Müharibə ukraynalıları çox yorub - Ərazi güzəştlərilə razılaşanların sayı artıb

Müharibənin üçüncü ilində ukraynalıların bu savaşdan yorulduğu getdikcə daha aydın şəkildə özünü büruzə verməyə başlayıb.

“AzPolitika” Ukrayna KİV-inə istinadla xəbər verir ki, 2024-cü ilin mayına olan məlumata görə, respondentlərin 32%-i hesab edir ki, tezliklə sülhə nail olmaq və müstəqilliyini qorumaq üçün Ukrayna öz ərazilərinin bir hissəsindən imtina edə bilər.

Eyni zamanda, əksəriyyət (55%) Rusiyaya istənilən ərazi güzəştinə qarşı çıxıb. Bu barədə Kiyev Beynəlxalq Sosiologiya İnstitutu(KIIS) sorğu nəticələrinə istinadla məlumat yayıb. Xəbərdə bildirilir ki, iyul ayı üçün güzəştə getməyə razı olanların sayının daha da artdığı güman olunur.

Sosioloqların qeyd etdiyi kimi, 2022-ci ilin mayından 2023-cü ilin may ayına qədər vəziyyət nisbətən sabit olub: respondentlərin təxminən 8-10%-i ərazi güzəştlərinə hazır idi, mütləq əksəriyyəti – 82-87%-i isə ardıcıl olaraq güzəştlərə qarşı çıxırdı.

2023-cü ilin may ayından sonra ərazi güzəştlərinə hazır olanların payında tədricən artım müşahidə olunur. Beləliklə, 2023-cü ilin sonuna güzəştə getmək istəyi 19%-ə, 2024-cü ilin fevralında 26%-ə, 2024-cü ilin mayında 32%-ə yüksəlib.

“AzPolitika.info”