiyyətimizi Türkiyə seçkisinə aşırı maraqda günahlandıran bu adamlar hər bir həmvətənimizin Türkiyənin bizim üçün əhəmiyyətini anladığını və səmimi olaraq ona yalnız ən yaxşı olanı arzuladığını, onun inkişafını, müstəqil, qüdrətli və güclü olmasını istədiyini nəzərə almırlar.

Bizim bir zamanlar dövlət olaraq yaranmağımızda olduğu kimi, bu gün də beynəlxalq aləmdə fundamental siyasi mövqelərimizin formalaşmasında Türkiyənin rolu və gələcək addımları olduqca əhəmiyyətlidir. Odur ki, Türkiyənin daxili siyasəti bizim üçün öz daxili siyasətimiz qədər əhəmiyyətli, bizim onunla maraqlanmağımız, bəzən bu prosesə qarışmağa çalışmağımız isə təbiidir və hətta vacibdir...

Cəlal Məmmədov

“AzPolitika.info”