Neft 85 dolları keçdi, Azərbaycan əlavə nə qədər qazanır? – Ekspert açıqladı

İki həftədir dünya birjalarında xam neftin qiyməti yüksəlməkdə davam edir. Artıq 11-ci gündür ki, Brent markalı neft 80 dollardan yuxarı, 3-cü gündür ki, 85 dollardan baha qiymətə satılır.

Xatırladaq ki, SOCAR-ın açıqlamasına görə, 2023-cü ilin I yarısında Azərbaycan neftinin bir barrelinin orta ixrac qiyməti 82,84 dollar təşkil edib, yəni hazırda dünya bazarında yaşananlar cari ili 80 dollardan yuxarı göstəricilərlə başa vurmaq ehtimalını xeyli artırır.

Bəs bu tendensiya Azərbaycana nə verir?

Neft Araşdırmaları Mərkəzinin rəhbəri İlham Şaban bir neçə amili qeyd edir:

“Birincisi, azalan neft həcmlərimiz fonunda gəlirlərimizin hiss ediləcək səviyyədə qalması təmin edilir.

İkincisi, Maliyyə Nazirliyinin proqnozuna görə, neftin orta ixrac qiymətinin hər barrel üçün 10 dollar artımı icmal büdcəyə 1,3-1,4 mlrd. manat vəsait gətirir.

Üçüncüsü, ölkənin valyuta ehtiyatlarının artımı və nəticə etibarı ilə makroiqtisadi göstəricilərin stabilliyinin təmin edilməsinə şərait yaradır”.

Ekspert onu da qeyd edir ki, əlavə gəlirlər hesabına işğaldan azad edilmiş ərazilərin bərpasının sürələndirilməsinə imkan yaranır.

Rasim

“AzPolitka.info”